ނިއު ދިއްލީ، އިންޑިއާ (ޖެނުއަރީ 27) - ހިޔާލު ފާޅުކުރުމުގެ މިނިވަންކަމަށް ހުރަސް އަޅަން އިންޑިއާ ސަރުކާރަށް ޓްވިޓާއިން އެހީވާ ކަމަށް އިދިކޮޅު ކޮންގްރެސް ޕާޓީގެ ލީޑަރު ރާހުލް ގާންދީ ތުހުމަތު ކުރައްވައިފި އެވެ.
ޓްވިޓާގެ ސީއީއޯއަށް ފޮނުވި ސިޓީއެއްގައި ރާހުލް ވިދާޅުވީ އެމަނިކުފާނުގެ ޓްވިޓާ އެކައުންޓަށް މީހުން ފޮލޯކުރިން "ކުއްލިއަކަށް" މިދިޔަ އޯގަސްޓް މަހު ހުއްޓުނު ކަމަށެވެ. އެގޮތުން މަހަކު އެވްރެޖުކޮށް އެތައް ހާސް ބަޔަކު ފޮލޯ ކުރަމުން ދަނިކޮށް، ކުއްލިއަކަށް ސުމަކަށް ވެއްޓުނު ކަމަށް ވިދާޅުވި އެވެ.
"ޓްވިޓާގެ އިންޑިއާ އޮފީހުގެ މީހުންގެ ފަރާތުން ސިއްރުން ލިބުނު ޔަގީން މައުލޫމާތު އެނގުނީ އަޅުގަނޑުގެ އަޑު ކަނޑުވާލަން ސަރުކާރުން އެ މީހުންނަށް އިންތިހާއަށް ޕްރެޝަރު ކުރަމުންދާކަން،" ޑިސެމްބަރު 27 ވަނަ ދުވަހު ފޮނުވި ސިޓީގައި ރާހުލް ވިދާޅުވި އެވެ.
އޭނާ ވިދާޅުވީ "ނޭނގުމެއްގެ ތެރޭގައި ޓްވިޓާއިން ބައިވެރިވަނީ ހިޔާލު ފާޅުކުރުމަށް ހުރަސް އެޅުމުގައި" ކަމަށާއި އިންޑިއާގައި "ހުދުމުހުތާރް ވެރިކަމެއް ފުޅާކުރަން ޓްވިޓާއިން އެހީނުވާނެކަން ކަށަވަރު ކުރުމަކީ ކުންފުނީގެ ބޮޑު ޒިންމާއެއް" ކަމަށެވެ.
އިދިކޮޅު ފިކުރު ނައްތާލަން ބޮޑު ވަޒީރު ނަރެންދްރަ މޯދީގެ ސަރުކާރުން ގިނަ މަސައްކަތްތަކެއް ކުރާ ކަމަށޤ އަބަދުވެސް ތުހުމަތު ކުރެވެ އެވެ. ނަމަވެސް ސަރުކާރުން އެކަން ދޮގުކުރެ އެވެ.
މި ހަފްތާގައި ޓްވިޓާއިން ބުނީ ކޮންޓެންޓް ނަގައިދިނުމަށް އެދި ހަތަރު ވަނަ އަށް އެންމެ ގިނައިން އެ ކުންފުނީގައި އެދެނީ އިންޑިއާ ސަރުކާރުން ކަމަށެވެ. އެ ލިސްޓުގެ އެންމެ ކުރީގައި އުޅެނީ ޖަޕާން، ރަޝިއާ އަދި ތުރުކީ އެވެ. ޗައިނާ އާއި އުތުރު ކޮރެއާއިން އޮންނަނީ ޓްވިޓާ ބްލޮކްކޮށްފަ އެވެ.
ރިޕޯޓާޒް ވިތައުޓް ބޯޑާޒް އިން ބުނީ މިދިޔަ އަހަރު އިންޑިއާގެ ދަނޑުވެރިން ކުރި މުޒާހަރާތަކާ ދިމާކޮށް ސޯޝަލް މީޑިއާގައި ކޮންޓެންޓް ސެންސަރު ކުރުމަށް އިންޑިއާ ސަރުކާރުން އެޅީ ހައިރާންވާހާ ބޮޑެތި ފިޔަވަޅުތަކެއް ކަމަށެވެ.
