މީގެ ހަތަރު ދުވަސް ކުރިން މޮރޮކޯގައި 100 ފޫޓު ފުން ވަޅުގަނޑަކަށް ވެއްޓުނު ފަސް އަހަރުގެ ރަޔަންއާ ގާތަށް ރެސްކިއު ޓީމުން ޖެހިލައިފި އެވެ.
ރަޔަން ސަލާމަތް ކުރުމުގެ މަސައްކަތް މެދުކެނޑުމެއް ނެތި ކުރިއަށްދާ އިރު، ރެސްކިއު ޓީމުން ބުނީ އެ ކުއްޖާއާ މީޓަރެއްހާ ގާތުގައިވާ ޓަނަލަކާ ހަމައަށް ފޯރާފައިވާ ކަމަށެވެ.
އޮޕަރޭޝަން ކުރިއަށްދާ އިރު ބިންގަނޑު ކަނޑައިގެން ގޮސްފި ނަމަ އިތުރު ގޮންޖެހުންތައް ކުރިމަތިވުމުގެ ބިރު އެބަ އޮތެވެ. ރެސްކިއު ޓީމުގެ އޮފިޝަލަކު ބުނީ ރަޔަން ދިރިހުރިކަން ޔަގީންކަމާ އެކު ބުނަން ނޭނގޭ ކަމަށެވެ.
ރެސްކިއު ޓީމުގައި އެންމެ އިސްކޮށް އުޅޭ އަބްދުލް ހާދީ ތަމްރާނީ އޭއެފްޕީއަށް ބުނީ ކެމެރާއިން ފެންނަނީ ރަޔަން އެއް އަރިއަކަށް އޮށޯވެގެން އޮތް މަންޒަރު ކަމަށެވެ.
"މި ވަގުތު ކުއްޖާގެ ހާލަތާ ގުޅޭ ގޮތުން އެއްވެސް އެއްޗެއް ބުނާކަށް ނޭނގޭ. އަޅުގަނޑުމެންގެ ދުއާއަކީ އޭނާ ދިރިހުރުން،" މޮރޮކޯގެ ޓީވީއަކަށް ތަމްރާނީ ބުންޏެވެ.
ބުރާސްފަތު ދުވަހު ވަޅު ތެރެއަށް ކެމެރާއެއް ތިރިކޮށްގެން ނެގި މަންޒަރުތަކުން ފެނުނު ގޮތުގައި ރަޔަން ހުރީ ސަލާމަތުންނެވެ. ނަމަވެސް ބޮލަށް ކޮންމެވެސް ވަރެއްގެ ޒަހަމްތައް ލިބިފައި ހުއްޓެވެ.
ރެސްކިއު ޓީމުން ވަނީ އޮކްސިޖަން މާސްކާއި، ކާބޯތަކެތި އަދި ފެން ވަޅުގެ ތެރެއަށް ތިރިކޮށްފަ އެވެ. ނަމަވެސް ރަޔަންއަށް އެ ތަކެތީގެ ބޭނުން ހިފުނުކަމެއް ސާފެއް ނޫނެވެ.
ރަޔަންއަށް ބޭނުންވާ ސިއްހީ ފަރުދާ ދޭން ތައްޔާރަށް ތިބި މެޑިކަލް ޓީމެއް ވެސް އެ ސަރަހައްދުގައި ސްޓޭޝަންކޮށްފައިވެ އެވެ. އޭގެ އިތުރުން ހެލިކޮޕްޓަރެއް ވެސް އެ ތަނުގައި ވަނީ ތައްޔާރީ ހާލަތަށް ގެނެސްފަ އެވެ.
ރަޔަން ސަލާމަތް ކުރަން ރެސްކިއު ޓީމުން ވަނީ ވަޅުގެ ކައިރިން ބިމު އަޑިއަށް ކޮނެ، "ހޮރިޒޯންޓަލް"ކޮށް ވަޅާ ދިމާލަށް ކޮންނަން ފަށާފަ އެވެ.
ރަޔަންގެ ބައްޕަ ބުނީ ދަރިފުޅު ވަޅަން ވެއްޓުނީ، އޭނާ ވަޅު މަރާމާތު ކުރުމުގެ މަސައްކަތް ކުރަމުން ދަނިކޮށް ކަމަށެވެ. އޭނާ އާއި ރަޔަންގެ މަންމަ ތިބީ ކަންބޮޑުވެ ފުން ހިތާމައެއްގައި ކަމަށް ވެސް ބުންޏެވެ.
