ނިއު ދިއްލީ، އިންޑިއާ (ޖެނުއަރީ 30) - އިންޑިއާގެ ވެރިރަށް ނިއު ދިއްލީއަށް އާދަޔާ ހިލާފަށް ފިނި ގަދަވެ، ވަންނާނެ ގެދޮރެއް ނެތި މަގުމަތީގައި ދިރިއުޅޭ މީހުންގެ ތެރެއިން ބައެއް މީހުން މަރުވެއްޖެ އެވެ.
ގާތްގަނޑަކަށް 20 މިލިއަން މީހުން ދިރިއުޅޭ މެގަސިޓީގައި އަހަރުގެ އެކި ދުވަސްވަރު އެކި ކަހަލަ މޫސުމީ އަސަރުތައް ކުރެ އެވެ. އެގޮތުން އާދަޔާ ހިލާފަށް ހޫނު ގަދަވުމާއި ކުއްލިއަކަށް ބޯކޮށް ވާރޭ ވެހުމާއި ވައި ތަގައްޔަރުވުމުގެ މައްސަލަ ފާހަގަކުރެވެ އެވެ.
މި ޖެނުއަރީ މަހަކީ ފާއިތުވި 10 އަހަރުގެ ތެރޭގައި ރެކޯޑް ކުރި އެންމެ ފިނި ގަދަ ޖެނުއަރީ މަހެވެ. އޭގެ ސަބަބުން އެންމެ ބޮޑަށް އަސަރު ކުރަނީ ފަގީރުންނަށެވެ.
"ވަރަށް ބޮޑަށް އެބަ ފިނިވޭ، އެއީ ހަގީގަތެއް،" މަގުމަތީގައި ޓެންޓެއް ޖަހައިގެން ދިރިއުޅޭ އުމުރުން 30 އަހަރުގެ މުކޭޝް އޭއެފްޕީއަށް ބުންޏެވެ.
މުކޭޝް އާއި މަގުމަތީގައި ދިރިއުޅޭ އެހެން ބައެއް މީހުން ފިނިން ސަލާމަތްވުމަށް އަލިފާންގަނޑެއް ރޯކޮށް، ވަށައިގެން ވަރަށް ގިނައިރު ކޮންމެ ދުވަހަކު ވެސް ތިބެ އެވެ. އެއީ މި މަހު ވަރަށް ގިނައިން މުޅި ދިއްލީއިން ވެސް ފެންނަމުންދާ މަންޒަރެއް ކަމަށް އޭއެފްޕީއިން ބުންޏެވެ.
މުކޭޝް، އިތުރު ބަޔަކާ އެކު އަލިފާންގަނޑެއް ކައިރީގައި މަޑުކޮށްގެން. -- ފޮޓޯ: އޭއެފްޕީ
"މިދިޔަ 10 ދުވަހު ވަރަށް ބޮޑަށް ފިނިވި، ވަކިން ހާއްސަކޮށް މިދިޔަ ހަފްތާގައި، އިރުގެ އަލިކަން ލިބުނީ ވަރަށް މަދުން. ފިނިން ސަލާމަތް ވާން އަހަރުމެން ވަރަށް ގިނަ މަސައްކަތް ކުރަން ޖެހޭ، އެހެންވެ އެއީ މި ދުވަސްވަރު ވަރަށް ވިސްނަން ޖެހޭ ކަމެއް،" މުކޭޝް ބުންޏެވެ.
ދިއްލީގެ މަގުމަތީގައި ދިރިއުޅޭ މީހުންނާ ގުޅޭ ފަހުގެ ތަފާސްހިސާބެއް ނެތެވެ. ނަމަވެސް އިންޑިއާގެ 2011 ވަނަ އަހަރުގެ ބޯހިމެނުމުން ދައްކާ ގޮތުގައި އެ ސިޓީގައި 47،000 މީހުން ދިރިއުޅެނީ މަގުމަތީގަ އެވެ.
ނަމަވެސް އެކްޓިވިސްޓުން ބުނާ ގޮތުގައި ހަގީގީ އަދަދު އެއަށްވުރެ އެތައް ގުނައެއް އިތުރު ވާނެ އެވެ. ރަސްމީ ހިސާބުތައް ދައްކާ ގޮތުގައި ބޯހިޔާވަހިކަން ނެތް މީހުންނަށް ހާއްސަ މަރުކަޒުތަކުގެ ކެޕޭސިޓީއަކީ އެންމެ 9،300 މީހުންނެވެ.
ސެންޓާ ފޯ ހޮލިސްޓިކް ޑިވެލޮޕްމަންޓްގެ ސުނިލް ކުމާރް އަލޭދިއާ ބުނީ އާދަޔާ ހިލާފަށް ފިނި ގަދަވުމުގެ ސަބަބުން އެ ސިޓީއިން މި މަހު 176 މީހުން މަރުވެފައިވާ ކަމަށެވެ.
"އިންތިހާއަށް ފިނިވަމުން ދާތީ، މަގުމަތީގައި ދިރިއުޅޭ ގިނަ ބަޔަކު މަރުވޭ،" އޭނާ ބުންޏެވެ.
މަގުމަތީގައި ދިރިއުޅޭ މީހުންތަކެއް. -- ފޮޓޯ: އުގޮލިނީ
އިންޑިއާގެ މޫސުމާ ބެހޭ ބިޔުރޯއިން ނޫސްތަކަށް ބުނީ އެހެން އަހަރުތަކުގެ ޖެނުއަރީ މަހާ އަޅާ ބަލާއިރު، މި އަހަރު ފިނިހޫނުމިން ހުރީ 2-6 ޑިގްރީ ސެލްސިއަސް ދަށުގައި ކަމަށެވެ.
"މިއީ އާދައިގެ ހާލަތެއް ނޫން،" ބާރްތީ އިންސްޓިޓިއުޓް އޮފް ޕަބްލިކް ޕޮލިސީގެ އަންޖަލް ޕްރަކާޝް ބުންޏެވެ.
އޭނާ ލަފާކުރި ގޮތުގައި މޫސުމީ ގޮތުން އާދަޔާ ހިލާފު ކަންކަން ފާހަގަވުން ކުރިއަށް އޮތް ތަނުގައި ވަރަށް ބޮޑަށް އިތުރުވެ، އަންނަ ބަދަލުތަކުގެ އަސަރު ވެސް ބޮޑުވާނެ އެވެ.
