މާލެ ސަރަހައްދު ކަރަންޓްގެ އެއް ވިއުގައަކަށް ބަދަލުކުރަން ހިންގާ ޕްރޮޖެކްޓްގައި ގާއިމްކުރި "ގްރޭޓާ މާލެ އިންޓަކަނެކްޝަން ގްރިޑް" އާ ވެލާނާ އިންޓަނޭޝަނަލް އެއާޕޯޓް ގުޅާލައި، ހުޅުމާލޭގައި ހުންނަ އިންޖީނުގޭން އެއާޕޯޓަށް ކަރަންޓް ދޭން ފަށައިފި އެވެ.
ސްޓެލްކޯއިން ބުނީ ގްރޭޓާ މާލެ އިންޓަކަނެކްޝަން ގްރިޑާ ގުޅާލައި ހުޅުލެއަށް ކަރަންޓް ދޭން ފެށީ މިދިޔަ ހުކުރު ދުވަހުގެ ރޭ ކަމަށެވެ.
ގްރޭޓާ މާލެ އިންޓަކަނެކްޝަން ޕްރޮޖެކްޓަކީ ކުރީގެ ރައީސް އަބްދުﷲ ޔާމީނުގެ ވެރިކަމުގައި 2016 ވަނަ އަހަރު ފެށި ޕްރޮޖެކްޓެކެވެ. ޗައިނާގެ ޑޮންފަންގު ކުންފުންޏާ ހަވާލުކޮށް ކުރިއަށް ގެންދާ އެ ޕްރޮޖެކްޓްގައި ހުޅުމާލޭގައި އެޅި އިންޖީނުގެއިން ދުވާލަކު 50 މެގަވޮޓްގެ ކަރަންޓް އުފައްދަ އެވެ.
ހުޅުމާލޭގައި ހުންނަ އިންޖީނުގެއިން ހުޅުލެއަށް ކަރަންޓް ދިނުމަށްޓަކައި ސްޓެލްކޯ އާއި އެމްއޭސީއެލް އިން ވަނީ މި މަހުގެ ކުރީކޮޅު އެެއްބަސްވުމެއްގައި ސޮއިކޮށްފަ އެވެ.
އެ އެއްބަސްވުމުގައި ސޮއި ކުރެއްވުމަށްފަހު ސްޓެލްކޯގެ މެނޭޖިން ޑިރެކްޓަރު ހަސަން މުޣުނީ އޭރު ވިދާޅުވީ، ސްޓެލްކޯއަކީ ގައުމަށް ދިމާވާ ކޮންމެ ކަމެއްގައިވެސް އެެންމެ އިސް ސަފުގައި މަސައްކަތް ކުރާ ކުންފުންޏެއް ކަމަށާއި، އެމްއޭސީއެލްއަކީ ގައުމުގެ އިގްތިސޯދަށް އެންމެ ބޮޑަށް ހިއްސާކުރާ އެއް ކުންފުނި ކަމަށެވެ.
އެމްއޭސީއެލްގެ ކުރިއެރުމަކީ މުޅި ގައުމުގެވެސް ކުރިއެރުން ކަމަށާއި، މިފަދަ ކޮންމެ ކަމެއްގައި އަދި ހާއްސަކޮށް ގައުމުގެ ތަރައްގީ އާއި ކުރިއެރުމާ ގުޅުންހުރި ކޮންމެ ކަމެއްގައި އެހީތެރިކަން ފޯރުކޮށްދޭން ސްޓެލްކޯއިން ފަސްނުޖެހޭނެ ކަމަށް މުޣުނީ ވިދާޅުވި އެވެ.
ސްޓެލްކޯއިން 2020 ވަނަ އަހަރު ބުނެފައިވާ ގޮތުގައި އެ ޕްރޮޖެކްޓްގެ ދަށުން ހުޅުމާލެ އާއި މާލޭގައި 95 އެމްވީއޭގެ ހަތަރު ޓްރާންސްފޯމަރު އަދި ހުޅުލޭގައި އަށް ޓްރާންސްފޯމަރު ބަހައްޓާނެ އެވެ. ހުޅުލެއަށް ކަރަންޓް ދޭން ފެށީ އެ ޓްރާންސްފޯމަރުތައް ބަހައްްޓައި ނިމުމުންނެވެ.
