ރިސެސްގެ މުއްދަތަށްފަހު ސުޕްރީމް ކޯޓުގެ މަސައްކަތް ފެށިތާ މަހެއް ވާން ދާއިރު، އަދިވެސް އެ ކޯޓަށް ހުށަހެޅިފައިވާ އެއްވެސް މައްސަލައެއްގެ އަޑުއެހުމެއް ނުބޭއްވޭ ކަމަށް ބުނެފި އެވެ.
އެއްމަހުގެ ރިސެސްއަކަށްފަހު އެންމެ މަތީ ކޯޓުގެ މަސައްކަތްތައް ފެށީ މިމަހުގެ ތިންވަނަ ދުވަހު އެވެ. ނަމަވެސް މިހާތަނަށް އެ ކޯޓުގައި ތާވަލްކުރެވިފައި ވަނީ އެންމެ މައްސަލައެކެވެ. އެއީ 2012 ވަނަ އަހަރުގެ ތެރޭގައި ތޫނު އެއްޗަކުން ހަމަލާދީ މާލޭގައި ބިދޭސީއަކު މަރާލި މައްސަލާގައި ދައުވާ ލިބޭ ކަމަރުލް އިސްލާމް ފަރާތުން އެކޯޓުގައި އިސްތިއުނާފް ކުރި މައްސަލަ އެކެވެ.
ނަމަވެސް އެ މައްސަލައިގެ އަޑުއެހުން ވެސް އެހެން ދުވަހަކަށް ފަސްކޮށްފައިވާ ކަމަށް ސުޕްރިމް ކޯޓުގެ މީޑީޔާ އޮފިޝަލް "އަދަދު"އަށް ވިދާޅުވި އެވެ.
"އިއްޔެގެ އަޑުއެހުން ވަނީ ޕޯސްޕޯން ކޮށްފައި (އެހެން ދުވަހަކަށް ފަސްކޮށްފައި)، އަޑުއެހުންތައް ތާވަލް ކުރެވުމުން ސައިޓުން ފެންނާނެ. އަޑުއެހުމެއް ނުބޭއްވުނަސް ބެކްގްރައުންޑްގައި (ކޯޓުގެ) މަސައްކަތްތައް ކުރިއަށް އެބަދޭ،" އޮފިޝަލް ވިދާޅުވި އެވެ.
އާންމުކޮށް ހިނގާ ހަފްތާއާއި ކުރިއަށް އޮތް ހަފްތާއަށް ތާވަލްކުރެވިފައިވާ އަޑުއެހުންތައް ސުޕްރީމް ކޯޓުގެ ވެބްސައިޓުން ފެންނަން ހުރެ އެވެ. ނަމަވެސް ރިސެސްގެ މުއްދަތަށްފަހު އިއްޔެ ހެނދުނު 11:00 އަށް ތާވަލްކުރެވުނު މަރުގެ މައްސަލައިގެ އިތުރުން އެއްވެސް އަޑުއެހުމެއް ތާވަލްކުރެވިފައިވާ ކަމަކަށް އެ ކޯޓުގެ ރަސްމީ ވެބްސައިޓުން ނުދައްކަ އެވެ.
ރިސެސްގެ މުއްދަތުގެ ތެރޭގައި، ގާނޫނުއަސާސީ ނުވަތަ ގާނޫނެއްގެ ދަށުން ވަކި ކަމެއް ވަކި މުއްދަތެއްގެ ތެރޭގައި ނިންމަންޖެހޭ ކަމަށް ބަޔާންކޮށްފައިވާ ހާލަތްތައް ފިޔަވައި ޝަރީއަތުގެ އެއްވެސް އަޑުއެހުމެއް ނޯންނާނެ އެވެ.
ނިމުނު އަހަރު ސުޕްރީމް ކޯޓުގެ ރިސެސްއާ ހަމައަށް އެކޯޓުން 116 މައްސަލަ ނިންމާފައިވާކަމަށް އެ ކޯޓުގެ ރަސްމީ ވެބްސައިޓުން ދައްކަ އެވެ. 2019 ވަނަ އަހަރު ސުޕްރީމް ކޯޓަށް އައު ފަނޑިޔާރުން އައްޔަނުކުރެެވުނު ފަހުން އެ ކޯޓުގެ އަޑުއެހުންތައް ޔޫޓިއުބް އަދި ޓުވީޓާ މެދުވެރިކޮށް ލައިވްކުރެ އެވެ.
ކޯޓުތަކުގެ ގާނޫނުގައި ބުނެފައިވާ ގޮތުގައި ކޮންމެ އަހަރެއްގެ ނޮވެންބަރު މަހުގެ އެންމެ ފަހު ރަސްމީ މަސައްކަތު ދުވަހުން ފެށިގެން، ޖެހިގެން އަންނަ އަހަރުގެ ޖަނަވަރީ މަހުގެ އެންމެ ފުރަތަމަ ރަސްމީ މަސައްކަތު ދުވަހާ ހަމައަށް ސުޕްރީމް ކޯޓު އޮންނާނީ ރިސެސްގަ އެވެ.
ނަމަވެސް އެ މުއްދަތަށްފަހު މަހެއްވާން ދާއިރުވެސް، އެ ކޯޓަށް ހުށަހެޅިފައިވާ މައްސަލަތަކުގެ ޝަރީއަތް ނުހިނގާތީ ބައެއް ވަކީލުން ދަނީ ކަންބޮޑުވުން ފާޅުކުރަމުންނެވެ.
