އާރަށު މައްސަލާގެ ދައުވާތަކަށް ޔާމީން އިންކާރު، އެދުނީ އަމިއްލަ ފަރާތަކުން ވިޔަސް ޝަރީއަތް ލައިވްކޮށްދޭން

ޓޫރިޒަމްގެ ބޭނުމަށް ވ. އާރަށް ކުއްޔަށް ދޫކޮށްގެން ލިބުނު ފައިސާ ކުރީގެ ރައީސް އަބްދުالله ޔާމީންގެ އަމިއްލަ އެކައުންޓަށް ޖަމާކޮށް އެ ފައިސާ ލޯންޑާކުރި ކަމަށް ބުނެ އުފުލާފައިވާ ދެ ދައުވާއަށް އެމަނިކުފާނު އިންކާރު ކުރައްވައިފި އެވެ.

ކުރިމިނަލް ކޯޓުގެ އިސްގާޒީ އަހްމަދު ޝަކީލް ބައްލަވާ އާރަށު މައްސަލާގައި ދައުވާކުރަނީ ކުރީގެ ރައީސް އަބްދުﷲ ޔާމީންގެ އިތުރުން އާރަށް ކުއްޔަށް ނެގި, ފެލިދޫ ދާއިރާގެ ކުރީގެ މެންބަރު ޔޫސުފް ނައީމްގެ މައްޗަށެވެ.

ޔާމީންގެ މައްޗަށް އުފުލާފައި ވަނީ ރިޝްވަތު ގަބޫލުކުރުމާއި، އެ ފައިސާ ލޯންޑާ ކުރިކަމުގެ ދައުވާ އެވެ. ނައީމްގެ މައްޗަށް ކުރަނީ ރިޝްވަތު ދިނުމުގެ ދައުވާ އެވެ.

މައްސަލާގައި މިއަދު ހެނދުނު ކުރިމިނަލް ކޯޓުގައި އޮތް އަޑުއެހުމުގައި ދައުލަތުގެ ދައުވާތައް ސާފު ނޫން ކަމަށް ޔާމީންގެ ފަރާތުން ފާހަގަކުރި އެވެ. އެގޮތުން, ރިޝްވަތު ނެގި ކަމަށް ދައުވާ ކުރާއިރު ރިޝްވަތުގެ ގޮތުގައި ކުރީ ކޮން ކަމެއް ކަމާއި އާރަށު މައްސަލާގައި ނުފޫޒު ފޯރުވުމުގެ ގޮތުން ޔާމީން ކުރެއްވީ ކޮން ކަމެއްކަމާމެދު ސުވާލު އުފެއްދި އެވެ.

ޔާމީންގެ ފަރާތުން އުފެއްދި ގިނަ ސުވާލުތަކަށް ޖަވާބުދެމުން ދައުލަތުގެ ވަކީލް ވިދާޅުވި ގޮތުގައި, އާރަށް ކުއްޔަށް ދޫކުރުމާ ގުޅޭ ގޮތުން ކުރީގެ ނައިބު ރައީސް އަހުމަދު އަދީބާ, ޔާމީން މަޝްވަރާ ކުރެއްވި ކަމާއި ޔާމީނާއެކު ޑީލެއް ހަދައިގެން އާރަށް ހޯދިކަން ދޭހަވާފަދަ މެސެޖްތަކެއް ޔޫސުފް, އަދީބަށް ކޮށްފައިވާ ކަމަށެވެ.

އޭގެއިތުރުން ވަކީލް ވިދާޅުވި ގޮތުގައި, ޔާމީނަކީ އޭރުގެ ރައިސުލްޖުމްހޫރިއްޔާ ކަމަށްވާއިރު އެ މަގާމަކީ އެކަމަށް ނުފޫޒު ފޯރުވެވޭފަދަ މަގާމެއް ކަމަށާއި އެ މަގާމުގެ ހުރެ އެކަމަށް ނުފޫޒެއް ނުފޯރުވޭނެ ކަމަށް ބުނުމަކީ ރައިސުލްޖުމްހޫރިއްޔާގެ އެއްވެސް ބާރެއް ނެތް ކަމަށް ބުނުން ކަމަށެވެ.

