ޑުބާއީ، ޔޫއޭއީ (ފެބްރުއަރީ 8) - ދެމެހެއްޓެނިވި ތަރައްގީއާ ދިމާލަށް މިސްރާބު ޖެހުމަށް ޑުބާއީގައި ޕްލާސްޓިކް ކޮތަޅުން އަގު ނަގަން ފަށަން ނިންމައިފި އެވެ.
ޑުބާއީގައި ހޯމް ޑެލިވެރީ އާއި ސުޕާމާކެޓްތަކާއި ބޮޑެތި ފިހާރަތަކުގައި ވެސް އެއް ފަހަރު ބޭނުންކޮށްފައި އެއްލާލާ ބާވަތުގެ ޕްލާސްޓިކް ކޮތަޅު ވަރަށް އާއްމެވެ.
"ތިމާވެށީގެ ދެމެހެއްޓެނިވި ސިޔާސަތަކާ އެއްގޮތަށް، ޕްލާސްޓިކްގެ ބާވަތްތައް އާއްމު ދިރިއުޅުމުގައި ބޭނުން ކުރުން މަދު ކުރަން ބާރު އެޅުމުގެ ގޮތުން، ޑުބާއީގެ އެގްޒެކްޓިވް ކައުންސިލުން ނިންމީ ކޮންމެ ކޮތަޅަކުން 0.07 ޑޮލަރުގެ އަގެއް ނަގަން،" ކަމާ ބެހޭ އިދާރާތަކުން ބުންޏެވެ.
އަންނަ ޖުލައި މަހުން ފެށިގެން އެ ނިންމުމަށް އަމަލު ކުރަން ފަށާނެ އެވެ. އެއާ އެކު ފިހާރަތަކާއި، ރެސްޓޯރެންޓްތަކާއި، ބޭސް ފިހާރަ އަދި ހޯމް ޑެލިވެރީއަށް ވެސް ބޭނުންކުރާ ކޮންމެ ޕްލާސްޓިކް ކޮތަޅަކަށް އާއްމުން ފައިސާ ދައްކަން ޖެހޭނެ އެވެ.
ޑުބާއީގެ އިދާރާތަކުން ބުނީ މިއީ ދެ އަހަރުގެ ތެރޭގައި ޕްލާސްޓިކް ކޮތަޅު މަނާކުރަން ރާވާފައިވާ ސިޔާސަތެއްގެ ދަށުން އަޅާ ފުރަތަމަ ފިޔަވަޅު ކަމަށެވެ. އިތުރު މަރުހަލާތަކަށް ބަހާލައިގެން އާ ފިޔަވަޅުތައް ވެސް ކުރިއަށް އޮތް ތަނުގައި އަޅަމުން ދާނެ އެވެ.
އެއް ފަހަރު ބޭނުންކޮށްފައި އެއްލާލާ ޕްލާސްޓިކާ 2021 ވަނަ އަހަރުގެ ކުރިން އެއްކޮށް ދުރުވުމަށް ހާއްސަ ތިމާވެށީގެ ސިޔާސަތެއް އިއުލާނު ކުރީ މާޗް 2020 ވަނަ އަހަރު އެވެ. ނަމަވެސް އެކަމާ ގުޅޭ ގޮތުން ވެރިރަށް އަބޫ ދާބީގައި އަދި އެއްވެސް ގަވާއިދެއް ތަންފީޒެއް ނުކުރެ އެވެ.
ޕްލާސްޓިކް ކޮތަޅާ ދެކޮޅު ގަވާއިދުތައް ޑުބާއީގައި ތަންފީޒު ކުރަން ފަށާފައިވާ އިރު މޫސުމީ ބަދަލާ ގުޅޭ ކޮޕް28 ބައްދަލުވުން 2023 ވަނަ އަހަރު އޮންނާނީ ޔޫއޭއީގަ އެވެ. ޔޫއޭއީގެ އަމާޒަކީ 2050 ވަނަ އަހަރުގެ ކުރިން ކާބަން ނިޔުޓްރަލްވުމެވެ.
ނަމަވެސް މެދުއިރުމަތީގެ އެހެން ގައުމުތައް ފަދައިން ޔޫއޭއީގެ އިގްތިސާދު ވެސް ބަރޯސާވެފައި އޮތީ ތެލުގެ ވިޔަފާރިއަށެވެ.
