އިންޑިއާގެ މަޝްހޫރު ލަވަކިޔުންތެރިޔާ ލަތާ މަންގޭޝްކަރު މަރުވެއްޖެ އެވެ. އިންޑިއާގެ ހުރިހާ މަތީ ޝަރަފެއް ލިބިފައިވާ ލަތާ މަރުވިއިރު އޭނާގެ އުމުރަކީ 92 އަހަރެވެ.
ލަތާ މަންގޭޝްކަރު މީގެ ދުވަސްތަކެއް ކުރިން ހޮސްޕިޓަލަށް ގެންދިޔައީ ކޮވިޑަށް ޕޮޒިޓިވްވެގެންނެވެ. އޭގެފަހުން އޭނާގެ ހާލަތު ގޯސްވެ ވެންޓިލޭޓަރުގެ އެހީގައި ފަރުވާދިނެވެ.
ހާލު ތަންކޮޅެއް ރަނގަޅުވެ, ވެންޓިލޭޓަރު ނައްޓާލާފައިވަނިކޮށް އިތުރަށް ހާލު ގޯސްވީ އިއްޔެގެ ވަގުތެއްގަ އެވެ. އޭނާ މިއަދު ހެނދުނު މަރުވީ ވެންޓިލޭޓަރުގައި ފަރުވާދެމުންދަނިކޮށެވެ.
ލަތާ މަންގޭޝްކަރަކީ އިންޑިއާގައި އުފެދުނު އެންމެ ކުޅަދާނަ އަންހެން ލަވަކިޔުންތެރިޔާ އެވެ. އޭނާ ހުއްޓުމެއް ނެތި އިންޑިއާގެ ފިލްމްތަކަށް ލަވަކިޔައިދޭތާ ހަތްދިހަ އަހަރު ވަނީ ވެފަ އެވެ. އޭނާއަކީ ހުނަރުވެރި ލަވަކިޔުންތެރިޔާ އާޝާ ބޯޝްލޭގެ ދައްތަ އެވެ.
އިންޑިއާގެ ރަން އަޑުގެ ގޮތުގައި ފާހަގަކުރެވޭ ލަތާ މަރުވުމާއެކު އިންޑިއާގައި އަންނަނީ އެކަމާ ހިތާމަފާޅުކުރަމުންނެވެ.
