މަޔާމީ، އެމެރިކާ (ފެބްރުއަރީ 10) - މިދިޔަ މަހު އެމެރިކާގެ ކޮމީޑިއަން އަދި އެކްޓަރު ބޮބް ސޭގެޓް ކުއްލި ގޮތަކަށް މަރުވީ ބޮލަށް ލިބުނު އަނިޔާއެއްގެ ސަބަބުން ކަމަށް އާއިލާއިން ބުނެފި އެވެ.
ސޭގެޓް އަކީ 1980 އާއި 1990 ގެ އަހަރުތަކުގައި ދެއްކު މަގްބޫލު ޓީވީ ޝޯ "ފުލް ހައުސް"ގެ ތަރި އެވެ. އުމުރުން 65 އަހަރުގައި އޭނާ މަރުވެފައި އޮއްވާ ފެނުނީ އޯލާންޑޯގެ ރިޓްޒް ކާލްޓަން ހޮޓަލުގެ ކޮޓަރިއެއްގެ ތެރެއިންނެވެ.
މަރުވި އިރު، ސޭގެޓް އުޅުނީ އެމެރިކާގެ ޓުއާއެއްގަ އެވެ. ޖެނުއަރީ މަހު އޭނާ މަރުވި އިރު، އެކަން ދިމާވި ސަބަބެއް ކުރިން ސާފެއް ނުވެ އެވެ.
"ކަމާ ބެހޭ ފަރާތްތަކުން ޔަގީންކުރާ ގޮތުގައި ބޮބް މަރުވީ ބޮލަށް އަނިޔާވެގެން،" އާއިލާއިން ނެރުނު ބަޔާނެއްގައި ބުންޏެވެ.
"އެ މީހުން ނިންމާފައިވާ ގޮތުގައި އޮޅިގެން ތަނެއްގައި ބޯ ޖެހި، ބޭރުން އަނިޔާއެއް ފެންނަން ނެތުމުން، ބޮބް ވަނީ އަޅާ ނުލައި ނިދާފައި،" ބަޔާނުގައިވެ އެވެ.
އޭނާގެ މަރުގައި "މަސްތުވާތަކެތި އަދި ރަލުގެ ކަމެއް ނުހިމެނޭ" ކަމަށް ވެސް އާއިލާއިން ފާހަގަކުރި އެވެ.
"ފުލް ހައުސް" ގައި ސޭގެޓް ކުޅުނީ ޑެނީ ޓޭނާ ނަމަކަށް ކިޔާ ބައްޕައެއްގެ ރޯލެވެ. އެ ޝޯ ކުރިއަށް ދިޔައީ 1987 އިން 1995 އަށް އޭބީސީ ގަ އެވެ. ނެޓްފްލިކްސް އިން ވަނީ 2016 އިން 2020 އަށް އެ ޝޯގެ ސީކުއެލްއެއް ވެސް ދައްކާފަ އެވެ.
އޭގެ އިތުރުން ސޭގެޓް ވަނީ "އެމެރިކާޒް ފަނިއެސްޓް ހޯމް ވީޑިއޯޒް" ހުށަހަޅައި ދީ، ސީބީއެސްގެ ހިޓް ޝޯ "ހައު އައި މެޓް ޔޯ މަދާ" ގެ ނެރޭޓަރުގެ ގޮތުގައި އަޑު އަޅާފަ އެވެ.
ފިލަޑެލްފިއާ އަށް 1956 ގައި އުފަންވި ސޭގެޓް ފުރަތަމަ ކައިވެނި ކުރީ ޝެރީ ކްރޭމް ސޭގެޓްއާ އެވެ. އެ ކައިވެންޏަށް ތިން ކުދިން ލިބުނެވެ. ސޭގެޓް މަރުވި އިރު، އޭނާގެ ތިން ކުދިންނާއި ދެ ވަނަ އަށް ކައިވެނި ކުރި ކެލީ ރިޒޯ ދުނިޔޭގައި އެބަ ތިއްބެވެ.
