ގާޒީއާބާދް، އިންޑިއާ (ފެބްރުއަރީ 10) - ބޮޑު ވަޒީރު ނަރެންދްރަ މޯދީގެ ބަރަތިޔަ ޖަނަތަ ޕާޓީ (ބީޖޭޕީ) އަށް މުހިއްމު އިންތިހާބެއްގައި އިންޑިއާގެ އެންމެ އާބާދީ ބޮޑު ސްޓޭޓުގައި ބުރާސްފަތި ދުވަހު ވޯޓުލާން ފަށައިފި އެވެ.
އުއްތަރް ޕްރަދޭޝް ސްޓޭޓަށް އިގްތިސާދީ ގިނަ ގޮންޖެހުންތަކެއް ދިމާވެފައިވާ އިރު، ބީޖޭޕީގެ އުއްމީދަކީ އެ ސްޓޭޓް ތާއީދު ދެމިއޮތުމެވެ. އުއްތަރް ޕްރަދޭޝްގައި 200 މިލިއަން މީހުން ދިރިއުޅެ އެވެ.
އުތުރުގައި އޮންނަ ހިންދީ ބަހުން ވާހަކަދައްކާ މީހުން ދިރިއުޅޭ އެ ސްޓޭޓުން ކުރި ލިބިއްޖެ ނަމަ، އެކަން ވާނީ 2024 ގެ ގައުމީ އިންތިހާބުގެ ކުރިން ބީޖޭޕީއަށް ބޮޑު އުއްމީދަކަށެވެ. ބީޖޭޕީން ބޭނުންވަނީ މޯދީގެ ލީޑާޝިޕްގެ ދަށުން ތިން ވަނަ ދައުރަކަށް ވެސް ސަރުކާރުގައި ތިބުމަށެވެ.
ހިޔާލު ނެގުމުގެ ޕޯލްތަކުން ދައްކާ ގޮތުގައި އުއްތަރް ޕްރަދޭޝްގެ 403 މެމްބަރުން ހިމެނޭ ޕާލިމެންޓުގައި ބީޖޭޕީއަށް ގިނަ ގޮނޑިތައް ލިބި، އެ ސްޓޭޓުގެ ތާއީދު އޮތްކަން ހާމަވާނެ އެވެ.
އިންޑިއާގެ ގައުމީ އިންތިހާބުގައި ޕާލިމެންޓަށް އެންމެ ގިނަ މެމްބަރުން ހޮވަން ޖެހެނީ އެ ސްޓޭޓުންނެވެ. އެގޮތުން ޕާލިމެންޓުގެ ތިރިގޭގެ 543 ގޮނޑީގެ ތެރެއިން 80 ގޮނޑި ހާއްސަ ވަނީ އުއްތަރް ޕްރަދޭޝް އަށެވެ.
އުއްތަރް ޕްރަދޭޝްގެ މިހާރުގެ ޗީފް މިނިސްޓަރު އަދި ބީޖޭޕީގެ އިސްވެރިޔަކަށް ހުންނަނީ ހިންދޫ ފާދިރީ، އުމުރުން 49 އަހަރުގެ ޔޯގީ އާދިތްނަޔަތް އެވެ.
އެ ސްޓޭޓުގައި ވޯޓުލެވޭ މީހުންގެ އާބާދީގެ 80 ޕަސެންޓަކީ ހިންދޫންނެވެ. އެހެންވެ، ދީނީ ހިޔާލު ތަފާތުވުންތައް އުފައްދައި، ހިންދޫންގެ ވޯޓު ހޯދަން އާދިތްޔަނަތް މަސައްކަތް ކުރާ ކަމަށް ބަޔެއް މީހުން ތުހުމަތު ކުރެ އެވެ.
ބީޖޭޕީއާ ދެކޮޅަށް ނުކުންނަ މައި ކެންޑިޑޭޓަކީ ސަމަޖްވާދީ (ސޯޝަލިސްޓް) ޕާޓީގެ އަކިލޭޝް ޔާދަވް އެވެ. އޭނާގެ ކެމްޕެއިން އަމާޒުކޮށްފައި ވަނީ 2020 ވަނަ އަހަރު ބަލިމަޑުކަން ފެށި ފަހުން އާއްމުންގެ ވަޒީފާ ގެއްލި، ތަކެތީގެ އަގު އުފުލިފައިވާ މައްސަލަ އަށެވެ.
އޭނާގެ ކެމްޕެއިނަށް ރައްދު ދިނުމުގެ ގޮތުން ބީޖޭޕީން ވައުދުވެފައި ވަނީ ކޮންމެ އާއިލާއެއްގެ ވެސް މަދުވެގެން އެކަކަށް ވަޒީފާ ކަށަވަރު ކުރުމަށާއި ދަނޑުވެރިންނަށް ހިލޭ ކަރަންޓު ފޯރުކޮށްދިނުމަށެވެ.
ބުރާސްފަތި ދުވަހު އިންތިހާބުގެ ވޯޓުލުން ފެށި އިރު، ފުރަތަމަ މަރުހަލާގައި އުއްތަރް ޕްރަދޭޝްގެ ޕާލިމެންޓުގެ 58 ގޮނޑިއަކަށް މެމްބަރުން ހޮވަން 22 މިލިއަން މީހުން ވޯޓުލާނެ އެވެ.
ވޯޓުލުމުގެ ކަންކަން ކުރިއަށް ދާނީ ހަތް މަރުހަލާއަކަށް ބަހާލައިގެންނެވެ. ވޯޓު ގުނަން ފަށަން ތާވަލުކޮށްފައި ވަނީ މާޗް 10 ވަނަ ދުވަހަށެވެ.
