މުމްބާއީ، އިންޑިއާ (ޖެނުއަރީ 31) - މި އަހަރު އިގްތިސާދީ ގޮތުން އެންމެ ބޮޑު ކުރިއެރުމެއް ލިބޭނެ ގައުމަކީ އިންޑިއާ ކަމަށް ލަފާކޮށްފި އެވެ.
ކޮވިޑްގެ ބަލިމަޑުކަމާ ހެދި އޭޝިއާގެ ތިން ވަނަ އަށް އެންމެ ބޮޑު އިގްތިސާދު ގާތްގަނޑަކަށް އެއްކޮށް ހުއްޓުނެވެ. އިންޑިއާ ލޮކްޑައުން ކުރުމުގެ ސަބަބުން އުފެއްދުންތެރިކަމާއި އާއްމުންގެ ހަރަދު ކުރާ މިންވަރު ވަރަށް ބޮޑަށް ވެއްޓުނެވެ. އެއީ 1947 ވަނަ އަހަރު އެ ގައުމަށް މިނިވަންކަން ލިބުނު ފަހުން ނުލިބޭ ވަރުގެ ގެއްލުމެކެވެ.
ނަމަވެސް ބަލިމަޑުކަމުގެ ކުރިން އިގްތިސާދު އޮތް ހާލަތަށް މިދިޔަ އަހަރު އަލުން އަނބުރާ ދިޔަ އެވެ. އެކަން ހާސިލް ކުރީ މިދިޔަ މާޗް މަހު ޑެލްޓާ ވޭރިއެންޓް ފެތުރި ހޮސްޕިޓަލްތައް ހުއްޓުމަކަށް އައިސްފައި އޮއްވަ އެވެ. އަންދާޒާ ކުރެވޭ ގޮތުގައި މާޗް 2021 އިން މާޗް 2022 އަށް 9.2 ޕަސެންޓުގެ އިގްތިސާދީ ކުރިއެރުމެއް އަންނާނެ އެވެ.
ނަމަވެސް ކުރިއަށް އޮތް މާލީ އަހަރު އިގްތިސާދީ ކުރިއެރުން މަޑުޖެހޭނެ ކަމަށް ލަފާކޮށްފައިވެ އެވެ. އިންޑިއާ ސަރުކާރުން ހޯމަ ދުވަހު ޕާލިމެންޓަށް ހުށަހެޅި އަހަރީ އިގްތިސާދީ ސާވޭގައިވާ ގޮތުން މި ފެށޭ މާލީ އަހަރު އިގްތިސާދީ ކުރިއެރުން ހުންނާނީ 8.0-8.5 ޕަސެންޓުގަ އެވެ.
އިންޑިއާ ސަރުކާރުން ލަފާކޮށްފައިވާ ކުރިއެރުމަކީ އެހެން ބޮޑެތި އިގްތިސާދުތައް ކުރިއަރާނެ ކަމަށް އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ލަފާކޮށްފައިވާ މިންވަރަށް ވުރެ ބޮޑެވެ. އައިއެމްއެފްއިން އަންދާޒާ ކުރަނީ ޗައިނާއަށް ލިބޭނީ 4.8 ޕަސެންޓްގެ ކުރިއެރުމެއް ކަމަށެވެ.
އޮމިކްރޯން ވޭރިއެންޓާ ހެދި ދުނިޔޭގެ އިގްތިސާދީ ކުރިއެރުން މަޑުޖެހޭނެ ކަމަށް މިދިޔަ ހަފްތާގައި އައިއެމްއެފްއިން އަންދާޒާ ކުރި އެވެ. ނަމަވެސް އައިއެމްއެފް އިން ލަފާކުރަނީ 2022 ވަނަ އަހަރު އިންޑިއާގެ އިގްތިސާދަށް ނުވަ ޕަސެންޓުގެ ކުރިއެރުމެއް އަންނާނެ ކަމަށެވެ.
އިންޑިއާގެ އިގްތިސާދަށް ބޮޑު ކުރިއެރުމެއް އަންނާނެ ކަމަށް ސަރުކާރުން ލަފާކުރި ނަމަވެސް، އެނެލިސްޓުން ބުނީ އެ އަންދާޒާއަކީ "މާ ބޮޑަށް ހަގީގާތާ ދުރު" އަންދާޒާއެއް ކަމަށެވެ.
"އެ ވަނީ ބައެއް ކަންކަން ވާނީ މިހެންނޭ ބުނެ ނިންމާލާފައި. ކޮވިޑްގެ ހަތަރު ވަނަ ރާޅެއް ނާންނާނެ ކަމަށް ނިންމާފައި. ސާފު ނުކުރާ ތެލުގެ އަގު ހުންނާނީ 70-75 ރުޕީޒްއަށް ކަމަށް ބުނެފައި. މިއީ ހުސް ބަހުސް ކުރެވޭނެ ކަންކަން،" ބޭންކް އޮފް ބަރޯޑާގެ ޗީފް އިކޮނޮމިސްޓް މަދަން ސަބްނަވީސް އޭއެފްޕީއަށް ވިދާޅުވި އެވެ.
އިގްތިސާދާ ގުޅޭ އަހަރީ ސާވޭ އާއްމުކޮށްފައިވާ އިރު، މި ފެށޭ މާލީ އަހަރަށް ލަފާކުރާ ދައުލަތުގެ ބަޖެޓް އަންގާރަ ދުވަހު ޕާލިމެންޓަށް ހުށަހަޅާނެ އެވެ.
