ބަގްދާދް، އިރާގް (ޖެނުއަރީ 28) - އިރާގުގެ ވެރިރަށް ބަގްދާދްގެ އެއާޕޯޓަށް ހުކުރު ދުވަހު ފޮނުވި ހަ ރޮކެޓް ހަމަލާގައި ދެ ބޯޓަށް ގެއްލުންވެއްޖެ އެވެ.
އިންޓީރިއާ މިނިސްޓްރީގެ އޮފިޝަލަކު ބުނީ ރޮކެޓްތައް އަމާޒުވީ ބަގްދާދް އިންޓަނޭޝަނަލް އެއާޕޯޓުގެ ރަންވޭ ނުވަތަ ޕާކިން ސަރަހައްދަށް ކަމަށެވެ. އެ ހަމަލާތަކުގައި ދެ ބޯޓަށް ވަނީ ގެއްލުންވެފަ އެވެ.
ހަމަލާގެ ޒިންމާ އަދި އެއްވެސް ފަރާތަކުން އުފުލާފައެއް ނުވެ އެވެ.
އިރާގީ އެއާވޭޒްއިން ސޯޝަލް މީޑިއާގައި ޕޯސްޓު ކުރި ފޮޓޯތަކުން ފެންނަނީ ބޯޓެއްގެ ކުރީކޮޅަށް ރޮކެޓް ހަމަލާއެއް އަރައި، ލޯވަޅެއް އެޅިފައިވާ މަންޒަރެވެ. ނަމަވެސް އެއީ މިހާރު ބޭނުން ނުކުރާ ބޯޓެއް ކަމަށާއި ހަމަލާގެ ސަބަބުން އެއްވެސް ދަތުރަކަށް ހުރަސް ނޭޅޭ ކަމަށް އެ އެއާލައިނުން ބުންޏެވެ.
ފަހަކަށް އައިސް ބަގްދާދްގެ ގްރީން ޒޯންގައި ހުންނަ އެމެރިކާ އެމްބަސީއަށް އަމާޒުކޮށް ފޮނުވާ ރޮކެޓް އަދި ޑްރޯން ހަމަލާތައް ވެސް ވަނީ އިތުރުވެފަ އެވެ. އޭގެ އިތުރުން އެއާޕޯޓުގައި ހުންނަ އެމެރިކާގެ ޑިޕްލޮމެޓިކް ފެސިލިޓީ އާއި އެމެރިކާ ސިފައިން އިރާގުގައި ތިބޭ މަރުކަޒުތަކަށް ދޭ ހަމަލާތައް ވެސް ވަނީ އިތުރުވެފަ އެވެ.
ހަމަލާތަކުގެ ޒިންމާ އެއްވެސް ބަޔަކު އާއްމު ގޮތެއްގައި ނުނަގަ އެވެ. ނަމަވެސް ތުހުމަތު ކުރެވެނީ އިރާނަށް ތާއީދު ކުރާ ގްރޫޕްތަކާއި އިސްލާމިކް ސްޓޭޓް (އައިއެސް) ޓެރަރިސްޓުންނަށެވެ.
ފާއިތުވި ހަފްތާތަކުގައި އިރާގުގެ ސިޔާސީ މީހުންނަށް އަމާޒުކޮށްދޭ ހަމަލާތައް ވެސް ވަނީ އިތުރުވެފަ އެވެ. އެގޮތުން ގްރެނޭޑް ބޮމުގެ ހަމަލާތަކުގެ އިތުރުން ސިޔާސީ މީހެއްގެ ގޭ ކައިރިއަށް ދިން ރޮކެޓް ހަމަލާއެއް ފާހަގަކުރެވެ އެވެ.
އެމެރިކާގެ ފައުޖުން އިރާގުގައި ހިންގާ އޮޕަރޭޝަން ރަސްމީކޮށް ނިންމާލީ މިދިޔަ ޑިސެމްބަރު މަހު އެވެ. އެއީ އިރާގު ސަރުކާރުން އެމެރިކާ ސިފައިންގެ އެހީއާ އެކު އައިއެސްގެ މައްޗަށް ކުރި ހޯދިތާ ހަތަރު އަހަރު ފަހުންނެވެ.
ނަމަވެސް އިރާގު ސިފައިންނަށް ތަމްރީން ދީ، އެހީވެ ހެދުމަށް އެމެރިކާގެ 2،500 ސިފައިންނާއި ބައިނަލްއަގްވާމީ އަސްކަރީ ކޯލިޝަނުގެ 1،000 ސިފައިން އެ ގައުމުގައި އަދިވެސް އެބަ ތިއްބެވެ.
