ހަތަރު ދުވަސް ވަންދެން ވަޅެއްގައި ތާށިވެފައި ހުރި މޮރޮކޯގެ ފަސް އަހަރުގެ ފިރިހެން ކުއްޖާގެ މަރާ އެކު އެތައް ހާސް ބަޔަކު ހިތާމަ ފާޅުކުރަމުން އެބަދެ އެވެ.
ރަޔަން ސަލާމަތް ކުރަން ކުރި މަސައްކަތަށް ހިތްވަރު ދޭން އެތައް ސަތޭކަ ބަޔަކު ވަޅު ކައިރިއަށް ޖަމާވި އިރު، އެތައް ހާސް ބަޔަކު ދިޔައީ އޮންލައިންކޮށް ވެސް ހިތްވަރުދެމުންނެވެ.
ސަތޭކާ ފޫޓު ފުން ވަޅުގަނޑަކަށް ރަޔަން ވެއްޓުނީ އޭނާގެ ބައްޕަ އެ ވަޅު މަރާމާތު ކުރަން އުޅެނިކޮށެވެ. ރަޔަން ސަލާމަތް ކުރުމުގެ މަސައްކަތަށް ކުރިމަތިވި އެންމެ ބޮޑު ގޮންޖެހުމަކީ ބިންގަނޑު ކަނޑައިގެން ގޮސް، ވަޅުގެ ތެރެއަށް ފަސް އެޅުމުގެ ބިރެވެ.
ބުރަ މަސައްކަތަކަށް ފަހު ރެސްކިއު ޓީމުން ވަޅުގެ ތެރެއިން ރަޔަން ނެގީ ހޮނިހިރު ދުވަހުގެ ރެއެވެ. އޭރު ރަޔަންގެ ހާލަތާ ގުޅޭ ވަކި އެއްޗެއް ހާމައެއް ނުކުރެ އެވެ. އެހެންވެ، އެ ސަރަހައްދަށް ޖަމާވި މީހުން ދިޔައީ އުފާ ކުރަމުންނެވެ.
ރަޔަންގެ މަންމަ އާއި ބައްޕަ. -- ފޮޓޯ: އީޕީއޭ
ސޯޝަލް މީޑިއާގައި ވެސް ސޭވް ރަޔަން ހޭޝްޓެގް ބޭނުންކޮށްގެން މީހުން ދިޔައީ އުފާ ކުރަމުންނެވެ. އެހެންވެ، އޭގެ އިރުކޮޅެއް ފަހުން ރަޔަން މަރުވެފައިވާކަން ހާމަކުރުމާ އެކު އެންމެންނަށް ލިބުނީ ފުން ހިތާމައެކެވެ.
މޮރޮކޯ އާއި ދުނިޔޭގެ އެހެން ގައުމުތަކުގައި ވެސް ބައެއް މީހުން ރަޔަންގެ ހަނދާން އާ ކުރަމުންދާ އިރު، ސޯޝަލް މީޑިއާގައި ސޭވް ރަޔަން ހޭޝްޓެގް ވެސް މިހާރު ބޭނުން ކުރަމުން ދަނީ ޓްރިބިއުޓްގެ ގޮތުގަ އެވެ.
ބުރަ މަސައްކަތަށް ފަހު ރަޔަން ސަލާމަތް ނުކުރެވުނު އިރު، މީގެ ކުރިން 2019 ވަނަ އަހަރު ވެސް މިފަދަ ގޮތަކަށް ސްޕެއިންގައި އުމުރުން ދެ އަހަރުގެ ކުއްޖަކު ވަޅަކަށް ވެއްޓިގެން މަރުވި އެވެ.