އިންޓަނެޓްގެ ހިދުމަތް މެދުކަނޑާލުމަކީ ވެސް އިންޑިއާ ސަރުކާރުން ވަރަށް ގިނައިން ކުރާ ކަމެކެވެ. އެގޮތުން އިންޑިއާއިން ކޮންޓްރޯލް ކުރާ ކަޝްމީރުގެ ސަރަހައްދުގައި 2019 ވަނަ އަހަރު ހިންގި ބޮޑު ސެކިއުރިޓީ އޮޕަރޭޝަނަކާ ދިމާކޮށް، މަސްތަކެއް ވަންދެން އެތަނުން އިންޓަނެޓް ކަނޑާލި އެވެ.
މިދިޔަ އަހަރު ސަރުކާރުން ތައާރަފް ކުރި އާ ގަވާއިދެއްގެ ދަށުން އިންޑިއާގެ އިސްތިގްލާލާއި، ދައުލަތުގެ ސަލާމަތާއި، އާއްމު މަސްލަހަތަށް ހުރަސް އެޅޭ ފަދަ ޕޯސްޓެއް ދައުރުވާ ނަމަ، އެ ޕޯސްޓް ރިމޫވްކޮށް، އެންމެ ފުރަތަމަ ޕޯސްޓް ކުރީ ކާކުތީ ބަލަން ސޯޝަލް މީޑިއާ ކުންފުނިތަކަށް މަޖުބޫރުވެ އެވެ.
އެ ގަވާއިދަކީ ސަރުކާރަށް ފާޑުކިޔާ މީހުންނާ ދެކޮޅަށް ބޭނުން ކުރެވޭނެ އެއްޗެއް ކަމަށް ބުނެ، ސޯޝަލް މީޑިއާ ކުންފުނިތަކާއި އެކްޓިވިސްޓުން ވަނީ ގަވާއިދު ބާތިލްކުރުމަށް އެދި ކޯޓަށް މައްސަލަ ހުށަހަޅާފަ އެވެ.
ކޮންގްރެސް ޕާޓީގެ އިސް އޮފިޝަލަކު އޭއެފްޕީއަށް ވިދާޅުވީ ރާހުލްގެ ސިޓީއަށް ޓްވިޓާއިން ޖަވާބުދިންތާ ދެ ދުވަސް ތެރޭގައި އެމަނިކުފާނުގެ ފޮލޯވަރުންގެ އަދަދު ކުއްލިއަކަށް 100،000 އިން އިތުރުވި ކަމަށެވެ.
ޓްވިޓާގެ ތަރުޖަމާނަކު އޭއެފްޕީއަށް ވިދާޅުވީ އެ ޕްލެޓްފޯމްގައި ފޮލޯ ކުރާ މީހުންގެ އަދަދުތައް ބަދަލުވަނީ ޕްލެޓްފޯމްގެ ބޭނުން ނަހަމަ ގޮތުގައި ބޭނުން ކުރުން ހުއްޓުވުމަށާއި ސްޕޭމްއާ ދެކޮޅަށް ކޮންމެ ހަފްތާއަކު ވެސް އެތައް މިލިއަން އެކައުންޓެއް ނައްތާލަމުން ދާތީ ކަމަށެވެ.
"ބައެއް އެކައުންޓްތަކަށް ވަރަށް ކުޑަ ބަދަލެއް ފާހަގަވި ނަމަވެސް، ބައެއް ކޭސްތަކުގައި އެ އަދަދު ވަރަށް ބޮޑު ތަނުން މަތިވެދާނެ."
ޖުމްލަ 75.1 މިލިއަން މީހުން ފޮލޯކުރާ މޯދީއަކީ ޓްވިޓާގައި އެންމެ މަގްބޫލް އެއް ޝަހުސިއްޔަތެވެ. ސަޕޯޓަރުންނާ މުއާމަލާތް ކުރަން ގަވާއިދުން ޓްވިޓާ ބޭނުން ކުރައްވާ އެއް ލީޑަރަކީ ވެސް މޯދީ އެވެ.
