މުމްބާއީ، އިންޑިއާ (ޖެނުއަރީ 13) - މުމްބާއީ ކައިރީގައި އޮންނަ ފެންގަނޑަކުން ގިނަ އަދަދެއްގެ ވެލާތަކެއް މަރުވީ ގަސްތުގައި ވިހަ ދިނުމުގެ ސަބަބުން ކަމަށް ތަޖުރިބާކާރުން ތުހުމަތުކޮށްފި އެވެ.
ވެލާތައް މަރުވެފައި ހުރިކަން އެނގުނީ މުމްބާއީއާ 50 ކިލޯމީޓަރު އިރުން އިންނަ ކަލްޔަންގެ ފެންގަނޑު ސަރަހައްދުން ނުބައި ވަހެއް ދުވާތީ އެކަން ބަލައިދިނުމަށް ސިޔާސީ ބޭފުޅަކު އެދިވަޑައިގެންނެވުމުންނެވެ.
ވައިލްޑް އެނިމަލް އެންޑް ރެޕްޓައިލް ރެސްކިއު ގްރޫޕްގެ ސުހާސް ޕަވަރް ބުނީ ވެލާގެ ބާވަތެއް ކަމަށްވާ އިންޑިއަން ފްލެޕްޝެލް ޓާޓަލްގެ 57 ވެލާ މަރުވެފައިވާ ކަމަށެވެ.
އެ ފެންގަނޑުން ސަލާމަތް ކުރެވުނީ އެންމެ ހަ ވެލަ އެވެ. އޭނާ ބުނީ ބެލެވޭ ގޮތުގައި ވެލާތައް މަރުވީ އެ ސަރަހައްދުގައި ދިރިއުޅޭ މީހުން ގަސްތުގައި ވިހަ ކުރުމުންނެވެ.
އެގޮތުން ވެލާ ދިރިއުޅޭ ފެންގަނޑުގައި ގަވާއިދާ ހިލާފަށް މަސް އާލާކޮށް، ވެލާތައް މަސް ކާން ފެށުމުން، ވިހަ ދިނީ ކަމަށް އޭނާ ތުހުމަތު ކުރި އެވެ.
"ތަހުގީގު ދަނީ ކުރިއަށް. ޕޯސްޓް މޯޓަމް އާއި ސައިންޓިފިކް ތަހުލީލަށް ފަހު މަރުގެ ސީދާ ސަބަބު ހޯދޭނެ،" ޕަވަރް އޭއެފްޕީ އަށް ބުންޏެވެ.
އިންޑިއަން ފްލެޕްޝެލް ވެލާއަކީ މަދު އެއްޗެއް ނޫނެވެ. ނަމަވެސް އެއީ ވައިލްޑްލައިފް ޕްރޮޓެކްޝަން ގާނޫނުގެ ދަށުން އިންޑިއާގައި ހިމާޔަތްކޮށްފައިވާ އެއްޗެކެވެ.
