ކުއަލަ ލަމްޕޫރް، މެލޭޝިއާ (ޖެނުއަރީ 22) - އެއް މަސް ތެރޭ ތިން ފަހަރަށް އެޑްމިޓްކުރި ނަމަވެސް މެލޭޝިއާގެ ކުރީގެ ބޮޑު ވަޒީރު މަހާތީރް މުހައްމަދުގެ ހާލުކޮޅު ރަނގަޅު ކަމަށް ދަރިކަނބަލުން ވިދާޅުވެއްޖެ އެވެ.
މަރީނާ މަހާތީރް ވިދާޅުވީ އުމުރުން 96 އަހަރުގެ ބައްޕާފުޅު މި ވަގުތު އޮންނެވީ ކުއަލަ ލަމްޕޫރްގެ ނޭޝަނަލް ހާޓް އިންސްޓިޓިއުޓްގައި ކަމަށެވެ. އެ ތަނުގައި އެމަނިކުފާނަށް ފަރުވާ ދެމުންދާތާ މިހާރު ދެ ދުވަސް ވެއްޖެ އެވެ.
މިހާރުގެ ބޮޑު ވަޒީރު އިސްމާއިލް ސަބްރީ ޔައުގޫބް ވަނީ ހޮސްޕިޓަލަށް ވަޑައިގެން މަހާތީރް އަށް ޒިޔާރަތް ކުރައްވާފަ އެވެ. މީޑިއާތަކުން ވެސް އެ ހޮސްޕިޓަލް ކައިރިއަށް ޖަމާވި އެވެ.
ދަރިކަނބަލުން ނެރުނު ބަޔާނުގައި ވިދާޅުވީ މަހާތީރް އަށް މިހާރު ދެމުންދަނީ ފޮލޯއަޕް ފަރުވާއެއް ކަމަށެވެ. މީގެ ދެ ހަފްތާ ކުރިން އެމަނިކުފާނު ވަނީ އެ ހޮސްޕިޓަލުގައި ހިތުގެ ޕްރޮސީޖާއެއް ފުރިހަމަ ކުރައްވާފަ އެވެ.
އާއިލާއިން އެދެނީ އެމަނިކުފާނަށް އަވަސް ޝިފާއެއް މިންވަރު ކުރެއްވުމަށް އެދި އާންމުންގެ ދުއާއަށް ކަމަށް ބަޔާނުގައި ފާހަގަކޮށްފައި ވެ އެވެ.
މިދިޔަ ޑިސެމްބަރު މަހުގެ ފަހުކޮޅު ވެސް މަހާތީރް ވަނީ ޗެކްއަޕެއް ހެއްދެވުމަށް ދުވަސްތަކެއް އެ ހޮސްޕިޓަލްގައި ހޭދަކުރައްވާފަ އެވެ.
މަހާތީރް އަށް ވަނީ ގިނަ ހިތުގެ މައްސަލަތަކާ ކުރިމަތިވެވަޑައިގެންފަ އެވެ. އެގޮތުން ހާޓް އެޓޭކްތަކާ އެކު ބައިޕާސް ސާޖަރީ ހައްދަވާފައި ވެ އެވެ.
މަހާތީރް އަކީ މެލޭޝިއާގެ އެންމެ ނުފޫޒު ގަދަ އެއް ސިޔާސީ ލީޑަރެވެ. އެމަނިކުފާނު ވަނީ ދެ ފަހަރެއްގެ މަތިން ޖުމްލަ 24 އަހަރު ބޮޑު ވަޒީރުގެ މަގާމު ފުރުއްވާފަ އެވެ.
އެގޮތުން 1981 ވަނަ އަހަރުން 2003 ވަނަ އަހަރަށް ވެރިކަން ކުރެއްވުމަށް ފަހު، ދެ ވަނަ ފަހަރަށް އެ މަގާމަށް ވަޑައިގެންނެވީ އުމުރުފުޅުން 92 އަހަރުގައި 2018 ވަނަ އަހަރު އެވެ.
ދެ ވަނަ ފަހަރަށް ބޮޑު ވަޒީރުކަމަށް ވަޑައިގެންނެވީ ބޮޑު ކޮރަޕްޝަން މައްސަލައެއް ފަޅާ އެރުމުން، އިސްލާހީ ބަދަލަށް މަސައްކަތް ކުރާ ސަރުކާރެއްގެ އިސްވެރިޔާގެ ގޮތުގަ އެވެ. ނަމަވެސް އެ ސަރުކާރުގެ އެތެރޭގައި ހަމަނުޖެހުން ބޮޑުވެ، 2020 ވަނަ އަހަރު އެ ސަރުކާރު އުވާލި އެވެ.
