މެންޗެސްޓާ (ފެބްރުއަރީ 11) - އިނގިރޭސި ޕްރިމިއާ ލީގުގައި ރޭ ލެސްޓާ ސިޓީ އަތުން 2-0 އިން މޮޅުވެ، ލިވަޕޫލުން ލީގުގެ އެއް ވަނައިގައި އޮތް މެންޗެސްޓާ ސިޓީއާ ދެމެދު އޮތް ފަަރަގު ނުވަ ޕޮއިންޓަށް ކުޑަކުރިއިރު، ރަށުންބޭރުގައި 1-0 އިން ވުލްވްސް ބަލިކޮށް އާސެނަލް ލީގުގެ ފަސް ވަނަ މަގާމަށް ޖެހިލައިފި އެވެ.
ސިޓީ އެއް ވަނައިގައި އޮތީ 24 މެޗުން 60 ޕޮއިންޓާ އެކު އެވެ. ލިވަޕޫލް ދެ ވަނަ މަގާމުގައި އޮތީ 23 މެޗުން 51 ޕޮއިންޓް ހޯދައިގެންނެވެ. ތިން ވަނައިގައި އޮތް ޗެލްސީ އަށް 24 މެޗުން ވަނީ 47 ޕޮއިންޓް ލިބިފަ އެވެ. ހަތަރެއްގައި، ވެސްޓް ހޭމް ޔުނައިޓެޑް އޮތީ 24 މެޗުން 40 ޕޮއިންޓް ހަމަކޮށްގެންނެވެ. އާސެނަލް ފަސް ވަނަ އަށް އެރީ ހަ ވަނައިގައި އޮތް މެންޗެސްޓާ ޔުނައިޓެޑާ އެއްވަރަށް 39 ޕޮއިންޓް ހޯދައިގެންނެވެ. ޔުނައިޓެޑުން އެ އަދަދަށް ޕޮއިންޓް ހަމަކުރީ 23 މެޗު ކުޅެގެންނެވެ. އާސެނަލުން ކުޅުނީ 22 މެޗެވެ.
ލިވަޕޫލުން ރޭގެ މެޗަށް ނުކުތީ ޖެނުއަރީ ޓްރާންސްފާ މާކެޓްގައި އެ ޓީމަށް ގެނައި ކޮލަމްބިއާ ފޯވާޑް ލުއިސް ޑިއާޒަށް ފުރަތަމަ ފަހަރަށް ޓީމުގެ ފުރަތަމަ އެގާރައިން ފުރުސަތު ދީގެންނެވެ. މެޗުގައި ގޯލު ޖަހަން ފުރަތަމަ ފުރުސަތު ވެސް ޑިއާޒަށް ލިބުނުއިރު، ގޯލަށް ފޮނުވާލުން ލަސްކޮށްލުމުން އޭނާ އަށް އެ ބޯޅަ ގެއްލުނީ އެވެ. ލެސްޓާ ސިޓީ އަށް ލީޑުނަގައިދޭން ޖޭމްސް މެޑިސަން އަށް ލިބުނު ބޯޅަ ރަނގަޅަށް ޖެހި ނަމަވެސް ލިވަޕޫލްގެ ގޯލުގައި ހުރި އެލިސަން ބެކާ ވަނީ އެ ބޯޅަ ހުއްޓުވައިފަ އެވެ.
ފުރަތަމަ ހާފު ނިމެން 10 މިނިޓަށް ވެފައި ހުއްޓައި، މެޗުގެ 35 ވަނަ މިނިޓްގައި ލިވަޕޫލަށް ލީޑުނަގައިދިނީ ޑިއޯގޯ ޖޮޓާ އެވެ. ޓްރެންޓް އަލެކްސަންޑަ އާނޯލްޑް ނެގި ކޯނަރެއް ވާޖިލް ވެން ޑައިކް ބޮލުން ފޮނުވާލުމުން ލެސްޓާ ކީޕަރު ކެސްޕާ ޝްމައިކަލް އަތުގައި ޖެހިފައި ނުކުތް ވަގުތު ޖޮޓާ ވަނީ ގޯލުގެ ތެރެއަށް ބޯޅަ ފޮނުވާލައިފަ އެވެ.
