މަޑަގަސްކަރާގައި އަންނަ އަހަރު ބާއްވާ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ކްލަބްތަކާ ގުޅިގެން ގައުމީ ބެޑްމިންޓަން ޓީމެއް އެކުލަވާލުމުގެ މަޝްވަރާތަކެއް ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) އިން ކުރިއަށް ގެންގޮސްފި އެވެ.
މި މަހު 22 ވަނަ ދުވަހު ބީއޭއެމުން ވަނީ ބެޑްމިންޓަންގައި އެންމެ ހަރަކާތްތެރި ކްލަބްތަކާ ބައްދަލުކޮށް، 2023 ވަނަ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގައި ވާދަކުރަން ވަރުގަދަ ގައުމީ ބެޑްމިންޓަން ޓީމެއް އެކުލަވާލާނީ ކްލަބްތަކާ ގުޅިގެން ކަމަށް ބުނެފަ އެވެ.
އެ ގޮތުން ކްލަބްތަކުން ވެސް ގައުމީ ޓީމުގެ ޓްރަޔަލްގައި ބައިވެރިވެ، ހުރިހާ ކްލަބެއް ޝާމިލުވާ ގޮތަށް އެންމެ ރަނގަޅު ގައުމީ ޓީމެއް އެކުލަވާލުމަަށް ވަނީ ތާއީދުކޮށްފަ އެވެ. ވަރުގަދަ ގައުމީ ޓީމެއް އެކުލަވާލުމުގެ ޓާގެޓްގައި ބެޑްމިންޓަން ކްލަބްތަކާއި އެކެޑަމީތަކުން ބީއޭއެމާ ގުޅިގެން މަސައްކަތްކުރާއިރު އެއް އަމާޒެއްގައި ކުރިއަށް ދިއުމަށް ބީއޭއެމުން ވަނީ ވަރަށް ބޮޑު އިލްތިމާސެއް ކޮށްފަ އެވެ.
ބީއޭއެމް އިން ކްލަބްތަކާ އެކުގައި ބޭއްވި ބައްދަލުވުމަށް ފަހު.
ބެޑްމިންޓަން އެސޯސިއޭޝަނާ އެކު މި ބައްދަލުވުމުގައި ބައިވެރިވި ކްލަބްތަކުގެ ތެރޭގައި ޔުނައިޓެޑް ވިކްޓްރީ (ޔޫވީ)، ސީއެސް ސްޕޯޓްސްގެ އިތުރުން ރިވައިވަލް ސްޕޯޓްސް ކްލަބް ހިމެނެ އެެވެ. މީގެ ތެރެއިން ރިވައިވަލް ސްޕޯޓްސް ކްލަބުން އަންނަނީ ބެޑްމިންޓަން އެސޯސިއޭޝަންގެ އެހީއާ އެކު ބައިނަލްއަގުވާމީ މުބާރާތްތަކުގައި ވާދަކުރަމުންނެވެ.
އައިއޯއައިޖީ އަކީ ބެޑްމިންޓަން އެސޯސިއޭޝަނުން ކޮންމެ ފަހަރަކު ވެސް ދުރާލާ ޕްލޭންތަކެއް ހަދައިގެން ބައިވެރިވާ މުބާރާތެކެވެ. އެންމެ ފަހުން ބޭއްވި އައިއޯއައިޖީގައި ގައުމީ ބެޑްމިންޓަން ޓީމުގައި ހިމެނޭ އައިމިނަތު ނަބީހާ ވަނީ އަންހެން ސިންގަލްސް ބައިން ރަން މެޑަލް ހޯދައިފަ އެވެ. މީގެ އިތުރުން ބެޑްމިންޓަނުން މިދިޔަ އަހަރުތަކުގައި ވަނީ ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް)ގެ ރުހުން ލިބިފައިވާ މުބާރާތްތަކުގައި ވެސް ރަން މެޑަލް ހޯދައިފަ އެވެ.
ބެޑްމިންޓަން އެސޯސިއޭޝަނުން 2023 ވަނަ އަހަރުގެ އައިއޯއައިޖީގައި ކްލަބްތަކާ ގުޅިގެން ގައުމީ ޓީމެއް އެކުލަވާލުމުގެ އެންމެ ބޮޑު އަމާޒަކީ އަންނަ އަހަރުގެ ގޭމްސްގައި ޓީމު އިވެންޓް ބައިން ރަން މެޑަލެއް ހޯދުމެވެ. މީގެ ކުރިން ޓީމު އިވެންޓް ބައިން ރާއްޖޭގެ އަންހެން ޓީމާއި ފިރިހެން ޓީމުން ވަނީ ރިހި މެޑަލާއި ލޯ މެޑަލް ހާސިލްކޮށްފަ އެެވެ.
