ޖަކާޓާ، އިންޑޮނީޝިއާ (ޖެނުއަރީ 19) - އިންޑޮނީޝިއާގެ ބާލީގައި 2002 ވަނަ އަހަރު ދިން ބޮމުގެ ހަމަލާތަކުގެ ފަހަތުގައި ޓެރަރިސްޓް 15 އަހަރަށް ޖަލަށް ހުކުމްކޮށްފި އެވެ.
އުމުރުން 58 އަހަރުގެ އާރިފް ސުމަރްސޯނޯ ނުވަތަ ޒުލްކަރްނައިން އަކީ އަލް ގައިދާގެ ފަރާތުން ހިތްވަރު ލިބި އުފެދުނު ޖެމާހް އިސްލާމިއްޔާގެ ހާއްސަ ޔުނިޓުގެ ކޮމާންޑަރެވެ.
އެ ގްރޫޕުން 2002 ވަނަ އަހަރު ދިން ހަމަލާތަކުގައި 202 މީހުން މަރުވި އެވެ. ބާލީގެ ބާތަކަކަށް ދިން ހަމަލާގައި 21 ގައުމެއްގެ މީހުން މަރުވި އެވެ.
ކޯޓުގައި ޒުލްކަރްނައިން ބުނީ ބޮން ގޮއްވުމުގައި އޭނާގެ އެއްވެސް ބައިވެރިވުމެއް ނުވާނެ ކަމަށެވެ. ނަމަވެސް އެކަން ކުރީ އޭނާގެ ޓީމުން ކަމަށް އެއްބަސްވި އެވެ.
ހަމަލާ ރޭވުމުގައި ބައިވެރި ނުވާ ކަމަށާއި އެކަން ހިނގަން އުޅޭކަން އޭނާއަށް ނުވެސް އިނގޭ ކަމަށް ޒުލްކަރްނައިން ބުންޏެވެ. ނަމަވެސް ކޯޓުން އެ ވާހަކަތައް ގަބޫލެއް ނުކުރެ އެވެ.
"ޓީމުގެ ވެރިޔަކީ އޭނާ ކަމަށް ވާއިރު އަދި ބާލީގައި ކަމެއް ހިންގަން އެއްބަސްވިއިރު... އެއީ އެ ކަމަށް އެއްބަސްވުން ކަމުގައި ބެލެވޭނެ،" ފަނޑިޔާރު އެލެކްސް އާދަމް ފައިސަލް ވިދާޅުވި އެވެ.
އެހެންވެ، ޓެރަރިޒަމްގެ ކުށް ސާބިތުވާ ކަމަށް ކަނޑައަޅައި 15 އަހަރުގެ ޖަލު ހުކުމެއް އިއްވި އެވެ.
ބާލީގައި ދިން ހަމަލާތަކަށް ފަހު 18 އަހަރު ވަންދެން ޒުލްކަރްނައިން އުޅުނީ ފިލައިގެންނެވެ. އޭނާ ހައްޔަރު ކުރީ 2020 ވަނަ އަހަރު ކައުންޓާޓެރަރިޒަމް ފުލުހުންގެ އޮޕަރޭޝަނެއްގައި ސުމަޓްރާ ރަށުންނެވެ.
އުސާމާ ބިން ލާދިންއާ ގުޅުން އޮންނާތީ އދ. އިން ދަތިކުރުމުގެ ފިޔަވަޅު އަޅާފައިވާ މީހުންގެ ލިސްޓުގައި އޭނާ ހިމެނެ އެވެ. އޭނާ ހައްޔަރު ކުރުމަށް އެހީވާ ފަރާތަކަށް އެމެރިކާއިން ފަސް މިލިއަން ޑޮލަރު ހުށަހެޅި އެވެ.
ބާލީގެ ބޮން ގޮއްވުމުގެ އިތުރުން 2003 ވަނަ އަހަރު ޖަކާޓާގައި ހުންނަ މެރިއޮޓް ހޮޓަލަށް ދިން ހަމަލާގައި 12 މީހުން މަރުވި ހާދިސާއާ އޭނާއާ ގުޅުން އޮތް ކަމަށް ތުހުމަތު ކުރެވެ އެވެ.
