ނިއު ދިއްލީ، އިންޑިއާ (ފެބްރުއަރީ 4) - އިންޑިއާގައި ކޮވިޑް ޖެހިގެން މަރުވި މީހުންގެ އަދަދު 500،000 އަށް އަރާފައިވާ ކަމަށް ރަސްމީ ތަފާސްހިސާބުން ދައްކައިފި އެވެ.
ފެޑެރަލް ހެލްތު މިނިސްޓްރީން ކޮންމެ ދުވަހަކު އާއްމު ކުރާ ތަފާސްހިސާބަށް ބަލާއިރު، ފާއިތުވި 24 ގަޑިއިރު ތެރޭގައި މަރުވި 1،072 މީހުންނާ އެކު ޖުމްލަ އަދަދު ވަނީ 500،055 އަށް އަރާފަ އެވެ.
ރިޕޯޓު ކުރި ކޮވިޑް ކޭސްތަކުގެ އަދަދު ވަނީ މިލިއަނަށް އަރާފަ އެވެ. އެމެރިކާއަށް ފަހު ދެ ވަނަ އަށް އެންމެ ގިނައިން ކޭސްތައް ރިޕޯޓުކޮށްފައި ވަނީ އިންޑިއާ އިންނެވެ.
ހަލުވިކަމާ އެކު ފެތުރޭ އޮމިކްރޯންގެ ސަބަބުން ފާއިތުވި މަސް ތެރޭގައި ކޭސްތައް އިތުރުވާން ފެށި އެވެ. ނަމަވެސް ތަފާސްހިސާބް ދައްކާ ގޮތުން މިހާރު އެ އަދަދު ވަނީ ދަށް ވާން ފަށާފަ އެވެ.
އޮމިކްރޯންގެ ސަބަބުން ގިނަ އަދަދެއްގެ މީހުން މަރުނުވާނެ ކަމަށް ތަޖުރިބާކާރުން ލަފާކުރި ނަމަވެސް ބައެއް ސްޓޭޓްތަކުގައި ފިޔަވަޅުތައް ހަރުކަށި ކުރި އެވެ. އެހެން ނަމަވެސް، މިހާރު ހުރިހާ ސްޓޭޓަކުން ވެސް ވަނީ ލުއި ދޭން ފަށާފަ އެވެ.
ވެރިރަށް ނިއު ދިއްލީ ހިމެނޭ ސަރަހައްދުގެ ހައި ސްކޫލްތަކާއި، ކޮލެޖްތަކާއި، ރެސްޓޯރެންޓްތަކާއި ޖިމްތައް އަންނަ ހަފްތާއިން ފެށިގެން ހުޅުވާނެ ކަމަށް ހުކުރު ދުވަހު އިއުލާނު ކުރި އެވެ.
