ކޮމަންޑޫ ދާއިރާގެ ބައި އިލެކްޝަނުގެ މާލޭ ވޯޓު ފޮށި ބަހައްޓާފައި ހުރި އިސްކަންދަރު ސްކޫލް ކުރިމަތީގައި ހުރި ތަނެއްގައި އެމްޑީޕީން ކެމްޕެއިންކުރަމުންދާ ކަމަށް ބުނެ އިދިކޮޅު ޕީޕީއެމް/ޕީއެންސީގެ އެކްޓިވިސްޓުންތަކެއް ރުޅިވެރިކަން ފާޅުކުރަމުން އެބަ ދެ އެވެ.
އިސްކަންދަރުގެ ދޮރުމަތީގައި ރީތީ ފޮޓޯއާ ޖެހިގެން ފެހި ކުލަލާފައިވާ ގަރާޖެއް ފާޑު ތަނެއްގެ ތެރޭގައި އެމްޑީޕީގެ ބައެއް މަޖިލިސް މެމްބަރުންނާއި ދާއިރާތަކުގެ މެމްބަރުންނާއި އެކްޓިވިސްޓުން ހެނދުނުއްސުރެ ތިއްބެވެ. ފެންނަ ފެނުމަށް އެތަން އެ މީހުން ބޭނުންކުރަމުން ދިޔައީ ވޯޓުލާން އަންނަ މީހުންގެ ރަޖިސްޓްރީ ނެގުން ފަދަ އިދާރީ ކަންކަމަށެވެ. އެތަނުގައި ކެމްޕެއިނުގެ ހަރަކާތެއް ހިންގާތަނެއް ނުފެނެ އެވެ.
އެކަމަކު އެތާ ދޮށުގައި އެއްވެ ތިބި ޕީޕީއެމް/ ޕީއެންސީ އެކްޓިވިސްޓުން ދިޔައީ ވޯޓުލާން އަންނަ މީހުން އެތަނަށް ވައްދާ ފައިސާ ބަހާ ކަމަށް ތުހުމަތުކުރަމުންނެވެ. އަދި އެއީ ކެމްޕެއިން ޖަގަހައެއް ކަމަށާއި ވޯޓުލާ މަރުކަޒު ކައިރީ ކެމްޕެއިން ނުކުރެވޭނެ ކަމަށް ބުނެ އަޑުގަދަކުރަމުން ދިޔަ އެވެ. އެ ހިތްހަމަނުޖެހުންތަކުގެ ތެރޭގައި "އިންޑިއާ އައުޓް" އޭ ވެސް ގޮވި އެވެ.
އެތަނުގައި އިސްކޮށް ހުރި ޕީޕީއެމްގެ އެކްޓިވިސްޓަކު ވަނީ އެތަން ބަންދުކޮށްދޭން މަސައްކަތްކޮށްދިނުމަށް އެތަނުގައި ހުރި ފުލުހެއް ގާތު އާއި ނޫސްވެރިއެއް ގާތު އެދިފަ އެވެ. އަދި އެތަނުގައި ހުރި އިދިކޮޅުގެ އިސް ބޭފުޅެއް ގާތު ވެސް އެ ޝަކުވާ ކުރި އެވެ. އެކަމަކު އެ ބޭފުޅާގެ ފަރާތުން މާބޮޑު ސަމާލުކަމެއް ނުލިބުނެވެ. އޭނާ ވިދާޅުވީ ކެމްޕެއިންކޮށް ނިމިއްޖެ ކަމަށާއި މިއީ ހަމަޖެހިލައިގެން ތިބެންވީ ވަގުތު ކަމަށެވެ.
އެކަމަކު ވެސް އެކްޓިވިސްޓުން ހިތްހަމަނުޖެހި އެތާ ދޮށުގައި އެއްވެ ދޮރުގައި ޖަހައި ހެދި އެވެ. އެއާ އެކު އެތަނުގެ ދޮރު ހުޅުވި އެވެ. އެ ވަގުތު ދެ ޕާޓީގެ އެކްޓިވިސްޓުންގެ މެދުގައި ޒުވާބު ހިނގި އެވެ. އެ ޒުވާބު ހޫނުވެ ދެންމެ ދެންމެ ގަޔަށް އަތްލައިފާނެހެން ހީވި ދަނޑިވަޅު ވެސް ދިޔަ އެވެ. އަދި އެމްޑީޕީގެ އެކްޓިވިސްޓެއް ފަހަތުން ޕީޕީއެމް އެކްޓިވިސްޓުންތަކެއް އިންޒާރު ދެމުން ދިޔަ އެވެ. އެކަމަކު ހަމަނުޖެހުމެއް ނުހިނގަ އެވެ.
އެތަނުގައި ގިނައީ ޕީޕީއެމްގެ އަންހެން އެކްޓިވިސްޓުންނެވެ. އެ އެކްޓިވިސްޓުންގެ ރުޅިވެރިކަމާ އެކު ހަޅޭއްލަވައްމުން ދިޔައި އެ ސަރަހައްދުގައި ތިބި އެމްޑީޕީގެ ޒުވާން މެމްބަރުން ވަނީ އަތް ޖަހައި، އެ މީހުން ރުޅިއަރުވަން މަސައްކަތްކޮށްފަ އެވެ.
އެތަނަށް ފުލުހުންގެ ސީނިއާ އޮފިސަރަކާއި އާއްމު އޮފިސަރަކު ގޮސް ކޮންޓްރޯލް ކުރެވޭތޯ މަސައްކަތްކުރި އެވެ. ސީނިއާ އޮފިސަރު ވަނީ އެމްޑީޕީގެ އިސް މީހެއް ގާތު ވާހަކަތަކެއް ދައްކައިފަ އެވެ. ޖަވާބުގައި އޭނާ ބުނީ އެތަނުގައި ކުރަމުން ދިޔައީ އިދާރީ މަސައްކަތެއް ކަމަށާއި އެކަން ނުހުއްޓޭނެ ކަމަށެވެ. މިހާރު ވެސް ޕީޕީއެމްގެ އެކްޓިވިސްޓުން ގެންދަނީ އެތަނުގައި ތިބި މީހުން ނެރެ ތަން ބަންދުކުރަން ގޮވަމުންނެވެ.
މި އިންތިހާބުގައި އެމްޑީޕީގެ ފަރާތުން ވާދަ ކުރައްވަނީ މުހައްމަދު ރާޝީދު އެވެ. ޕީޕީއެމްގެ ފަރާތުން މޫސާ ފަތުހީ އާދަމް އާއި އެމްއެންޕީގެ އަބްދުލްހަންނާނު އިދުރީސް ވެސް މިއަދުގެ އިންތިހާބުގައި ވާދަ ކުރައްވާނެ އެވެ.
ކޮމަންޑޫ ދާއިރާގެ ބައި-އިލެކްޝަނެއް މިއަދު ބާއްވަނީ، ގިނަ އެ ގޮނޑި ފުރުއްވި މެމްބަރު ހުސެއިން ވަހީދު މިދިޔަ ޑިސެމްބަރު 14، 2021 ގައި އަވަހާރަވުމުންނެވެ. ހުސެއިން އަވަހާރަވީ ކެންސަރުގެ ބައްޔަކަށް ގިނަ ދުވަސްތަކެއްވަންދެން ފަރުވާ ކުރެއްވުމަށްފަހު އެވެ.
ކޮމަންޑޫ ދާއިރާގެ ދިރިއުޅޭ 4618 މީހުންގެ ތެރެއިން ވޯޓުލުމުގެ ހައްގު ލިބެނީ 3309 މީހުންނަށެވެ.
