ރާއްޖޭގައި ފުރަތަމަ ފަހަރަށް ޓީ10 ކްރިކެޓް މުބާރާތެއް ބާއްވަން ނިންމާފައިވާ ކަމަށް ކްރިކެޓް ބޯޑް އޮފް މޯލްޑިވްސް (ސީބީއެމް) އިން ބުނެފި އެވެ.
ދުނިޔޭގެ އެކި ގައުމުތަކުގައި ވެސް ފޯރިގަދަކޮށް ބާއްވަމުން އަންނަ ޓީ10 ކްރިކެޓް، ރާއްޖެ އަށް ތައާރަފްކޮށް، ކުރިއަށްގެންދާ ފުރަތަމަ މުބާރާތް އޮންނާނީ މި މަހުގެ 18 ވަނަ ދުވަހު އެވެ. މި މުބާރާތުގައި ޓީމުތަކުން ބައިވެރިވުމުގެ މުއްދަތް މިއަދުގެ ނިޔަލަށް ހަމަވާނެ އެވެ.
ކްރިކެޓް ބޯޑްގެ ނައިބް ރައީސް އަހުމަދު ހުސެއިން (ކުޑަދޮނާ)، މިއަދު "އަދަދު" އަށް ވިދާޅުވީ ޓީ10 ކްރިކެޓް ރާއްޖޭގައި ވެސް ފަށައި، މުބާރާތެއް ކުރިއަށް ގެންދިއުމުގެ އެންމެ ބޮޑު ބޭނުމަކީ ކުޅުންތެރިން ކުޅެން ވާދަވެރި އިތުރު މުބާރާތެއް ހޯދައިދިނުމާއި ކްރިކެޓްގެ ދުނިޔޭގައި ކުރިއަރަމުން އަންނަ ޓީ10 ކްރިކެޓް ރާއްޖޭގައި ވެސް ފޯރީގައި ކުރިއަށް ދިއުމުގެ ބޭނުމުގައި ކަމަށެވެ.
"10 އޯވަރު ވީމަ ވަރަށް އިންޓެންސްކޮށް މިދާނީ. ލަނޑު ހެދުމުގައި ވެސް އަނެއްކާ ފޯރި ވެސް ގަދަކޮށް ދާނީ. ދެ ގަޑިއިރެއްހާއިރު ތެރެއަށް މެޗެއް މި ދަނީ. ވަރަށް ރަނގަޅަށް މި ކަހަލަ މުބާރާތްތައް އެހެން ގައުމުތަކުގައި ވެސް ބާއްވަމުން އަންނާތީވެ، ވިސްނުން އައީ ރާއްޖޭގައި ވެސް މި ފަދަ މުބާރާތެއް ކުރިއަށް ގެންދަން،" ކުޑަދޮނާ ވިދާޅުވި އެވެ.
ކްރިކެޓް ބޯޑުން މައުލޫމާތު ދޭ ގޮތުގައި ގާތްގަނޑަކަށް 10 ވަރަކަށް ޓީމު ފުރަތަަމަ ޓީ10 ކްރިކެޓް މުބާރާތުގައި ވާދަކުރާނެ އެވެ.
ދާދި ފަހުން ކްރިކެޓް ބޯޑުން ވަނީ ރާއްޖޭގެ ޓީ20 ކްރިކެޓް ލީގު ކާމިޔާބުކަމާ އެކު ނިންމާލައިފަ އެވެ.
ކްރިކެޓް ބޯޑްގެ ރައީސްކަމާ މުހައްމަދު ފައިސަލް އިންތިހާބުވެ، ރާއްޖޭގެ ކްރިކެޓް ރަނގަޅު ދުވެއްޔެއްގައި ކުރިއަށް ގެންދިއުމުގެ ވިސްނުމުގައި ތަފާތު ކަންތައްތަކެއް އަންނަނީ ތައާރަފް ކުރަމުންނެވެ. އެ ގޮތުން ކްރިކެޓްގެ މައުލޫމާތާއި މެޗުތަކުގެ ނަތީޖާ ވަގުތުން ބަލައިލެވޭނެ ގޮތަށް ފަރުމާކޮށްފައިވާ މޯލްޑިވްސް ކްރިކެޓް އެޕް އެއް ލޯންޗް ކުރުމުގެ އިތުރުން، 2030 އަށް އަމާޒުކޮށް ދުރުރާސްތާ ޕްލޭނެއް ވަނީ އެކުލަވާލައިފަ އެވެ.
މީގެ އިތުރުން ރާއްޖެ އަށް އިންޑޯ ކްރިކެޓް ތައާރަފް ކުރުމުގެ އިތުރުން ގައުމީ ކްރިކެޓް ޓީމުން ބައިނަލްއަގުވާމީ މުބާރާތްތަކުގައި ދައްކާ ޕާފޯމަންސަށް ބަލައި، ބޯނަސް ސްކީމެއް ވެސް ވަނީ ތައާރަފްކޮށްފަ އެވެ.
