ލަގްޒެމްބޯގް (ފެބްރުއަރީ 2) - ކޮޕީ ކުރި ކަމުގެ ތުހުމަތު ފެންމަތިވުމާ އެކު ލަގްޒެމްބޯގްގެ ބޮޑު ވަޒީރު ޒާވިއާ ބެޓެލް 1999 ވަނަ އަހަރު ހާސިލްކުރި ޑިގްރީ ސެޓްފިކެޓް ދޫކޮށްލަން ނިންމަވައިފި އެވެ.
ބެޓެލް ވިދާޅުވީ ފްރާންސްގެ ޔުނިވާސިޓީ އޮފް ލޮރެއިންއިން އެމަނިކުފާނަށް އެރުވި މާސްޓާޒް ފެންވަރުގެ ޑިގްރީ އަނބުރާ ގެންދިޔުމަށް އެދިވަޑައިގެންފައި ވާނެ ކަމަށެވެ.
"ޕްލެޖިއެރިޒަމް" ނުވަތަ އެހެން މީހުންގެ ލިޔުންތަކާއި ހިޔާލުތައް އަމިއްލަ އެއްޗެއްގެ ގޮތުގައި ދައްކާފައިވާ ކަމަށް ކުރި ތުހުމަތުތަކަށް ބެޓެލް އެއްބަސްވެވަޑައެއް ނުގަންނަވަ އެވެ.
އެ ތުހުމަތުތައް ފެންމަތި ކުރީ މިދިޔަ އޮކްޓޯބަރު މަހު ރިޕޯޓާ ނޫހުންނެވެ. އެ ނޫހުން ބުނީ 1998 ވަނަ އަހަރު ބެޓެލް ލިޔުއްވި ތީސީސްގެ ބޮޑު ބަޔެއް ވަނީ "ޕްލެޖިއަރައިޒް" ކޮށްފައި ކަމަށެވެ.
ބެޓެލްގެ މާސްޓާޒް ޑިގްރީގެ ތީސީސް ލިޔުއްވީ ޔޫރަޕްގެ އިންތިހާބުތަކުގައި ވޯޓުލުމަށް ގެންނަ އިސްލާހުތަކާ ގުޅޭ ގޮތުންނެވެ.
އެކަން ނޫހުން ރިޕޯޓު ކުރުމާ އެކު ބެޓެލް ވިދާޅުވީ އަހަރުތަކެއް ކުރިން ހިނގި ކަމެއް ސާފުކޮށް ހަނދާން ނެތް ކަމަށާއި އޭރު ތަފާތުކޮށް ކަން ކުރެވުނު ނަމައޭ ހިތަށް އަރާ ކަމަށެވެ.
ގާނޫނީ ވަކީލް ކަމުގެ ތަމްރީން ލިބިވަޑައިގެންފައިވާ އުމުރުން 48 އަހަރުގެ ބެޓެލްއަށް ޔުނިވާސިޓީ އޮފް ލޮރެއިންއިން އިތުރު މާސްޓާޒް ޑިގްރީ ސެޓްފިކެޓެއް ވެސް އަރުވާފައިވެ އެވެ.
ޔުނިވާސިޓީން ނެރުނު ބަޔާނެއްގައި ބުނީ ޑިގްރީ ތީސީސް އަލުން ލިޔުއްވުމަށް ބެޓެލްއަށް އަންގަވާފައިވާ ކަމަށާއި އެހެން ލިޔުންތަކަށް ރެފެރެންސް ދިނުމަށް ޔުނިވާސިޓީގެ މިހާރު ގައިޑްލައިން އެޑޮޕްޓް ކުރަން އަންގަވާފައި ވާނެ ކަމަށެވެ.
