ގުވަހަޓި، އިންޑިއާ (ފެބްރުއަރީ 3) - އިންޑިއާ އާއި ޗައިނާއާ ދެމެދު ދެބަސްވުން އުފެދިފައި އޮންނަ ހިމަލަޔާ ފަރުބަދަ މަތީގެ ބޯޑަރު ކައިރިން ހައްޔަރު ކުރި އިންޑިއާ ޒުވާނަކަށް ޗައިނާ ސިފައިން އަނިޔާ ކުރި ކަމަށް އާއިލާއިން ތުހުމަތުކޮށްފި އެވެ.
މިރަމް ތެރޮން ނަމަކަށް ކިޔާ ޒުވާނާ ހައްޔަރު ކުރީ އިރު އުތުރު އަރޫނަޗަލް ޕްރަދޭޝް ސްޓޭޓުގައި ޝިކާރަ ކުރަން ނުކުމެ އުޅެނިކޮށެވެ. އޭނާގެ ބައްޕަ އޭއެފްޕީއަށް ބުނީ 19 އަހަރުގެ ދަރިފުޅު ނުވަ ދުވަސް ވަންދެން ހުރީ ޗައިނާ ސިފައިން ބަންދުކޮށްފައި ކަމަށެވެ.
އެ މުއްދަތުގައި އަނިޔާކޮށް، "އިލެކްޓްރިކް ޝޮކް" ޖައްސާފައިވާ ކަމަށް އޭނާ ތުހުމަތު ކުރި އެވެ. ދަރިފުޅުގެ އަތުގައި ބިޑި އަޅުވާފައި ހުރި ތަނުގެ ނިޝާން އަދިވެސް އެބަހުރި ކަމަށާއި ދަރިފުޅު ހުރީ ޝޮކުގައި ކަމަށް އަޕަންގް ތެރޮން ބުންޏެވެ.
ކަނު ބަނދެ، ފަހަތަށް ބިޑި އަޅުވައިގެން ހިނގަން ދަރިފުޅަށް މަޖުބޫރު ކުރުވި ކަމަށް ވެސް އޭނާ ބުންޏެވެ.
ފޮރިން އެފެއާޒް މިނިސްޓްރީގެ ތަރުޖަމާން އަރިންދަމް ބަގްޗީ ނޫސްވެރިންނަށް ވިދާޅުވީ މިރަމް ހައްޔަރު ކުރި މައްސަލަ ޗައިނާއަށް ހުށަހަޅާފައިވާ ކަމަށެވެ.
އަނިޔާ ކުރި ކަމަށް ބުނާ މައްސަލައިގައި އިންޑިއާ އަސްކަރިއްޔާއިން އަދި ވަކި އެއްޗެއް ނުބުނެ އެވެ. ނަމަވެސް، ޖެނުއަރީ 27 ވަނަ ދުވަހު ބަންދުން ދޫކޮށް، އިންޑިއާ އާ ހަވާލުކުރިކަން ވަނީ ކަށަވަރުކޮށްދީފަ އެވެ.
އިންޑިއާގެ އަސްކަރިއްޔާއިން މިދިޔަ ހަފްތާގައި ނެރުނު ބަޔާނުގައި ޗައިނާގެ ޕީޕަލްސް ލިބަރޭޝަން އާމީ (ޕީއެލްއޭ) އަށް ޝުކުރު އަދާކުރުމަށް ފަހު ބުނީ، "ޒުވާނާ ދޫކޮށްލުމުން ސުލްހަ އާއި ހަމަޖެހުން ކުރިއަރުވަން އިތުރު ފުރުސަތެއް ލިބިއްޖެ" ކަމަށެވެ.
