މުމްބާއީ، އިންޑިއާ (ފެބްރުއަރީ 1) - އިންޑިއާގެ ދައުލަތުން އިސް ނަގައިގެން "ޑިޖިޓަލް ރުޕީޒް" ތައާރަފުކޮށް، ވާޗުއަލް ފައިސާއިން ހޯދާ ފައިދާއިން 30 ޕަސެންޓުގެ ޓެކްސް ނަގަން ހުށަހަޅައިފި އެވެ.
އެ ހުށަހެޅުމަކީ މިހާރު އެންމެ ބާރަށް ކުރިއަރަމުން އަންނަ އިންޑިއާގެ ކްރިޕްޓޯ ކަރަންސީ މާކެޓަށް ލިބުނު ދެރައެކެވެ. އިންޑިއާގެ ކްރިޕްޓޯ ކަރަންސީ މާކެޓަށް މިހާތަނަށް އެއްވެސް ގަވާއިދެއް ނެތެވެ.
އިންޑިއާގެ އިތުރުން އެހެން ބޮޑެތި ގައުމުތަކުން ވެސް ދަނީ ކްރިޕްޓޯ ކަރަންސީގެ މާކެޓް ގަވާއިދަށް ފެއްތުމުގެ މަސައްކަތް ކުރަމުންނެވެ. ޗައިނާއިން މިދިޔަ ސެޕްޓެމްބަރު މަހު ވަނީ ކްރިޕްޓޯ ކަރަންސީގެ ހުރިހާ މުއާމަލާތެއް މަނާކޮށްފަ އެވެ.
"ވާޗުއަލް ޑިޖިޓަލް އެސެޓް ބޭނުންކޮށްގެން ހިންގާ މުއާމަލާތްތައް ވަނީ އިންތިހާއަށް އިތުރުވެފައި،" ފިނޭންސް މިނިސްޓަރު ނިރްމަލާ ސިތަރަމަން އަންގާރަ ދުވަހު ޕާލިމެންޓުގައި ވިދާޅުވި އެވެ.
އެކަމަނާ ވިދާޅުވީ އެ މާކެޓު ފުޅާވަމުން ދާތީ ފުރިހަމަ ޓެކްސްގެ އޮނިގަނޑެއް އޮތުން މަޖުބޫރު ކަމަށެވެ. ކްރިޕްޓޯ ކަރަންސީ އާއި އެހެން ޑިޖިޓަލް އެސެޓްތަކުގެ މުއާމަލާތުން ލިބޭ ފައިދާއިން 30 ޕަސެންޓުގެ ޓެކްސް ނަގަން ސަރުކާރުން ހުށަހެޅި އެވެ.
އޭގެ އިތުރުން ބްލޮކްޗެއިން ޓެކްނޮލޮޖީގެ މައްޗަށް ބިނާކޮށް މާޗް 2023 ގެ ކުރިން "ޑިޖިޓަލް ރުޕީޒް" މަރުކަޒީ ބޭންކުން ތައާރަފް ކުރާނެ ކަމަށް ފިނޭންސް މިނިސްޓަރު ވިދާޅުވި އެވެ.
"މަރުކަޒީ ބޭންކްގެ ޑިޖިޓަލް ފައިސާ ތައާރަފް ކުރުމުން ޑިޖިޓަލް އިގްތިސާދު އިތުރަށް ކުރިއަރާނެ. ޑިޖިޓަލް ފައިސާއާ އެކު މިހާރަށް ވުރެ ހަރަދު ކުޑަކޮށް އަދި ފުރިހަމަކޮށް ފައިސާ މެނޭޖް ކުރުމުގެ ނިޒާމެއް ވެސް ބިނާކުރެވޭނެ،" ނިރްމަލާ ވިދާޅުވި އެވެ.
މީގެ 10 އަހަރު ކުރިން އިންޑިއާގެ މާކެޓަށް ތައާރަފުވި ކްރިޕްޓީ ކަރަންސީއާ މެދު ކަމާ ބެހޭ އިދާރާތަކުން ކަންބޮޑުވެ އެވެ. އެގޮތުން ވާޗުއަލް ކަރަންސީ ބޭނުންކޮށް، ވަގު މުއާމަލާތްތައް އިތުރުވުމުން، 2018 ވަނަ އަހަރު މަރުކަޒީ ބޭންކުން ކްރިޕްޓީ ކަރަންސީ މަނާކުރި އެވެ.
ނަމަވެސް ދެ އަހަރު ފަހުން ސުޕްރީމް ކޯޓުން އެ ނިންމުން އުވާލި އެވެ. އެއާއެކު އަނެއްކާވެސް ޑިޖިޓަލް މާކެޓް ވަރަށް ބޮޑަށް ފުޅާވެ، ޖޫން 2021 އާ ހަމައަށް 650 ޕަސެންޓުގެ ކުރިއެރުމެއް ލިބުނެވެ.
މިދިޔަ އަހަރު ބޮޑު ވަޒީރު ނަރެންދްރަ މޯދީ ވިދާޅުވީ ބިޓްކޮއިން އިން ޒުވާން ޖީލަށް ނުރައްކާ އެބަ އޮތް ކަމަށާއި "ނުބައި މީހަކަށް" އެ ލިބިއްޖެ ނަމަ "ޒުވާނުން ހަލާކުވެދާނެ" ކަމަށެވެ.
އޭގެ ފަހުން ސަރުކާރުން ވިސްނީ "ހުރިހާ ޕްރައިވެޓް ކްރިޕްޓޯ ކަރަންސީ" މަނާ ކުރުމަށެވެ. ނަމަވެސް އެކަން ތަންފީޒުކޮށްފައެއް ނުވެ އެވެ.
އަންގާރަ ދުވަހު ޕާލިމެންޓަށް ހުށަހެޅި ދައުލަތުގެ ބަޖެޓުގައިވާ ގޮތުން އިންފްރާސްޓްރަކްޗާއަށް ކުރާ ހޭދަ އިތުރު ކުރާނެ އެވެ. އެގޮތުން މަގުތަކާއި، ރޭލުތަކާއި، ބޯހިޔާވަހިކަމާއި، ހަކަތަ އަދި ދިފާއީ ކަންކަމަށް ހަރަދު ކުރަން ހިމަނާފައިވެ އެވެ.
