އަހްމަދުއާބާދް، އިންޑިއާ (ފެބްރުއަރީ 8) - އިންޑިއާގެ ހުޅަނގު އަހްމަދުއާބާދް ސިޓީގައި 2008 ވަނަ އަހަރު ދިން ހަމަލާއެއްގައި ބައިވެރިވި 49 މީހުންގެ މައްޗަށް ކުށް ސާބިތުވެއްޖެ އެވެ.
ރާވައިގެން ދިން ހަމަލާގައި އަހްމަދުއާބާދުގެ މާކެޓުތަކާއި، ބަސްތަކާއި، އާއްމުން އެއްވާ އެހެން ތަންތަނުގައި ބޮން ގޮއްވި އެވެ. އޭގެ ސަބަބުން 56 މީހުން މަރުވެ، 200 އަށް ވުރެ ގިނަ މީހުންނަށް އަނިޔާވި އެވެ.
އެކަމުގެ ޒިންމާ ނެގީ އިންޑިއަން މުޖާހިދީން ނަމަކަށް ކިޔާ ގްރޫޕަކުންނެވެ. އެ ގްރޫޕުން ބުނީ ހަމަލާއަކީ 2002 ވަނަ އަހަރު އަހްމަދުއާބާދުގައި ހިނގި ދީނީ ހަމަނުޖެހުމެއްގެ ބަދަލު ހިފުން ކަމަށެވެ.
ޕްރޮސެކިއުޓަރު އަމިތް ޕަޓޭލް އަހްމަދުއާބާދް ކޯޓުގެ ބޭރުގައި ނޫސްވެރިންނަށް ވިދާޅުވީ 80 ވަރަކަށް މީހުންނަށް ދައުވާ ކުރި ނަމަވެސް 28 މީހުން ސަލާމަތްވެފައިވާ ކަމަށެވެ.
ބާކީ ތިބި 49 މީހުންގެ މައްޗަށް ސާބިތުވީ މީހުން މެރުމާއި، ޖިނާއީ ކުށް ހިންގުމަށް ބައިވެރިވި ކަމަށެވެ. އެ މީހުންނަށް ހުކުމް ކުރުން އޮންނާނީ ބުދަ ދުވަހު އެވެ.
ގާތްގަނޑަކަށް 10 އަހަރަށް ދިގުދެމިގެން ދިޔަ ޝަރީއަތުގައި 1،000 އަށް ވުރެ ގިނަ މީހުން ހެކިބަސް ދީފައިވެ އެވެ.
އިޖުރިއާރީ މައްސަލަތަކާ ހެދި މައްސަލަ ހުއްޓިފައި ވެސް އެތައް ދުވަހެއް އޮތެވެ. އޭގެ ތެރޭގައި ތުހުމަތު ކުރެވޭ ހަތަރު މީހެއްގެ އިއުތިރާފުގެ ބަޔާން އަނބުރާ ގެންދަން ފެށި ގާނޫނީ މައްސަލައެއް ވެސް ހިމެނެ އެވެ.
އޭގެ އިތުރުން ތުހުމަތު ކުރެވޭ މީހުންގެ ދެބައިކޮށްފައި އެއްބައި މީހުން 2013 ވަނަ އަހަރު ޖަލުން ފިލަން އުޅުނު މައްސަލަ ވެސް ޖެހުނެވެ. އެ މީހުން މަސައްކަތް ކުރީ ބިމު އަޑިން ޓަނަލެއް ކޮނެ، ޖަލުން ނުކުންނާށެވެ.
ހުރިހާ އެންމެން ވެސް ޝަރީއަތުގެ މުއްދަތުގައި ތިބީ ޖަލުގައި ބަންދުކޮށްފަ އެވެ. ނަމަވެސް ސްކިޒޮފްރީނިއާ ޖެހުނު އެކަކު ސިއްހީ ސަބަބުތަކަށްޓަކައި ކަފާލާތުގެ ދަށުން ދޫކޮށްލި އެވެ.
އަހްމަދުއާބާދްގައި 2002 ވަނަ އަހަރު ދީނީ ހަމަނުޖެހުން ހިނގީ މުސްލިމުންނާއި ހިންދޫންނާ ދެމެދު އެވެ. އޭރު ހާހަކަށް ވުރެ ގިނަ މީހުން މަރުވި އިރު، ގިނައިން ހިމެނެނީ މުސްލިމުންނެވެ.
ހަމަނުޖެހުން ފެށީ ރޭލެއްގައި ރޯވެ ހިންދޫންގެ 59 މީހުން މަރުވުމުންނެވެ. އޭރު ތުހުމަތު ކުރި ގޮތުގައި މުސްލިމުން ގަސްތުގައި ރޯކުރީ އެވެ. ނަމަވެސް ފަހުން އެނގުނު ގޮތުގައި ރޯވީ އެކްސިޑެންޓަކުންނެވެ.
ބޮޑު ހަމަނުޖެހުމުގައި ހިންދޫން މުސްލިމުންނަށް އަނިޔާކޮށް، ބަޑި ޖަހައި، ހުޅު ޖަހައި، ބޯބުރިކޮށް މަރަމުން ދިޔަ އިރު، އަހްމަދުއާބާދް ނިސްބަތްވާ ގުޖަރާތު ސްޓޭޓުގެ ޗީފް މިނިސްޓަރަކީ މިހާރު ބޮޑު ވަޒީރު ނަރެންދްރަ މޯދީ އެވެ.
ހިންދޫން ހިންގި ލާއިންސާނީ އަމަލުތަކަށް މޯދީ ދޫދީގެން ހުންނެވި ކަމަށް ގިނަ ބަޔަކު ތުހުމަތު ކުރެ އެވެ. އެކަމުން އުފަންވި އިންޑިއަން މުޖާހިދީން ގްރޫޕުން 2008 ވަނަ އަހަރު މުޅި އިންޑިއާގައި ގިނަ ހަމަލާތަކެއް ދިނެވެ.
އެގޮތުން ވެރިރަށް ނިއު ދިއްލީ އާއި އުތުރުގައި އޮންނަ ޓޫރިސްޓުންގެ މެދުގައި މަގްބޫލު ޖައިޕޫރަށް ދިން ހަމަލާތަކުގައި ވެސް ބަޔަކު މަރުވި އެވެ.
އެ އަހަރުގެ ނޮވެމްބަރު މަހު، މުމްބާއީގައި ހަތިޔާރު ހިފައިގެން ނުކުތް ބަޔަކު ހޮޓެލްތަކާއި އެހެން މުހިއްމު ޓާގެޓްތަކަށް ވެސް ހަމަލާދީ 166 މީހުން މަރާލި އެވެ. ނަމަވެސް އިންޑިއާއިން އެ ހަމަލާގެ ތުހުމަތު ކުރަނީ ޕާކިސްތާނުގެ ހަނގުރާމަވެރިންނަށެވެ.
