ބެއިޖިން، ޗައިނާ (ފެބްރުއަރީ 8) - ޕީސީއާރް ލެބް ޓެސްޓާ އެއް ވަރަށް ޔަގީންކަން ބޮޑު، ނަމަވެސް ހަތަރު މިނެޓުގެ ތެރޭގައި ނަތީޖާ ލިބޭ މުޅިން އާ ކޮވިޑް ޓެސްޓެއް ޗައިނާގެ ސައިންސްވެރިން އުފައްދައިފި އެވެ.
ކޮވިޑާ ދެކޮޅަށް އެންމެ ޔަގީންކަން ބޮޑު ނަތީޖާއެއް ލިބެނީ ޕީސީއާރް ޓެސްޓުން ކަމަށް އޮންނަނީ ބެލެވިފަ އެވެ. ނަމަވެސް އޭގެ ނަތީޖާ ލިބެން ގަޑިއިރުތަކެއް ނަގަ އެވެ.
ހަލުވިކަމާ އެކު ފެތުރޭ އޮމިކްރޯން ވޭރިއެންޓްގެ ސަބަބުން ކޮވިޑަށް ޓެސްޓު ކުރަން ޑިމާންޑް ބޮޑުވާން ފެށުމާ އެކު ބައެއް ގައުމުތަކަށް ވަނީ ބެކްލޮގް މައްސަލަ ދިމާވެފަ އެވެ.
ޝަންހާއީގެ ފުޑަން ޔުނިވާސިޓީގެ ސައިންސްވެރިން ބުނީ އެކަމަށް ހައްލެއް ލިބިފައިވާ ކަމަށެވެ.
ނޭޗާ ބަޔޯމެޑިކަން އިންޖިނިއަރިން ޖާނަލްގައި ޝާއިއު ކުރި ދިރާސާގައިވާ ގޮތުން އަލަށް އުފެއްދި ސެންސާއެއްގެ އެހީގައި ކުޑަ ވަގުތުކޮޅެއްގެ ތެރޭގައި ކޮވިޑް ޓެސްޓުގެ ނަތީޖާ ލިބެ އެވެ.
ސެންސާއަށް ފޯރުކޮށްދޭ ސާމްޕަލްތަކުގެ ޖެނެޓިކް މެޓީރިއަލް އެނެލައިޒް ކުރަން ބޭނުން ކުރަނީ މައިކްރޯއިލެކްޓްރޯނިކްސް އެވެ. އެ ޓެކްނޮލޮޖީގެ އެހީގައި ހަތަރު މިނެޓުން ނަތީޖާ ލިބެ އެވެ.
ޓެކްނޮލޮޖީ ޓެސްޓް ކުރީ ޝަންހާއީއިން ކޮވިޑް ޖެހިފައިވާ 33 މީހުންގެ ސާމްޕަލް ނަގައިގެންނެވެ. އެ 33 މީހުންގެ ސާމްޕަލްގެ ޕީސީއާރް ޓެސްޓު ވެސް ހެދި އެވެ. ދިރާސާގައިވާ ގޮތުން އާ ޓެކްނޮލޮޖީގެ ނަތީޖާ އާއި ޕީސީއާރް ޓެސްޓުގެ ނަތީޖާ "ވަރަށް ފުރިހަމައަށް" އެއް ގޮތެވެ.
އެހެންވެ، އިތުރު 54 ސާމްޕަލެއް އެގޮތަށް ޓެސްޓު ކުރި އެވެ. އެއީ ކޮވިޑް ނުޖެހި ހުން އައިސްފައި ތިބި މީހުންނާއި، އިންފްލުއެންޒާ ޖެހިފައި ތިބި މީހުންނާއި، ކޮވިޑް ޖެހިފައި ތިބި މީހުން އަދި ސިއްހަތު ރަނގަޅަށް ތިބި މީހުންގެ ސާމްޕަލްތަކެވެ. އެ ސާމްޕަލްތަކުގެ ނަތީޖާއިން އެއްވެސް "ފޯލްސް ޕޮޒިޓިވް"އެއް ނުފެނެ އެވެ.
އެ ޓެކްނޮލޮޖީ އުފެއްދި ސައިންސްވެރިން ބުނީ އެކަމަށް ހާއްސަ ޑިވައިސް ފުރިހަމަކޮށް، ނެރެން ފެށުމާ އެކު ފަސޭހަކަމާ އެކު އަވަހަށް ކޮވިޑަށް ޓެސްޓު ކުރެވޭނެ ކަމަށެވެ. އެގޮތުން މިއީ އެއާޕޯޓްތަކާއި، ހެލްތު ފެސިލިޓީތަކަށް ބޭނުންހުރި ޓެކްނޮލޮޖީއަކަށް ވާނެ ކަމަށް ފާހަގަކުރެ އެވެ.
ސީޕީއާރް ޓެސްޓުގެ ނަތީޖާ ލިބުން ލަސްވުމުގެ އިތުރުން، އެކަމަށް ލެބޯޓަރީ އިންފްރާސްޓްރަކްޗާ ވެސް ބޭނުންވެ އެވެ. ރެޕިޑް ޑައިގްނޯސްޓިކް ޓެސްޓު ފަސޭހައިން ލިބެން ހުރި ނަމަވެސް، އެއީ ޕީސީއާރް އަށް ވުރެ ނަތީޖާގެ ޔަގީންކަން ކުޑަ އެއްޗެކެވެ.
ކޮވިޑް ޓެސްޓު ކިޓު އެންމެ ގިނައިން އުފައްދާ އެއް ގައުމަކީ ޗައިނާ އެވެ. ކަސްޓަމްސްގެ ޑޭޓާ ދައްކާ ގޮތުން ޑިސެމްބަރު މަހު ޗައިނާއިން 1.6 ބިލިއަން ޑޮލަރުގެ ކިޓް އެކްސްޕޯޓް ކުރި އެވެ. އެއީ ނޮވެމްބަރު މަހާ އަޅާ ބަލާއިރު 144 ޕަސެންޓު އިތުރުވުމެކެވެ.
