އެމްއެމްޕީއާރްސީގެ ހިޔާނާތުގެ މައްސަލާގައި ޔޫތު މިނިސްޓަރު އަހުމަދު މަހުލޫފްގެ މައްޗަށް ކޮށްފައިވާ ދައުވާގެ އަޑުއެހުންތައް ކޮވިޑާއި ގުޅިގެން ކްރިމިނަލް ކޯޓުން ފަސްކުރުމާއި ގުޅިގެން ޕްރޮސެކިއުޓާ ޖެނެރަލް އޮފީހުން ކަންބޮޑުވުން ފާޅުކޮށްފި އެވެ.
އަށާރަވަނަ ރައްޔިތުން މަޖިލީހުގެ ގަލޮޅު ދެކުނު ދައިރާގެ މެމްބަރެއްގެ ގޮތުގައި ހުރެ، އެމްއެމްޕީއާރުސީގެ ހިޔާނާތުގެ ފައިސާއިން 33،000 ޑޮލަރު (508،860ރ.) ރިޝްވަތުގެ ގޮތުގައި މަހުލޫފް ހިފި ކަމަށް ބުނެ އޭނާގެ މައްޗަށް ދައުލަތުން އުފުލީ ރިޝްވަތު ހިފިކަމުގެ ދައުވާ އެވެ.
އެ މައްސަލައިގެ އަޑު އެހުމެއް މިދިޔަ ހަފުތާގެ ބުދަ ދުވަހު ބޭއްވުމަށް ތާވަލު ކުރި ނަމަވެސް އެ ދުވަހުގެ ޝަރީއަތް ކެންސަލް ކުރީ އިދާރީ ސަބަބަކާއި ގުޅިގެން އަޑުއެހުން ކުރިއަށް ގެންދެވެން ނެތް ކަމަށް ބުނެ އެވެ. އޭގެ ހަފްތާއެއް ފަހުން އިއްޔެ ކްރިމިނަލް ކޯޓުން ބުނީ މިނިސްޓަރަށް ކުރާ ދައުވާގެ އަޑުއެހުން ފަށާނީ ކޮވިޑްގެ ހާލަތު ރަނގަޅުވުމުން ކަމަށެވެ.
ނަމަވެސް އެކަމަށް އިޝާރާތްކޮށް، ޕްރޮސެކިއުޓާ ޖެނެރަލް އޮފީހުން ވަނީ އެގޮތަށް ޝަރީއަތްތައް ލަސް ނުކުރެވޭނެ ކަމަށް ބުނެފަ އެވެ.
"ކޮވިޑްގެ ހާލަތާއި ގުޅިގެން މައްސަލަތައް ހިންގުން ލަސްވިޔަ ނުދިނުމަށް މަޖިލިސް އިން ވަނީ ގާނޫނަށްވެސް ބަދަލުތަކެއް ގެނެސްފައި. އަޅުގަނޑުމެން އެދެނީ ގާނޫނު ދައްކައިދޭ މަގުން މަހުލޫފު މައްސަލަ ވެސް، ހުރިހާ މައްސަލައެއް ވެސް އަވަހަށް ނިންމުން." ޕްރޮސެކިއުޓާ ޖެނެރަލް އޮފީހުގެ ތަރުޖަމާން އަދި ޕަބްލިކް ޕްރޮސެކިއުޓާ އަހްމަދު ޝަފީއު ވިދާޅުވި އެވެ.
މިދިޔަ އަހަރުގެ ނޮވެމްބަރު، 24 ގައި މަހުލޫފްގެ މައްޗަށް ދައުވާކޮށްފައިވާއިރު، އެ މައްސަލަ ނުފެށި އޮތީ ކްރިމިނަލް ކޯޓު މިދިޔަ މަހު ރިސެސްއަށް ދިއުމުންނެވެ.
މަހުލޫފަށް ދައުވާ ކުރަނީ މަޖިލީހުގެ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރުކަމުގައި ހުންނަވައި ސްޕެޝަލް އިކޮނޮމިކް ޒޯން ބިލަށް ތާއީދުކޮށް ވޯޓުދިނުމުގެ މުގާބިލުގައި، އޭރުގެ ޓޫރިޒަމް މިނިސްޓަރު އަހުމަދު އަދީބު، އެސްއޯއެފްގެ ނަމުގައި ބޭންކް އޮފް މޯލްޑިވްސްގައި ހުޅުވާފައިވާ އެކައުންޓުގެ ޗެކުން އޭނާއަށް ދިން 33,000 ރުފިޔާ, އޭނާގެ ނަމުގައި ބޭންކް އޮފް މޯލްޑިވްސްގައި ހުޅުވާފައިވާ އެކައުންޓަށް ޖަމާކޮށް، ރިޝްވަތު ހިފާފައިވާ ކަމަށް ތުހުމަތުކޮށެވެ.
ނަމަވެސް ހިޔާނާތުގެ ތުހުމަތުކުރުމުން މަހްލޫފް ވިދާޅުވެފައިވާ ގޮތުގައި އޭނާގެ އެކައުންޓަށް 33،000 ޑޮލަރު ވަދެފައި އޮތީ ސައްހަ މުއާމަލާތަކުންނެވެ.
އެ މުއާމަލާތާ ގުޅިގެން މަހްލޫފް ނެރުއްވި ބަޔާނެއްގައި ވިދާޅުވެފައި އޮތީ، "އެއީ އަޅުގަނޑުގެ އާއިލާއިން ދަ ޖީންސްގެ ނަމުގައި ފިހާރައެއް ހިންގި އިރު އަޅުގަނޑުގެ އެއްބަފާ ކޮއްކޮ އަލީ މުބީން، ގ. ހާފްސީ މެދުވެރިވެގެން ކޮށްފައިވާ ސައްހަ ކަރަންސީ އެކްސްޗޭންޖްގެ މުއާމަލާތެއް" ކަމަށެވެ.
މައްސަލާގައި ދައުވާ ކޮށްފައިވަނީ އެ މައްސަލަ އޭސީސީން ޕީޖީއަށް ފޮނުވިތާ ގިނަ ދުވަސްތަކަކަށްފަހު އެވެ. އަދި އެ މައްސަލައާ ގުޅިގެން މަހުލޫފް ސަސްޕެންޝަންގައި ވެސް ގިނަ ދުވަސްތަކަކު ހުންނެވުމަށްފަހު, އެ ސަސްޕެންޝަން އުވާލާފައި ވަނިކޮށެވެ.
