ޒުވާން ފިޓްނެސް އިންސްޓްރަކްޓަރުން އުފެއްދުމަށްޓަކައި މަޝްހޫރު އެއް ފިޓްނެސް ސެންޓަރު، ޓޯޓަލް ފިޓްނެސް ގްރޫޕް (ޓީއެފްޖީ) އިން ސްކޯލާޝިޕްގެ ފުރުސަތު ހުޅުވާލައިފި އެވެ.
ޓީއެފްޖީގެ ކޯ ފައުންޑާ އަދި ސީއީއޯ ހުސެން ޒިނާން ވިދާޅުވީ ފިޓްނެސް އިންސްޓަރްކްޓަރަކަށްވުމަށް ބޭނުންވާ ކުދިންނަށާއި ކަސްރަތު ކުރުމާއި ސިއްހީ ދާއިރާއަށް ޝައުގުވެރިކަން ހުންނަ މީހުންނަށް މި ސްކޮލާޝިޕްތަކަކީ ރަނުގެ ފުރުސަތެއް ކަމަށެވެ.
"އަޅުގަނޑުމެން ބޭނުންވީ ތައުލީމީ ޒުވާނުންނަށް މި ދާއިރާއިން ކުރިއަށް ދިޔުމުގެ ފުރުސަތުތައް ހޯދައިދޭން. މިކަމުގައި އަޅުގަނޑުގެ 12 އަހަރުގެ ތަޖުރިބާއަށް ބަލާއިރު ބުނެވޭނީ މިއީ ކުރިމަގު އޮތް ރަނގަޅު ދާއިރާއެކޭ. ފުލްޓައިމްކޮށް މަސައްކަތް ކުރަން ބެލިޔަސް މިއީ ހަމަ އާމްދަނީ ހޯދައިގެން ދިރިއުޅުމެއް ބިނާކުރެވޭ ވަރުގެ ރަނގަޅު ދާއިރާއެއް،" ޒިނާން ވިދާޅުވި އެވެ.
"ޓީއެފްޖީ ސްކޯލާޝިޕް"ގެ ނަމުގައި ހުޅުވާލާފައިވާ މި ސްކޯލާޝިޕަށް، އުމުރުން 18-23 ދެމެދުގެ ކޮންމެ ޒުވާނަކަށް ކުރިމަތިލެވޭނެ އެވެ. މި ސްކޯލާޝިޕްގެ ދަށުން ތަމްރީނު ކުރިއަށް ގެންދާ ފަރާތްތަކަށް ލިބޭނީ އިންޓަނޭޝަނަލް އެކްރެޑިޓެޓް ސެޓިފިކެޓްއެއް ހިލެ އެވެ.
މި ސްކޯލާޝިޕަށް ހޮވޭނީ އިންޓަވިއު އާއި އެހެނިހެން ގޮތް ގޮތުން އެންމެ މަތީ މާކްސް ލިބޭ ހަ ބައިވެރިއެކެވެ. އަދި ސްކޯލާޝިޕް ލިބޭ ބައިވެރިން ކޯސް ކާމިޔާބު ކުރުމަށްފަހު ދެ އަހަރު ވަންދެން ޓީއެފްޖީގައި މަސައްކަތް ކުރަން ޖެހޭނެ އެވެ.
މިދިޔަ އަހަރު ވެސް ޓީއެފްޖީން ވަނީ މި ސްކޯލާޝިޕް ފުރުސަތު ހުޅުވާލާފަ އެވެ. އެ ޕްރޮގްރާމްގެ ތެރެއިން ހަ ކުދިންނަށް ސްކޯލާޝިޕްގެ ފުރުސަތު ދެވި، އެ ބައިވެރިން މިހާރު ކޯސް ނިންމާފައިވާކަމަށާއި މިހާރު އެކުދިން ޓީއެފްޖީގައި ވަޒީފާ އަދާކުރަމުންދާ ކަމަށް ޓީއެފްޖީން މައުލޫމާތު ދިނެވެ.
"މި ދާއިރާއަށް ވީހާވެސް ގިނަ ކުދިން ނެރެ، ރާއްޖޭގައި މި ދާއިރާއިން ލިބެން ހުރި ފުރުސަތުތައް އެކުދިންނަށް ދައްކުވައި ދިނުން މިކަމުގެ މަގުސަދަކީ" ޒިނާން ވިދާޅުވި އެވެ.
