ރައްޔިތުންގެ މަޖިލީހުގެ މެމްބަރުން ހޮވަން 2019 ވަނަ އަހަރު ބޭއްވި އިންތިހާބުގައި ކޮމަންޑޫ ދާއިރާގެ ރައްޔިތުން ވޯޓުދިނީ ފިކުރަކަށް ކަމަށާއި އެ ވިސްނުން ބަދަލުވާން ޖެހޭ ސަބަބެއް ނެތް ކަމަށް ރައީސް އިބްރާހީމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގައި އެމްޑީޕީގެ ފަރާތުން ވާދަކުރައްވާ މުހައްމަދު ރާޝިދު (ރާޑޯ) ގެ ކެމްޕޭނަށް އެ ދާއިރާއަށް މިއަދު ފެއްޓެވި ދަތުރުފުޅުގައި ކޮމަންޑޫ ރައްޔިތުންނާ މުހާތަބުކުރައްވައި ރައީސް ވިދާޅުވީ, 2019 ވަނަ އަަހަރުގެ އިންތިހާބުގައި ކޮމަންޑޫ ދާއިރާގެ ރައްޔިތުން، އޭރު ނިންމި ނިންމުމަކީ ފަސް އަހަރަށް ނިންމި ނިންމުމެއް ކަމަށެވެ. އެ ނިންމުން ދަމަހައްޓަން ޖެހޭނެ ކަމަށް ވެސް އެމަނިކުފާނު ވިދާޅުވި އެވެ.
"އިލާހީ ގާނޫނާ އެއްގޮތަށް ކަންތައްތައް ނިމި [ކޮމަންޑޫ ދާއިރާގެ ކުރީގެ މެމްބަރު] ހުސައިން ވަހީދު އަަޅުގަނޑުމެންނާ ވަކިވެ އެ ދިޔައީ. އެހެން ނަމަވެސް ތިޔަ ބޭފުޅުން 2019 ވަނަ އަހަރު ރައްޔިތުން މަޖިލީހަށް އިންތިހާބުކުރީ ފިކުރެއް. އެ ފިކުރު އެބަ އޮތް. އެ ވިސްނުން އެބަ އޮތް. އެކަން ދަމަހައްޓަން ޖެހޭނެ،" ރައީސް ސޯލިހު ވިދާޅުވި އެވެ.
އެމަނިކުފާނު ވިދާޅުވީ ކޮމަންޑޫ ދާއިރާގެ ރައްޔިތުން އެ އިންތިހާބުގައި ނިންމި ނިންމުމަކީ ފަސް އަހަރު ދުވަހަށް ނިންމި ނިންމުމެއް ކަމަށާއި އެއީ ސަރުކާރަށް ތާއީދުކުރުމާއި އެކު ސަރުކާރުން ހިންގަން ނިންމާފައި ހުރި މަޝްރޫއުތަކަށް މަޖިލީހުގައި ބަސް އިއްވުން ކަމަށެވެ.
"އެކަން އެގޮތުގައި ބޭއްވުމަކީ މިދާއިރާގެ ތަރައްގީއަށް ޓަކައި އަޅުގަނޑުމެން ކުރަން ނިންމާފައި ހުރި ކަންތައްތައް އަވަސްވެ، ފުރިހަމަވެގެންދާނެ ކަމެއް،" ރައީސް ވިދާޅުވި އެވެ.
އެމަނިކުފާނު ވިދާޅުވިގޮތުގައި އެމްޑީޕީގެ ކެންޑިޑޭޓް ރާޝިދު ހުންނެވީ އެ ދާއިރާގެ ރައްޔިތުން މަޖިލީހުގެ އިންތިހާބުގައި އިންތިހާބުކުރި ފިކުރުގަ އެވެ. އޭނާ ހުންނެވީ ހަމަ އެ ވިސްނުމުގަައި އެ ފިކުރުގައި މަސައްކަތްކުރައްވަން ކަމަށް ވެސް އެމަނިކުފާނު ވިދާޅުވި އެވެ.
"އެހެންވީމާ ކޮމަންޑުއާއި ފޯކައިދުއާއި މަރޮށީގައި ތިއްބެވި ރައްޔިތުންގެ ވިސްނުން ބަދަލުވާން ޖެހޭ އެއްވެސް ސަބަބެއް ނެތް،" އެމަނިކުފާނު ވިދާޅުވި އެވެ.
ކޮމަންޑޫ ދާއިރާގެ ބައިއިލެކްޝަންގައި އެމްޑީޕީއަށް ކެމްޕޭންކުރައްވަން ރަައީސް އެދާއިރާއަށް ވަޑައިގެންނެވި މިއީ ދެވަނަ ފަހަރެވެ. އެމަނިކުފާނުގެ އަރިހުގައި މިފަހަރު، ރައްޔިތުންގެ މަޖިލީހުގެ އަދި އެމްޑީޕީގެ ވެސް ރައީސް މުހައްމަދު ނަޝީދު ވެސް ވަޑައިގެންނެވި އެވެ. ދެލީޑަރުން އެކުގައި ކޮމަންޑޫ ދާއިރާއަށް މީގެ ކުރިން ކުރައްވަން އުޅުއްވި ދަތުރުފުޅުގައި ރައީސަށް ވަޑައިނުގެންނެވުނީ ކޮވިޑްގެ އާލާސްކަންފުޅާ ހެދި އެވެ.
ކޮަމަންޑޫ ދާއިރާގެ ބައިއިލެކްޝަން އޮންނާނީ އަންނަ ހޮނިހިރު ދުވަހު އެވެ.
