އާ ރަންވޭ ޓެކްސީވޭ އެއްގެ ގޮތުގައި ބޭނުންކުރަން ފެށުމާއެކު އެންމެ ބާރުބޮޑު ދުވަސްވަރު ވެލާނާ އިންޓަނޭޝަނަލް އެއާޕޯޓް (ވީއައިއޭ) އަށް ފްލައިޓް ޖެއްސުމުގައި ދިމާވާ ދަތިތަކަށް ބޮޑު ހައްލެއް ލިބިގެން ގޮސްފި އެވެ.
ރާއްްޖެއަށް ޝެޑިއުލް ދަތުރުތައް ކުރާ އެއާލައިންތަކާއި ޗާޓަރު ދަތުރުކުރާ އެއާލައިންތައް ހިމެނޭހެން 33 އެއާލައިނަކުން އަންނަނީ ވީއައިއޭ އަށް ފްލައިޓް އޮޕަރޭޓް ކުރަމުންނެވެ. މި އެއާލައިންތަކާއި ރާއްޖޭގެ ޑޮމެސްޓިކް އެއާލައިންތަކުން ވެސް ބޭނުންކުރަނީ އެންމެ ފުރަތަމަ ގާއިމްކުރި ރަންވޭ އެވެ.
އެއާޕޯޓަށް އެންމެ ބާރުބޮޑުވާ ވަގުތު އެއް ގަޑިއިރަށް ވުރެ ވެސް ގިނަ ވަގުތު "ހޯލްޑިން ޕެޓާން" އެއްގައި ލޭންޑް ކުރުމުގެ ހުއްދަ ލިބުމާ ހަމަޔަށް ފްލައިޓްތައް މަޑުކުރަން ޖެހިފައި އެބަ ހުއްޓެވެ.
އާ ރަންވޭ ޓެކްސީވޭ އަކަށް ބަދަލުކުރުމުން ގަޑިއަކު ރަންވޭ އިން ހިދުމަތް ދެވޭ އިންޓަނޭޝަނަލް ފްލައިޓުތަކުގެ އަދަދު އަށް ފްލައިޓުން 16 ފްލައިޓަށް އިތުރުވާނެ ކަމަށް ވީއައިއޭ ހިންގާ އެމްއޭސީއެލްގެ ކޯޕަރޭޓް ކޮމިއުނިކޭޝަންސް މެނޭޖަރު ޝަމްއާން ޝާކިރު މި ނޫހަށް ވިދާޅުވި އެވެ.
"ބޮޑު ބޯޓެއް ޖައްސައިފިއްޔާ ރަންވޭ ކްލިއާ ކުރަން ކުރިން އެބަ ނަގާ 10 މިނިޓް، މިހާރު ނަގާނީ ދެ މިނިޓް،" ފްލައިޓްތައް ފުރުމާއި ޖެއްސުމުގެ ވަގުތަށް އައި ބަދަލު ހާމަކުރަމުން ޝަމްއާން ވިދާޅުވި އެވެ.
އެމްއޭސީއެލް އިން ދެކޭ ގޮތުގައި ރަން އިން ޖާގަ ނުލިބިގެން ބޯޓު ނުޖެއްސި އޮތުމާއި ޖާގަ ނުލިބިގެން ނުފުރި އޮތުމުގެ މައްސަލައަށް މިއަދު ގެނައި ބަދަލާއެކު ހައްލެއް ލިބިގެންދާނެ އެވެ.
މިހާރު ބޭނުންކުރާ ސީޕްލޭން ޓާމިނަލް އާ ރަންވޭ ކައިރީގައި ހުރުމުން، ފްލައިޓް ޖެއްސުން އެންމެ ރައްކާތެރި ކަމަކަށް ނުވާތީ އެ ރަންވޭ ބޭނުންކުރަން ނުފަށަ އެވެ. ވީއައިއޭ ގައި އަލަށް ގާއިމްކުރި ސީޕްލޭން ޓާމިނަލަށް ހިދުމަތްތައް ބަދަލުކޮށް ކުރިޔަށް އޮތް އެޕްރީލް މަހުގެ ތެރޭ އެތަން ބޭނުންކުރަން އަންނަނީ ތައްޔާރު ވަމުންނެވެ.
ދިގުމިނުގައި 3،400 މީޓަރު ހުންނަ އާ ރަންވޭ ހުޅުވީ ސެޕްޓެމްބަރު 5، 2018 ގަ އެވެ.
