ޕަޓްނާ، އިންޑިއާ (ޖެނުއަރީ 26) - ރޭލު ދަތުރާ ގުޅޭ ދާއިރާގެ ވަޒީފާތަކެއްގެ މައްސަލަ ހޫނުވެ އިރުމަތީ އިންޑިއާގައި މުޒާހަރާ ކުރި ބަޔަކު ރޭލުތަކުގައި ހުޅު ޖަހައިފި އެވެ.
އިންޑިއާ ސަރުކާރުން މެނޭޖް ކުރާ ރޭލު ދަތުރާ ގުޅޭ ދާއިރާގެ ވަޒީފާ ލިބެނީ ހާއްސަ އިމްތިހާނެއް ހަދައިގެންނެވެ. އިމްތިހާން ކުރިއަށް ގެންދަނީ ނަހަމަކޮށް ކަމަށް ބުނެ، މި ހަފްތާ ފެށުނީއްސުރެ ގިނަ ބަޔަކު އަންނަނީ ބިހާރު ސްޓޭޓްގައި ނުރުހުން ފާޅު ކުރަމުންނެވެ.
ހޯމަ ދުވަހު ފެށި ކުޑަ މުޒާހަރާތައް ފުޅާވެ، މުޒާހަރާގެ ބައިވެރިން ވަނީ ހަމަނުޖެހުން އުފައްދަން ފަށާފަ އެވެ. އެގޮތުން ރޭލުތަކަށް ގާ އުކައި، ރޭލު ދަގަނޑުން ދަތުރު ނުކުރެވޭ ގޮތަށް ބަންދުކޮށް، ބޮޑު ވަޒީރު ނަރެންދްރަ މޯދީގެ ފޮޓޯތައް އަންދާފައިވެ އެވެ.
މުޒާހަރާގައި ބައިވެރިވި 25 އަށް ވުރެ ގިނަ މީހުން ހައްޔަރުކޮށްފައިވާ އިރު، މުޒާހަރާތައް ބާއްވަނީ ބިހާރް އާއި އަވަށްޓެރި އުއްތަރް ޕްރަދޭޝް ސްޓޭޓްގެ ރޭލުވޭ ސްޓޭޝަންތަކުގަ އެވެ.
މުޒާހަރާ ރޫޅާލުމުގައި ފުލުހުން އަމަލު ކުރާ ގޮތަށް ފާޑުކިޔުން އަމާޒުވެފައިވާ އިރު، މުޒާހަރާގެ ބައިވެރިންގެ ގެތަކަށް ފުލުހުން ގަދަކަމުން ވަދެގަނެ އަނިޔާކުރާ މަންޒަރު ފެންނަ ވީޑިއޯތައް ސޯޝަލް މީޑިއާގައި ވަނީ އާންމުވެފަ އެވެ.
