ކަލިނަރީ ދާއިރާއަށް ހާއްސަކޮށްގެން ބާއްވާ ފުޑް އެންޑް ބެވަރޭޖު (އެފްއެންބީ) ޝޯ ގެ ފަސްވަނަ އެޑިޝަން ޖޫން 2-4 އަށް ހުޅުމާލޭ ސެންޓްރަލް ޕާކުގައި ބާއްވާ ގޯތަށް ހަމަޖެހިއްޖެ އެވެ.
ހައިރައިޒުން އިންތިޒާމުކުރާ މި ޝޯ އެންމެ ފަހުން ބޭއްވީ 2019 ގަ އެވެ. ވޭތުވި ދެ އަހަރު މި އިވެންޓު ނުބޭއްވީ ކޮވިޑު ބަލިމަޑުކަމުގެ ތެރޭގައި އެއްވެ އުޅުން މަދުކުރަން އަންގާފައި އޮތުމާ ގުޅިގެންނެވެ.
ހައިރައިޒުން ބުނި ގޮތުގައި ފަސްވަނަ އެފްއެންބީ ޝޯ ބާއްވަނީ ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)އާ ގުޅިގެންނެވެ. ކޯ ސްޕޮންސަރުންނަކީ ވިލާ ޓްރޭޑިން އާއި މޯލްޑިވްސް ގޭހެވެ.
ކުރީ އަހަރުތަކެކޭ އެއްފަދައިިން މި އަހަރު ވެސް އެފްއެންބީ ޝޯ ގައި ރާއްޖެ އާއި ބޭރުގެ ރިސޯޓުތަކާއި ހޮޓާތަކާއި ގެސްޓުހައުސްތަކުގެ އިތުރުން ލިވްއެބޯޑުތަކުގެ އެފްއެންބީގައި ހަރަކާތްތެރިވާ މީހުންނާއި ކާބޯތަކެތި އިމްޕޯޓު ކުރާ ވިޔަފާރިތަކާއި ހޯލްސޭލަރުންނާއި ކާބޯތަކެތި އުފައްދާ ވިޔަފާރިތަކާއި ކަލިނަރީ ދާއިރާގެ ފަންނީ މީހުން ބައިވެރިވާނެ ކަމަށް ހައިރައިޒުން ބުންޏެވެ.
ހައިރައިޒުން ބުނީ އެއްތަނަކުން މި އިވެންޓު ވެގެން ދާނީ އެންމެ ގިނަ ބާވަތުގެ ކެއިން ބުއިމުގެ ބާވަތްތަކުގެ އަޖުމަ ބަލާލަން ލިބޭ ފުރުސަތަށް ކަމަށެވެ. އަދި މި އަހަރުގެ އިވެންޓުގައި ވެސް ވިޔަފާރިތަކަށް ފަހި ފުރުސަތުތަކެއް ހުންނާނެ ކަމަށް ބުންޏެވެ.
އެފްއެންބީ ޝޯގެ ޕްރީ-އިވެންޓް މާކެޓިން އަދި ޕްރޮމޯޝަންތައް މާޗުން ފެށިގެން ފަށާނެ އެވެ. މި އަޕްޑޭޓުތައް ހައިރައިޒްގެ ފޭސްބުކް ޕޭޖާއި އިންސްޓަގްރާމް ޕޭޖުން ފެންނަން ހުންނާނެ އެވެ.
އެފްއެންބީ ޝޯގެ އިތުރުން ހައިރައިޒުން ވަނީ އަހަރު ތެރޭގައި އާންމުކޮށް ބާއްވަމުން އައި ހުރިހާ އިވެންޓުތަކެއް މި އަހަރު ބާއްވަން ނިންމާފަ އެވެ. އޭގެ ތެރޭގައި ސައުތް އޭޝިއަން ޓްރެވަލް އެވޯޑާއި ލިވިން އެކްސްޕޯ އާއި ވެކޭޝަންސް އެކްސްޕޯގެ އިތުރުން މޯލްޑިވްސް ޝޯކޭސް އާއި ޕްރިންޓް އެންޑް އެޑްވަޓައިޒިން ޝޯ ހިމެނެ އެވެ.