ސުވާލުތަކަށް ޖަވާބު ދިނުމުން ވެސް ޔާމީންގެ ވަކީލް ފާހަގަ ކުރެއްވި ގޮތުގައި, ދައުވާގައި އޮތް އިބާރާތުގެ އިތުރަށް އެއްވެސް ކަމެއް ސާފެއް ނުވެ އެވެ. އޭގެ ބަދަލުގައި އިތުރު ގިނަ ސުވާލުތައް އުފެދޭ ކަމަށް އޭނާ ވިދާޅުވި އެވެ. ނަމަވެސް, މައްސަލަ ބައްލަވާ ގާޒީ ޝަކީލް ނިންމެވީ ދައުވާ އެކަށީގެންވާ ސާފުކޮށްދެވިއްޖެ ކަމަށެވެ. އެހެންވެ, ދެ ދައުވާއަށް ޖަވާބުދާރީވުމަށް ޔާމީނަށް އެންގެވި އެވެ.

އެ އެންގުމާ އެއްގޮތަށް އަމަލު ކުރައްވަމުން ޔާމީން ވަނީ ދެ ދައުވާއަށް ވެސް އިންކާރު ކުރައްވާފަ އެވެ. އިންކާރު ކުރާ ސަބަބާ ގުޅޭ ގޮތުން ތަފްސީލްކޮށް ވާހަކަ ދެއްކުމަށް އިތުރު ފުރުސަތަކަށް އެދުމުން ގާޒީ ވަނީ އެކަން އެހެން ދުވަހަކަށް ތާވަލުކޮށްފަ އެވެ. މިއަދުގެ އަޑުއެހުމުގައި ޔޫސުފްގެ މައްޗަށް ވެސް ދައުވާ އިއްވި އެވެ. ނަމަވެސް, އޭނާގެ ވަކީލުން އެދުނީ ދައުވާއަށް ޖަވާބުދާރީވުން އެހެން ދުވަހަކަށް ތާވަލުކޮށްދިނުމަށެވެ.

އަމިއްލަ ފަރާތެއް މެދުވެރިކޮށް ޝަރީއަތް ލައިވްކޮށް ދޭން އެދުނު

މިއަދުގެ އަޑުއެހުމުގައި ވެސް މައްސަލާގެ ޝަރީއަތް ލައިވްނުކޮށް ކުރިއަށް ގެންދާތީ, ޔާމީން ވަނީ ކަންބޮޑުވުން ފާޅުކުރައްވާފަ އެވެ. މައްސަލަ ލައިވް ނުކުރަން ކޯޓުން ނިންމީ އެކަމަށް ބޭނުންވާ ވަސީލްތައް ނެތް ކަމަށް ބުނެ އެވެ.

ޔާމީން މިއަދު އެދިވަޑައިގެންނެވީ ކޯޓުގައި ލައިވްކުރާނެ ވަސީލަތްތައް ނެތްނަމަ, އެކަން އަމިއްލަ ފަރާތަކަށް ހަވާލުކޮށްގެން ނަމަވެސް, ލައިވްކޮށް ދިނުމެވެ. ޔާމީން ވިދާޅުވި ގޮތުގައި, ޝަރީއަތާ ގުޅިގެން ފަނޑިޔާރުންނަށް ވެސް އެކި ކަހަލަ އިންޒާރުތައް ލިބެމުންދާއިރު އެންމެ އިންސާފުވެރި ގޮތަކަށް ވާނީ މައްސަލަ އާންމުކޮށް ފެންނަ ގޮތަށް ކުރިއަށް ގެންދިޔުމެވެ.

އެމަނިކުފާނުގެ ވަކީލް ޑރ. މުހައްމަދު ޖަމީލް އަހުމަދު ވެސް ވިދާޅުވީ ޔާމީންގެ ކުރީގެ ޝަރީއަތް ވެސް އެއްކޮށް ލައިވްކޮށް ގެންގޮސް, މިހާރު ވެސް ސުޕްރީމް ކޯޓުގެ ހުރިހާ ޝަރީއަތެއް ލައިވްކޮށް ގެންދާއިރު މި މައްސަލަ ވެސް ލައިވްކުރަން ޖެހޭ ކަމަށެވެ. އެމްޑީޕީގެ ޕީޖީ ލީޑަރު އަލީ އާޒިމް, މި ޝަރީއަތާ ގުޅިގެން ފަނޑިޔާރުންނަށް އިންޒާރު ދީފައިވާއިރު ޝަރީއަތް ލައިވްކުރުމުގެ މުހިންމުކަން ޖަމީލް ވެސް ފާހަގަ ކުރެއްވި އެވެ.

