ބެންކޮކް، ތައިލޭންޑް (ޖެނުއަރީ 23) - ތައިލޭންޑްގެ ހުޅަނގުގެ ހިސާބެއްގައި ހަނޑޫ ކަނޑާ ބޮޑު ވަޅިއަކުން އިނގިރޭސި ރައްޔިތަކަށް ހަމަލާދީ މަރާލައިފި އެވެ.
ފުލުހުން ބުނީ އެ ހާދިސާ ހިނގީ މުއާންގް ޑިސްޓްރިކްޓްގެ ކަންޗަނަބުރިގައި ކަމަށެވެ. އެކަން ހިނގި އިރު، މަރުވި މީހާ އާއި އޭނާގެ އެކުވެރިޔަކު ތިބީ ކުއްޔަށް ނަގާފައިވާ ގެޔެއްގެ ބޭރުގައި މަޑުކޮށްގެން ރާބޯށެވެ.
ތައިލޭންޑްގެ ނޫސްތަކުން ބުނާ ގޮތުގައި އެ ތަނުން ފިރިހެނެއްގެ ބޫޓާއި ހަނޑޫ ކަނޑާ ބޮޑު ވަޅިއެއް ފުލުހުންނަށް ފެނުނު ކަމަށެވެ.
މަރުވީ އުމުރުން 50 އަހަރުގެ މީހެކެވެ. އޭނާއަކީ ތައިލޭންޑް އަންހެނަކާ ކައިވެނިކޮށްގެން އެ ގައުމުގައި ދިރިއުޅޭތާ ފަސް އަހަރުވެފައިވާ މީހެކެވެ.
އޭނާގެ އެކުވެރިޔާއަކީ އުމުރުން 54 އަހަރުގެ އިނގިރޭސި ރައްޔިތެކެވެ. އެ މީހާއަށް ވެސް ސީރިއަސް އަނިޔާތަކެއް ލިބިފައި ވާއިރު، މިހާރު ދަނީ ފަރުވާ ކުރަމުންނެވެ.
ހަމަލާގެ ތުހުމަތުގައި ހައްޔަރު ކުރި އުމުރުން 22 އަހަރުގެ ތައިލޭންޑް ފިރިހެން މީހާއަކީ ނަފްސާނީ ބައްޔަށް ކުރިން ފަރުވާ ހޯދި މީހެއް ކަމަށް ތައިލޭންޑްގެ ނޫސްތަކުން ބުނެ އެވެ.
އޭނާއާ ދެކޮޅަށް އުފުލީ ގަސްތުގައި މީހަކު މެރުމުގެ ދައުވާ އާއި މީހަކު މެރުމަށް މަސައްކަތް ކުރި ކަމުގެ ދައުވާ އެވެ. އޭނާ ވަނީ ކުށަށް އިއުތިރާފްވެފަ އެވެ.
