ލޮސް އެންޖެލިސް، އެމެރިކާ (ޖެނުއަރީ 29) - ލަވަކިޔުންތެރިޔާ ކްރިސް ބްރައުންއަށް ރޭޕްގެ ތުހުމަތުކޮށް، ކެލިފޯނިއާގެ ކޯޓަކަށް މައްސަލަ ހުށަހަޅައިފި އެވެ.
ކޯޓު ލިޔުންތަކުގައި ޖޭން ޑޯގެ ނަމުން އިޝާރާތްކޮށްފައިވާ އަންހެނަކު ތުހުމަތު ކުރީ ރެޕް އާޓިސްޓްސް ޑިޑީ ފްލޮރިޑާގައި ދިރިއުޅޭ ގޭގައި އޮތް ޔޮޓެއްގައި ކްރިސް ބްރައުން އޭނާއަށް މަސްތުވާތަކެތި ދީގެން، ރޭޕްކުރި ކަމަށެވެ.
ބަދަލުގެ ގޮތުގައި 20 މިލިއަން ޑޮލަރު ހޯދަން އޭނާ ވަނީ ދައުވާކޮށްފަ އެވެ. ކޯޓަށް ހުށަހެޅި މައްސަލައިގައިވާ ގޮތުން ކޮރިއޯގްރާފް ކުރުމާއި، ނެށުން އަދި މޮޑެލް ކުރުމާއި މިއުޒިކަލް އާޓިސްޓެއްގެ ގޮތުގައި އުޅޭ އަންހެން މީހާ ޑިސެމްބަރު 30، 2020 ވަނަ އަހަރު މަޔާމީއަށް ދިޔުމާ އެކު ޔޮޓަށް ދާން ދައުވަތު ދިނީ ކްރިސް ބްރައުން އެވެ.
އަންހެން މީހާ ތުހުމަތު ކުރިގ ގޮތުގައި ޔޮޓުގައި އޭނާއަށް ދިން ރާ ތަށި ބޮއެގެން "ބޯ އަނބުރާ ގޮތްވެ، ގައިން ވަރުދާން ފެށި" ކަމަށެވެ. އޭގެ ފަހުން ކޮޓަރިއަކަށް ގެންގޮސް، ރޭޕްކުރީ ކްރިސް ބްރައުން ކަމަށް ތުހުމަތުކޮށްފައިވެ އެވެ.
ގާނޫނީ ވަކީލުން އެރިއެލް މިޗެލް އަދި ޖޯޖް ވްރެބެކް ޓީއެމްޒީ ނޫހަށް ވިދާޅުވީ ހާދިސާ ހިނގުމުން ވަގުތުން ފުލުހުންނަށް އަންގާފައި ނުވަނީ އަމާޒުވެދާނެ ފާޑުކިޔުމަކަށް ބިރުން ކަމަށެވެ.
ރޭޕްގެ ސަބަބުން ލިބުނު ގެއްލުމުގެ ބަދަލު ހޯދަން މަދަނީ ދައުވާއެއް އުފުލާފައި ވާއިރު، ޖިނާއީ ދައުވާއެއް އުފުލާނެކަން އަދި ސާފެއް ނޫނެވެ.
ތުހުމަތު ފެންމަތިވުމާ އެކު ގްރެމީ އެވޯޑް ހާސިލްކޮށްފައިވާ ކްރިސް ބްރައުން އިންސްޓަގްރާމް މެދުވެރިކޮށް ބުނީ އެއީ ދޮގެއް ކަމަށާއި "މިޔުޒިކް ނުވަތަ ޕްރޮޖެކްޓެއް ފަށަން އުޅޭ ކޮންމެ ފަހަރަކު" މި ކަހަލަ ކަމެއް ހިންގާ ކަމަށެވެ.
މީގެ ކުރިން ކްރިސް ބްރައުންގެ މައްޗަށް ވަނީ އޭނާގެ ކުރީގެ ލޯބިވެރިޔާ އަދި ލަވަކިޔުންތެރިޔާ ރިއާނާއަށް އަނިޔާކުރި ކަމަށް ސާބިތުވެފަ އެވެ. ރިއާނާއަށް ލިބިފައި ހުރި އަނިޔާތަކުގެ ސަބަބުން 2009 ވަނަ އަހަރުގެ ގްރެމީ އެވޯޑްސްގައި ވެސް ބައިވެރިއެއް ނުވެވުނެވެ.
އޭގެ އިތުރުން ޕެރިސްގެ ލަގްޒަރީ ހޮޓަލެއްގައި އަންހެނަކު ރޭޕްކުރި ކަމަށް ވެސް އޭނާގެ މައްޗަށް ތުހުމަތު ކުރި އެވެ. ނަމަވެސް ރަސްމީކޮށް ދައުވާ އުފުލާފައެއް ނުވެ އެވެ. އެ ފަހަރު ވެސް ކްރިސް ބްރައުން ބުނީ އެއީ ދޮގު ތުހުމަތެއް ކަމަށެވެ.
