ޖެނީވާ، ސްވިޓްޒަލޭންޑް (ފެބްރުއަރީ 9) - މިދިޔަ އަހަރުގެ ފަހުކޮޅު ކޮވިޑް ފަތުރާ ވައިރަހުގެ އޮމިކްރޯން ވޭރިއެންޓް ފެނުނު ފަހުން، އެ ބަލީގައި 500،000 އަށް ވުރެ ގިނަ މީހުން މަރުވެއްޖެ އެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނީ މިދިޔަ ނޮވެމްބަރު މަހުގެ ފަހުކޮޅުން ފެށިގެން ކޮވިޑްގެ 130 މިލިއަން ކޭސް އަދި 500،000 މަރު ރިކޯޑްކޮށްފައިވާ ކަމަށެވެ.
މިހާރު މުޅި ދުނިޔޭގައި ވެސް އެންމެ ބޮޑަށް ފެތުރިފައިވާ "ޑޮމިނެންޓް" ވޭރިއެންޓަކީ އޮމިކްރޯން އެވެ. އެއީ ބަލީގައި ސީރިއަސްވުން ކުޑަ ނަމަވެސް، ވަރަށް ހަލުވިކަމާ އެކު ފެތުރޭ ވޭރިއެންޓެކެވެ.
"ކާމިޔާބު ވެކްސިންތަކެއް ލިބެން ހުރި ޒަމާނެއްގައި ބައި މިލިއަން މީހުން މަރުވެގެން ދިޔުމުން ހިތާމައިގެ ކޮޅެއް ވެސް ނެތް،" ޑަބްލިއުއެޗްއޯގެ އިންސިޑެންޓް މެނޭޖަރު އަބްދީ މަހަމުދް ވިދާޅުވި އެވެ.
"އޮމިކްރޯންގެ ނުރައްކާ ކުޑަ ކަމަށް އެންމެން ބުނަމުން ދިޔައިރު، މި ވޭރިއެންޓް ފެނުނު ފަހުން ބައި މިލިއަން މީހުން މަރުވެފައިވާކަން ގިނަ ބަޔަކަށް ނޭނގޭ."
ޑަބްލިއުއެޗްއޯގެ ކޮވިޑަށް ހާއްސަ ޓީމުގެ ޓެކްނިކަލް ވެރިޔާ މާރިއާ ވޭން ކެރްކޮވޭ ވިދާޅުވީ އޮމިކްރޯންއާ ގުޅިގެން ފެންނަ ކޭސްތަކުގެ އަދަދުން "އަންތަރީސްވާ" ކަމަށެވެ.
"މީގެ ކުރިން އައި ޕީކުތަކަކީ އެއްވެސް އެއްޗަކަށް ނުވޭ. އަޅުގަނޑުމެން އަދިވެސް މި ތިބީ ބަލިމަޑުކަމުގެ މެދުގައި. ގިނަ ގައުމުތަކުން އޮމިކްރޯންގެ ޕީކަށް އަދި ނުދޭ."
އޭނާ އެންމެ ބޮޑު ކަންބޮޑުވުމެއް ފާޅުކުރީ ފަހަކަށް އައިސް މަރުވާ މީހުންގެ އަދަދުތައް އަނެއްކާވެސް އިތުރުވާން ފަށާފައި ވާތީ އެވެ.
ޑަބްލިއުއެޗްއޯއިން ކޮންމެ ހަފްތާއަކު ނެރޭ ކޮވިޑްގެ އެޕިޑެމިއޮލޮޖިކަލް ރިޕޯޓުގައިވާ ގޮތުން ފާއިތުވި ހަފްތާގައި އެކަނިވެސް 68،000 މީހުން މަރުވި އެވެ. އެއީ އޭގެ ކުރީ ހަފްތާއަށް ވުރެ ހަތް ޕަސެންޓް އިތުރެވެ.
ނަމަވެސް ފާއިތުވި ހަފްތާގައި ރިކޯޑްކުރި ކޮވިޑް ކޭސްތަކުގެ އަދަދު ވަނީ 17 ޕަސެންޓުން 19.3 މިލިއަނަށް ދަށްވެފަ އެވެ.
