މުމްބާއީ، އިންޑިއާ (ފެބްރުއަރީ 2) - އިންޑިއާގައި ކްރިޕްޓޯ ކަރަންސީގެ މުއާމަލާތް ކުރާ މީހަކު ރަހީނުކޮށް، 40 މިލިއަން ޑޮލަރުގެ އަގަށްވާ ބިޓްކޮއިން ހޯދަން މަސައްކަތް ކުރި ފުލުހަކު ހައްޔަރުކޮށްފި އެވެ.
ދިލިޕް ތުކަރަމް ހާންދާރޭއާ އެކު އިތުރު ބަޔަކު ވެސް ހައްޔަރު ކުރި އެވެ. އެ މީހުން ރަހީނު ކުރީ އުމުރުން 38 އަހަރުގެ ވިނޭ ނައިކް އެވެ. ޖެނުއަރީ 14 ވަނަ ދުވަހު އެކަން ހިންގުމަށް ފަހު، ޑިމާންޑު ކުރީ އޭނާގެ ރައްކާކޮށްފައި ހުރި ޑިޖިޓަލް ކަރަންސީ އެއްކޮށް ދިނުމަށެވެ.
އޭނާގެ އަތުގައި 40 މިލިއަން ޑޮލަރު ނުވަތަ ތިން ބިލިއަން ރުޕީޒްއަށް ވާ ވަރުގެ ޑިޖިޓަލް ފައިސާ ހުއްޓެވެ. އޭގެ އިތުރުން އޭނާ ރައްކާކޮށްފައި ހުރި 800،000 ރުޕީޒްގެ ނަގުދު ފައިސާ ވެސް ދޭން ޑިމާންޑް ކުރި އެވެ.
ރަހީނު ކުރުމަށް ފަހު ޖެހިގެން އައި ދުވަހު ނައިކް ދޫކޮށްލީ، ފުލުހުން ފާރަލާކަން ފަޅާ އެރުމުންނެވެ. ރަހީނު ކުރުމުގައި ބައިވެރިވި އެންމެން ދޫކޮށްލީ ފުލުހުންގެ ހިންގި އޮޕަރޭޝަނެއްގައި އަންގާރަ ދުވަހު އެވެ.
"އަޅުގަނޑުމެން ހައްޔަރު ކުރީ އަށް މީހުން. އޭގެ ތެރޭގައި މިކަން ރޭވުމުގައި އުޅުނު ފުލުހުންގެ ކޮންސްޓަބަލްއެއް ވެސް ހިމެނޭ،" ފުލުހުންގެ އިސް އޮފިޝަލަކު އޭއެފްޕީއަށް ބުންޏެވެ.
ކްރިޕްޓޯ ކަރަންސީގެ މާކެޓު އިންޑިއާގައި ފުޅާވެ، އެތައް މިލިއަން ބަޔަކު އޭގެ މުއާމަލާތް ކުރި ނަމަވެސް އެކަމާ ގުޅޭ ގަވާއިދުތަކެއް ނުހުރެ އެވެ.
ގިނަ އަދަދެއްފެ ފޭކު މުއާމަލާތްތަކެއް ކުރަން ފެށުމުން، 2018 ވަނަ އަހަރު ކްރިޕްޓޯ ކަރަންސީ މަނާ ކުރި ނަމަވެސް، މީގެ ދެ އަހަރު ކުރިން ސުޕްރީމް ކޯޓުން ވަނީ އެ ނިންމުން އުވާލާފަ އެވެ.
މި ހަފްތާގައި އިންޑިއާ ސަރުކާރުން ބުނީ ވާޗުއަލް ފައިސާއިން ހޯދާ ފައިސާއިން 30 ޕަސެންޓުގެ ޓެކްސް ނަގަން ނިންމާފައިވާ ކަމަށާއި މަރުކަޒީ ބޭންކު މެދުވެރިކޮށް ރަސްމީ "ޑިޖިޓަލް ރުޕީޒް" ވެސް ތައާރަފް ކުރާނެ ކަމަށެވެ.