ދައުލަތުގެ ވަކީލް ވެސް ވިދާޅުވީ މިފަދަ މައްސަލަތަކުގެ ޝަރީއަތް ލައިވްކުރަން ދައުލަތުން ވެސް އެދޭ ކަމަށެވެ. ނަމަވެސް, މުވައްޒަފެއް ލިބެންދެން ޝަރީއަތް މަޑުޖައްސާލައިގެން ނުވާނެ ކަމަށް ދައުލަތުން ގަބޫލުކުރާ ކަމަށް ވަކީލް ވިދާޅުވި އެވެ.

ޔާމީނާއި ޖަމީލްގެ އެ ވާހަކަތަކާ ގުޅިގެން އިސްގާޒީ ޝަކީލް ވިދާޅުވީ މައްސަލަ ލައިވްކުރެވެން ނެތީ އެކަމަށް ހާއްސަ މުވައްޒަފެއް މިވަގުތު އެ ކޯޓުގައި ނެތުމުން ކަމާއި މުވައްޒަފެއް ހޯދުމުގެ މަސައްކަތް މިހާރު ވެސް ކުރަމުންދާ ކަމަށެވެ. އިސްގާޒީ ވިދާޅުވީ މުވައްޒަފެއް ހަމަޖެހުމާއެކު ޝަރީއަތް ލައިވް ކުރާނެ ކަމާއި ނަމަވެސް, މުވައްޒަފަކު ހަމަޖެހެންދެން ޝަރީއަތް މެދުކަނޑާނުލެވޭނެ ކަމަށެވެ. އަމިއްލަ ފަރާތެއް މެދުވެރިކޮށް ޝަރީއަތް ލައިވްކުރުމާމެދު ގޮތެއް ނިންމޭނީ ގާޒީންގެ މަޖިލީހަށްކަން ވެސް އިސްގާޒީ ފާހަގަކުރެއްވި އެވެ.

އާރަށް މައްސަލައިގެ އަޑުއެހުންތައް ތާވަލްކޮށްފައިވާ ގޮތް

• 10 ފެބްރުއަރީ - 9:30 - އިބްތިދާއީ އަޑުއެހުން (ދައުވާއަށް ޖަވާބުދާރީވުން)
• 16 ފެބްރުއަރީ - 9:30 - އިބްތިދާއީ އަޑުއެހުން (ދެފަރާތުގެ ހެކި ހާމަކުރުން)
• 6 މާޗް - 9:30 - އިބްތިދާއީ އަޑުއެހުން (ހުށަހެޅުންތައް ޝަރީއަތުގައި ހުށަހެޅުން)
• 14 އޭޕްރީލް - 10:30 - ހުށަހެޅުންތަކާއި މެދު ގޮތެއް ނިންމުން
• 16 މެއި - 9:30 - އިފްތިތާހީ ބަޔާން ހުށަހެޅުން
• 17 މެއި - 9:30 - ދައުލަތުގެ ހެކިންގެ ހެކިބަސް ނެގުން
• 19 މެއި - 9:30 - ދައުލަތުގެ ހެކިންގެ ހެކިބަސް ނެގުން
• 24 މެއި - 9:30 - ދައުވާ ލިބޭ ފަރާތުގެ ހެކިބަސް ނެގުން
• 31 މެއި - 9:30 - ދައުވާ ލިބޭ ފަރާތުގެ ހެކިބަސް ނެގުން
• 7 ޖޫން - 9:30 - ކިތާބީ ހެކިތަކާމެދު ދެފަރާތުން ވާހަކަދެއްކުން
• 16 ޖޫން - 9:30 - ހުލާސާ ބަޔާން ހުށަހެޅުން
• 30 ޖޫން - 13:00 - ހުކުމް ކުރުން