އަންނަ މާޗް މަހުގެ އެއް ވަނަ ދުވަހުން ފެށިގެން މެލޭޝިއާގެ ބޯޑަރުތައް އެއްކޮށް ހުޅުވާލަން ލަފާދީފައިވާ ކަމަށް އެ ގައުމުގެ ކޮވިޑް ރިކަވަރީ ކައުންސިލުން ބުނެފި އެވެ.
ކޮވިޑް ކޮންޓްރޯލް ކުރުމަށް މެލޭޝިއާގެ ބޯޑަރު ބަންދު ކުރީ މާޗް 2020 ގަ އެވެ. ބޯޑަރު ހުޅުވަން ލަފާދީފައިވާ އިރު، އަވައްޓެރި ގައުމުތަކުން ވެސް ދަނީ އެފަދަ ފިޔަވަޅުތައް އަޅަމުންނެވެ.
އެގޮތުން ތައިލޭންޑާއި ފިލިޕީންސް އަދި ސިންގަޕޫރުގައި ވެކްސިން ފުރިހަމަކޮށްފައިވާ ފަތުރުވެރިންނަށް ކަރަންޓީނުގެ ލުޔާ އެކު އެތެރެވެވޭނެ ގޮތް ވަނީ ހަދައިފަ އެވެ.
ތައިލޭންޑުން މިދިޔަ ހޯމަ ދުވަހު ބުނީ މެލޭޝިއާ އާއި ޗައިނާއާ އެކު ޓްރެވަލް ބަބްލް ގާއިމްކުރަން ވިސްނަމުންދާ ކަމަށެވެ.
ކުރީގެ ބޮޑު ވަޒީރު އަދި ނޭޝަނަލް ރިކަވަރީ ކައުންސިލްގެ ޗެއާޕާސަން މުހްޔިއްދީން ޔާސީން ވިދާޅުވީ މެލޭޝިއާއިން ފުރުމުގެ އަދި އެތެރެވުމުގެ ކުރިން ކޮވިޑަށް ޓެސްޓް ކުރަން ޖެހޭނެ ކަމަށެވެ.
"މީގެ މާނައަކީ ފަތުރުވެރިންނަށް ފަތުރުވެރިންނަށް ޒިޔާރަތް ކުރެވޭނެއޭ، އިންވެސްޓަރުންނަށް އެތެރެވެވޭނެއޭ. އެހެންވީމާ، އެއާއޭޝިއާއަށް އަލުން އުދުހެން ފެށޭނެ،" މެލޭޝިއާގެ ބަޖެޓު އެއާލައިނަށް އިޝާރާތް ކުރައްވަމުން، ނިއުސް ކޮންފެރެންސެއްގައި އޭނާ ވިދާޅުވި އެވެ.
މި ވަގުތު ކަރަންޓީނު ނުކޮށް މެލޭޝިއާއަށް އެތެރެވެވެނީ ހަމައެކަނި ސިންގަޕޫރުން ދަތުރު ކުރާ މީހުންނަށެވެ.
ހަލުވިކަމާ އެކު ފެތުރޭ އޮމިކްރޯން ވޭރިއެންޓްގެ ސަބަބުން މެލޭޝިއާގައި ކޮންމެ ދުވަހަކު ފެންނަ ކޮވިޑް ކޭސްތަކުގެ އަދަދު ފަހަކަށް އައިސް ވަނީ އިތުރުވެފަ އެވެ.
ދުވާލަކު 13،000 އެއްހާ ކޭސް ފެންނަމުންދާ އިރު، މިހާތަނަށް މުޅި ޖުމްލަ 2.9 މިލިއަން ކޭސް މެލޭޝިއާއިން ރިޕޯޓުކޮށްފައިވެ އެވެ.
ކޮވިޑް ޖެހިގެން މެލޭޝިއާއިން 32،000 މީހުން މަރުވެފައިވެ އެވެ. އޭޝިއާގައި އާބާދީގެ ނިސްބަތުން އެންމެ ގިނަ މަރުތަކާއި ކޭސްތައް ވެސް ރިޕޯޓުކޮށްފައިވާ އެއް ގައުމަކީ މެލޭޝިއާ އެވެ.
ހެލްތު މިނިސްޓްރީން ބުނީ ވެކްސިން ޖަހާ ރޭޓް މަތިވުމުން، ފެންނަ ކޭސްތަކުގެ ބޮޑު ބައިގައި އަލާމާތެއް ނުފެންނަ ކަމަށެވެ. އަދި ސީރިއަސް ކޭސްތައް ވެސް ފެންނަނީ މަދުންނެވެ.
މެލޭޝިއާގެ ބޮޑެތި މީހުންގެ އާބާދީގެ 98 ޕަސެންޓް މީހުން ވެކްސިންގެ ދެ ޑޯޒް ފުރިހަމަކޮށްފައިވާ އިރު، 50 ޕަސެންޓަށް ވުރެ ގިނަ މީހުން ވަނީ ބޫސްޓާ ޑޯޒް ޖަހާފަ އެވެ.
އުމުރުން 12 އަހަރާއި 17 އަހަރާ ދެމެދުގެ ކުދިންގެ 89 ޕަސެންޓް ވެކްސިން ފުރިހަމަކޮށްފައިވާ އިރު، މިދިޔަ ހަފްތާގައި އުމުރުން ފަސް އަހަރާއި 11 އަހަރާ ދެމެދުގެ ކުދިންނަށް ވެކްސިން ޖަހަން ފެށި އެވެ.
