ބެއިޖިން، ޗައިނާ (ޖެނުއަރީ 23) - ކޮވިޑްގެ ކްލަސްޓާއެއް ފާހަގަވި ބެއިޖިންގެ ނެއިބާހުޑަކަށް ނިސްބަތްވާ ދެ މިލިއަން މީހުން އެ ބައްޔަށް ޓެސްޓް ކުރަން ނިންމައިފި އެވެ.
އެގޮތަށް ނިންމީ ބައިނަލްއަގްވާމީ ހުރިހާ ޕޯސްޓެއް ޑިސްއިންފެކްޓް ކުރަން އެންގިތާ ދުވަސްކޮޅެއް ފަހުންނެވެ. ޗައިނާގެ އިދާރާތަކުން ބުނީ ޕޯސްޓު މެދުވެރިކޮށް ބަލި ފެތުރުން އެކަށީގެންވާ ކަމަށެވެ.
ދުނިޔޭގެ އެންމެ އާބާދީ ބޮޑު ސިޓީތަކުގެ ތެރޭގައި ހިމެނޭ ބެއިޖިން އިން ފާއިތުވި ހަފްތާގައި ކޮވިޑްގެ 30 ކޭސް ރިޕޯޓު ކުރި އެވެ. މީގެ ދެ ހަފްތާ ފަހުން އެ ސިޓީގައި ވިންޓާ އޮލިމްޕިކްސް އޮންނާނެ އެވެ.
އެހެން ގައުމުތަކާ އަޅާ ބަލާއިރު ޗައިނާއިން ފެންނަމުން ދަނީ ވަރަށް މަދު އަދަދެއްގެ ކޭސްތަކެވެ. ނަމަވެސް ޗައިނާ ސަރުކާރުން ގެންގުޅެނީ "ޒީރޯ ކޮވިޑް"ގެ ހަރުކަށި ސިޔާސަތެކެވެ.
އެންމެ ފަހުން ފާހަގަވި ކްލަސްޓާގައި ހަ ކޭސް ހިމެނޭ އިރު، އެ ކޭސްތައް ނިސްބަތް ވަނީ ބެއިޖިންގެ ދެކުނުގައި އޮންނަ ފެންގްޓައި ޑިސްޓްރިކްޓަށެވެ.
ފެބްރުއަރީ ހަތަރު ވަނަ ދުވަހު ފަށާ ވިންޓާ އޮލިމްޕިކްސް އަށް ބައިނަލްއަގްވާމީ ވަފުދުތަކާއި، މީޑިއާ އަދި ބައެއް އެތްލީޓުން މިހާރު ވަނީ ޗައިނާއަށް ދާން ފަށާފަ އެވެ.
