ކުއަލަ ލަމްޕޫރް، މެލޭޝިއާ (ޖެނުއަރީ 22) - މެލޭޝިއާގެ އެންޓި ކޮރަޕްޝަން ކޮމިޝަން (އޭސީސީ)ގެ ރައީސްގެ އިސްތިއުފާއަށް ގޮވާލައި އެތައް ސަތޭކަ ބަޔަކު މުޒާހަރާކޮށްފި އެވެ.
ކަޅު ހެދުމުގައި މަގުތަކަށް ނުކުމެ ހިނގާލުމުގައި ބައިވެރިވި އެތައް ސަތޭކަ މީހުން ގޮވާލީ "ކޮރަޕްޝަނަށް ނޫނެކޭ ބުނެ" އަޒަމް ބަކިއާ ދެކޮޅަށް ވަގުތުން ފިޔަވަޅު އެޅުމަށެވެ.
ކޮވިޑް ބަލިމަޑުކަން ފެށި ފަހުން މެލޭޝިއާގައި މުޒާހަރާ ކުރަނީ ވަރަށް މަދުންނެވެ. ނަމަވެސް ކޮރަޕްޝަންގެ މައްސަލަތަކާ ދެކޮޅަށް މެލޭޝިއާގައި އަބަދުވެސް ބޮޑެތި އެއްވުންތައް ބާއްވަ އެވެ.
އެގޮތުން 1އެމްޑީބީ ކޮރަޕްޝަން މައްސަލަ ފެންމަތިވެ، 2018 ވަނަ އަހަރު އޮތް ސަރުކާރުގެ އިސްތިއުފާއަށް މަޖުބޫރު ކުރުވީ ވެސް ބޮޑު އެއްވުންތަކެއް ބާއްވައިގެންނެވެ.
އަޒަމް އަކީ 1އެމްޑީބީ ކޮރަޕްޝަން ތަހުގީގު ކުރުމުގައި އެންމެ އިސް އެކަކެވެ. ނަމަވެސް ހިއްސާގެ ބާޒާރުގައި ނަހަމަ ގޮތްތަކަށް އަމަލުކޮށް ފައިދާ ހޯދާ ކަމަށް އޭނާއަށް ވަނީ ތުހުމަތު ކުރަން ފަށާފަ އެވެ.
ނަމަވެސް އެ ތުހުމަތުތައް އޭނާ ދޮގުކުރެ އެވެ. މެލޭޝިއާގެ ސެކިއުރިޓީޒް ރެގިއުލޭޓަރީ އިދާރާއިން ވެސް އޭނާގެ މައްސަލައެއް ނެތް ކަމަށް ބުނެފައި ވެ އެވެ.
އެކަމަކު ރުޅިގަދަވެފައި ތިބި އާއްމުން ބުނީ ކޮރަޕްޝަނަށް ދޫދެވެން ނޯންނާނެ ކަމަށާއި ބޭނުންވަނީ އޭނާގެ އިސްތިއުފާ ކަމަށެވެ.
އުމުރުން 36 އަހަރުގެ އަޒަމް އޭސީސީއަށް އައްޔަނު ކުރީ 2020 ވަނަ އަހަރު އެވެ. އޭނާގެ އެންމެ ބޮޑު ޒިންމާއަކަށްވީ ކޮރަޕްޝަނާއި މަނީ ލޯންޑަރިންގައި ގެއްލިފައިވާ ފައިސާ އަނބުރާ ހޯދުމެވެ.
ހަމަ އެ އަހަރު 1 އެމްޑީބީ މައްސަލައިގައި ކުރީގެ ބޮޑު ވަޒީރު ނަޖީބް ރައްޒާގްގެ މައްޗަށް ކޮރަޕްޝަން ކުށް ސާބިތުވެ، 12 އަހަރަށް ޖަލަށް ހުކުމްކުރި އެވެ.
