ރާއްޖޭގައި ފުރަތަމަ ފަހަރަށް އެއާ ޓްރެފިކް ކޮންޓްރޯލަރުން ތަމްރީނުކުރުމުގެ މަސައްކަތް މިއަދު ފަށައިފި އެވެ.
އެމްއޭސީއެލުން ބުނީ މީގެ ކުރިން އެތައް މިލިޔަން ރުފިޔާއެއް ހަރަދުކޮށްގެން ރާއްޖޭން ބޭރަށް މީހުން ފޮނުވައިގެން ހަދާ އެ ތަމްރީނުތައް މިއަދު ރާއްޖޭގައި ފެށީ މެލޭޝިއާގެ މާހިރެއްގެ އެހީގައި ކަމަށެވެ.
އެމްއޭސީއެލްގެ ކޮމިއުނިކޭޝަން މެނޭޖަރު ޝަމްއާން ޝާކިރު "އަދަދު"އަށް ވިދާޅުވީ އެއާ ޓްރެފިކް ކޮންޓްރޯލަރުން ތަމްރީނުކުރަން އެކުންފުނިން މިއަދު ފެށި ޕްރޮގްރާމަކީ މޯލްޑިވްސް ސިވިލް އޭވިއޭޝަން އޮތޯރިޓީއާއި އައިކާއޯއިން ވެސް ބަލައިގެންފައިވާ ޕްރޮގްރާމެއް ކަމަށެވެ. މިއަދު ފެށި ތަމްރީނުގައި ބައިވެރިވެރިވީ މިހާރުވެސް ވަޒީފާގައި ތިބި އަށް މީހެކެވެ.
އެކަމަކު ކުރިއަށް އޮތް ތަނުގައި ގާބިލުކަން އިތުރުކޮށް، އިތުރު މީހުން ތަމްރީނުކުރުމުގެ މަސައްކަތް ވެސް އެކުންފުނިން ކުރިއަށް ގެންދާނެ ކަމަށް އޭނާ ވިދާޅުވި އެވެ.
"މީގެ ކުރިން މި ތަމްރީނުތަކަކީ ވަރަށް ހަރަދުބޮޑުކޮށް، ރާއްޖޭން ބޭރަށް މުވައްޒަފުން ފޮނުވައިގެން ކުރަން ޖެހޭ ކަމެއް،" އޭނާ ވިދާޅުވި އެވެ.
އެއާ ޓްރެފިކް ކޮންޓްރޯލަރުން ތަމްރީނުކުރަން އެމްްއޭސީއެލް އިން ކުރަމުން އަންނަ މަސައްކަތުގެ ދަށުން ރާވާފައިވާ ޓަވަކޮންޓްރޯލް ތަމްރީނާއި އާ ރަންވޭއަށް އަހުލުވެރިވުމުގެ ތަމްރީނު، ރާއްޖޭން ބޭރުގައި ކުރިއަށް ގެންދާ ނަމަ ހަ މިލިޔަނަށް ވުރެ ގިނަ ރުފިޔާ އެކަމަށް ހަރަދުވާނެ ކަމަށް ވެސް ޝަމްއާން ވިދާޅުވި އެވެ.
އެއީ 22 މުވައްޒަފުން ތަމްރީނުކުރުމަށެވެ.
" މި ދެ ތަމްރީނު ރާއްޖޭން ބޭރުގައި ކުރިއަށް ގެންދާ ނަމަ އެއީ 6.9 މިލިޔަން ރުފިޔާ،" އޭނާ ވިދާޅުވި އެވެ.
ތަމްރީނުތައް ރާއްޖޭގައި ކުރިއަށް ގެންދާ ނަމަ ހިނގާނެ ހަރަދަކީ ހަމަ އެކަނި އިންސްޓްރަކްޓަރުންނަށް ދޭން ޖެހޭ އުޖޫރައަަށް ހިނގާ ހަރަދެވެ. އެއާ ޓްރެފިކް ކޮންޓްރޯލަރުން ތަމްރީނުކުރުމަށް ބޭނުންވާ ސިމިއުލޭޓާ އެމްއޭސީއެލުން ގާއިމްކުރީ ހަތަރު މިލިޔަން ރުފިޔާ ހަރަދުކޮށްގެންނެވެ.
އެ ސިމިއުލޭޓާ ގާއިމްކޮށް، ތަމްރީނުކުރުމުގެ ގާބިލުކަން ހޯދީ އެމްއޭސީއެލް އިން އަބަދުވެސް މުވައްޒަފުން ތަމްރީނުކުރުމާއި ތާޒާކުރުމުގެ މަސައްކަތް ކުރަން ޖެހޭނެތީ އެވެ.
