އިގްރާނޭ، މޮރޮކޯ (ފެބްރުއަރީ 7) - ހަތަރު ދުވަސް ވަންދެން ވަޅެއްގައި ތާށިވެފައި ހުރި މޮރޮކޯގެ ފަސް އަހަރުގެ ފިރިހެން ކުއްޖާގެ ޖަނާޒާގެ ކަންކަން ހޯމަ ދުވަހު ނިންމަން އެ ގައުމުން ތައްޔާރުވެއްޖެ އެވެ.
ސަތޭކާ ފޫޓު ފުން ވަޅުގަނޑަކަށް ރަޔަން ވެއްޓުނީ އޭނާގެ ބައްޕަ އެ ވަޅު މަރާމާތު ކުރަން އުޅެނިކޮށެވެ. ރަޔަން ސަލާމަތް ކުރުމުގެ މަސައްކަތަށް ކުރިމަތިވި އެންމެ ބޮޑު ގޮންޖެހުމަކީ ބިންގަނޑު ކަނޑައިގެން ގޮސް، ވަޅުގެ ތެރެއަށް ފަސް އެޅުމުގެ ބިރެވެ.
ބުރަ މަސައްކަތަކަށް ފަހު ރެސްކިއު ޓީމުން ވަޅުގެ ތެރެއިން ރަޔަން ނެގީ ހޮނިހިރު ދުވަހުގެ ރެއެވެ. އޭރު ރަޔަންގެ ހާލަތާ ގުޅޭ ވަކި އެއްޗެއް ހާމައެއް ނުކުރެ އެވެ. އެހެންވެ، އެ ސަރަހައްދަށް ޖަމާވި މީހުން ދިޔައީ އުފާ ކުރަމުންނެވެ.
ސޯޝަލް މީޑިއާގައި ވެސް ސޭވް ރަޔަން ހޭޝްޓެގް ބޭނުންކޮށްގެން މީހުން ދިޔައީ އުފާ ކުރަމުންނެވެ. އެހެންވެ، އޭގެ އިރުކޮޅެއް ފަހުން ރަޔަން މަރުވެފައިވާކަން ހާމަކުރުމާ އެކު އެންމެންނަށް ލިބުނީ ފުން ހިތާމައެކެވެ.
ރަޔަންގެ ޖަނާޒާ އޮންނާނީ ހޯމަ ދުވަހު އޭނާގެ އުފަން އިގްރާނޭ އަވަށުގަ އެވެ. އެއީ އުތުރު މޮރޮކޯގެ ރިފް ފަރުބަދަ މަތީގައި އޮންނަ ފަގީރު ހިސާބެކެވެ. ރަޔަން މަރުވި ހާދިސާ ހިނގީ ވެސް އެ އަވަށުގަ އެވެ. އެ ހާދިސާއަށް ފަހު އަވަށް އޮތީ ހުއްޓުމަކަށް އައިސްފައި ކަމަށް ނޫސްތަކުން ބުނެ އެވެ.
ބުރަ މަސައްކަތަށް ފަހު ރަޔަން ސަލާމަތް ނުކުރެވުނު އިރު، މީގެ ކުރިން 2019 ވަނަ އަހަރު ވެސް މިފަދަ ގޮތަކަށް ސްޕެއިންގައި އުމުރުން ދެ އަހަރުގެ ކުއްޖަކު 70 މީޓރުގެ ފުން ވަޅަކަށް ވެއްޓިގެން މަރުވި އެވެ. އެ ކުއްޖާ ސަލާމަތް ކުރެވޭތޯ 13 ދުވަހުގެ އޮޕަރޭޝަނެއް ކުރިއަށް ގެންިދޔަ އެވެ.