ލިވަޕޫލުން ދެ ވަނަ ހާފް ފަށައިގެން ލީޑުފުޅާކުރަން ކުރި މަސައްކަތަށް ހުރަސް އަޅަމުންދިޔައީ ލެސްޓާ ގޯލުގައި ރޭ މޮޅުކުޅުމެއް ދެއްކި ކީޕަރު ޝްމައިކަލް އެވެ. އެފްރިކަން ކަޕް އޮފް ނޭޝަންސް (އެފްކޮން) އަށް ފަހު މުހައްމަދު ސަލާހު ރޭ ބަދަލު ކުޅުންތެރިއެއްގެ ގޮތުގައި ދެ ވަނަ ހާފުގައި ކުޅެން ނުކުމެ ފޮނުވާލި ދެ ހަމަލާ އަކާއިި ޑިއާޒް ޖެހި ބޯޅައެއް ޝްމައިކަލް ވަނީ މަަތަކޮށްފަ އެވެ. އޭގެ އިތުރުން ސަލާހު ޖެހި ބޯޅައެއް ހުރަސްދަނޑިއަށް ވެސް ވަނީ އަމާޒުވެފަ އެވެ.
ލިވަޕޫލުން ދެ ވަނަ ގޯލު ޖެހީ މެޗުގެ 84 ވަނަ މިނިޓްގައި ޖޮޓާ އެވެ. އޭރިއާތެރެއިން ޖޮއެލް މަޓިޕް ޖައްސާލި ބޯޅަ ޖޮޓާ ވަނީ ކީޕަރު ޝްމައިކަލް އަތުގައި ޖައްސާފައި ގޯލަށް ފޮނުވާލައިފަ އެވެ. ޖޮޓާ ވަނީ ލެސްޓާ ކޮޅަށް އޭނާގެ. ކެރިއަރުގައި ޖުމްލަ އަށް ގޯލު ޖަަހައިފަ އެވެ. މި ސީޒަނުގައި ރަނގަޅު ފޯމެއްގައި ހުރި ޖޮޓާ ވަނީ ހުރިހާ މުބާރާތެއްގައި 17 ގޯލު ޖަހައިފަ އެވެ.
އާސެނަލުން ވުލްވްސް ދަނޑުގައި ޖެހި ހަމައެކަނި ގޯލަކީ މެޗުގެ 25 ވަނަ މިނިޓްގައި ގަބްރިއެލް މަގާޅައެސް ޖެހި ގޯލެވެ. އޭރިއާތެރެއިން ވުލްވްސްގެ ކީޕަރު ހޯސޭ ސާ އަށް ލިބުމުގެ ކުރިން އަލެކްސަންޑަ ލަކަޒޭޓް ޖައްސާލި ބޯޅަ މަގާޅައެސް ވަނީ ގޯލުގެ ތެރެއަށް ފޮނުވާލައިފަ އެވެ.
އާސެނަލުން މި މެޗުގެ ފަހު ވިއްސަކަށް މިނިޓް ކުޅުނީ ކުޅުންތެރިއަކު މަދުކޮށެވެ. އެއީ ފުލުފުލުގައި އެއް ވަގުތެއްގައި އާސެނަލްގެ ގަބްރިއެލް މާޓިނެލީ ކުރި ދެ ފައުލަކަށް ދެ ރީނދޫ ކާޑު ދައްކައި ރަތް ކާޑެއް ދެއްކުމުންނެވެ. ވުލްވްސްގެ އެއް އެޓޭކެއް ހުއްޓުވަން މާޓިނެލީ ކުރި ދެ ފައުލަކަށް އޭނާ އަށް ދައްކަން ޖެހޭނީ އެއް ރީނދޫ ކާޑު ކަމަށް ބުނެ، އާސެނަލް ކުޅުންތެރިން އެޕީލް ކުރި ނަމަވެސް ރޭގެ މެޗުގެ ރެފްރި މައިކަލް އޮލިވާގެ ނިންމުން ބަދަލެއް ނުކުރި އެވެ.
ކުޅުންތެރިއަކު މަދުކޮށް ވެސް އެ ނަތީޖާގައި ހިފަހައްޓައި އާސެނަލް މޮޅުވިއިރު، މިއީ 2022 ވަނަ އަހަރުގައި އެ ޓީމުން ހޯދި ފުރަތަމަ މޮޅެވެ.
