މައިބަދަ ބިނދި، ޕެރެލައިޒްވެފައި ހުރި މީހަކު، ސްވިޓްޒަލޭންޑްގެ ސައިންސްވެރިން އުފެއްދި އިމްޕާންޓެއްގެ އެހީގައި، އަލުން ހިނގައިފި އެވެ.
މައިބަނދަ އެއްކޮށް ބިނދިފައި ހުރި މީހަކު މީގެ ކުރިން މިގޮތަށް ހިނގާފައެއް ނުވެ އެވެ. ސްވިޓްޒަލޭންޑްގެ ސައިންސްވެރިންގެ އެ ޓެކްނޮލޮޖީ ފައިދާ އެހެން ބައެއް މީހުންނަށް ވެސް ދަނީ ކުރަމުންނެވެ.
އެގޮތުން ވާގިގޮސްފައި ހުރި ޕޭޝަންޓަކަށް ވަނީ ދަރިއަކު ލިބިފަ އެވެ. އެ ޓެކްނޮލޮޖީއާ ގުޅިގެން ހޯދަމުންދާ ކުރިއެރުމާ ބެހޭ ދިރާސާ ޝާއިއުކުރީ ނޭޗާ މެޑިސިން ޖާނަލްގަ އެވެ.
އިޓަލީގެ މައިކަލް ރޮކާޓީ ޕެރެލައިޒްވީ މީގެ ފަސް އަހަރު ކުރިން ހިނގި ސައިކަލް އެކްސިޑެންޓެއްގަ އެވެ. އޭނާގެ މައިބަދަ އެއްކޮށް ބިނދި، ފައިގެ އިހުސާސްތައް ކެނޑުނެވެ.
ނަމަވެސް ސާޖަރީއެއްކޮށް އޭނާގެ މައިބަދައިގައި ހަރު ކުރި އިލެކްޓްރިކަލް އިމްޕްލާންޓެއްގެ އެހީގައި މިހާރު އޭނާއަށް ހިނގެ އެވެ. ނަމަވެސް މިއީ މައިބަދައަށް ލިބޭ އަނިޔާއަށް ފަރުވާއެއް ނޫން ކަމަށް ސައިންސްވެރިން ބުނެ އެވެ.
މި ޓެކްނޮލޮޖީއަކީ އުނދަގޫ ޓެކްނޮލޮޖީއަކަށް ވާތީ އާއްމު ދިރިއުޅުމުގައި ބޭނުން ނުކުރެވޭނެ ކަމަށް ވެސް ސައިންސްވެރިން ބުނެ އެވެ. ނަމަވެސް މިއީ ކުރިއެރުމެއްގެ ގޮތުގައި އެ މީހުން ފާހަގަކުރެ އެވެ.
މައިބަދައިގައި ހުންނަ ނާރުގެ އެހީގައި ސިކުނޑިން ފަޔަށް ސިގްނަލްތައް ފޮނުވަ އެވެ. ނަމަވެސް އަނިޔާވެ، ނާރުތަކަށް ގެއްލުންވުމުން ބައެއް މީހން ޕެރެލައިޒްވެ އެވެ.
މައިކަލްގެ މައިބަދަ އެއްކޮށް ބިނދުމުން އޭނާ ވެސް ހުރީ އެއްކޮށް ޕެރެލައިޒްވެފަ އެވެ. ނަމަވެސް އިމްޕްލާންޓްގެ އެހީގައި ސިކުނޑިން އޭނާގެ ފަޔަށް ސީދާ ސިގްނަލް ފޮނުވައިދެ އެވެ. އެހެންކަމުން އިމްޕްލާންޓް އޮންކޮށްފައި ހުންނަ ވަގުތުތަކުގައި އޭނާއަށް ހިނގެ އެވެ.
މިހާތަނަށް ނުވަ މީހެއްގެ މައިބަދައިގައި އިމްޕްލާންޓް ހަރުކޮށްފައިވާ އިރު އެ އެންމެންނަށް ވެސް ހިނގެ އެވެ. ނަމަވެސް އޭގެ ތެރެއިން އެއްވެސް މީހަކު އާއްމު ދިރިއުޅުމުގައި މި ޓެކްނޮލޮޖީ ބޭނުމެއް ނުކުރެ އެވެ. އޭގެ ބަދަލުގައި އިމްޕްލާންޓް ބޭނުން ކުރަނީ ހިނގަން ފަރިތަކޮށް، މަސްތަކާއި ސިއްހަތު ރަނގަޅު ކުރުމަށެވެ.
މި ޓެކްނޮލޮޖީ އުފެއްދުމުގައި އިސްކޮށް އުޅުނު ޕްރޮފެސަރު ގްރެގޮޔާ ކޫޓީނޭ ވިދާޅުވީ ޕެރެލައިޒްވެފައިވާ މީހުންގެ އާއްމު ދިރިއުޅުމުގައި އިމްޕްލާންޓް ބޭނުން ކުރުމާ ހަމައަށް ދެވޭނީ އަދި ގިނަ މަސައްކަތްތަކެއް ކޮށްގެން ކަމަށެވެ.
