ޕްރޭގް، ޗެކް ރިޕަބްލިކް (ޖެނުއަރީ 19) - ވެކްސިނާ ދެކޮޅު ލަވަކިޔުންތެރިޔަކު "ހެލްތު ޕާސް" ހޯދުމުގެ ބޭނުމުގައި ގަސްތުގައި ކޮވިޑް ޖެހުމުން ހާލު ގޯސްވެ މަރުވެއްޖެ އެވެ.
ޗެކް ރިޕަބްލިކްގެ ފޯކް ލަވަކިޔުންތެރިޔާ ހަނާ ހޮރްކާ "ހެލްތު ޕާސް" ހޯދަން ބޭނުންވީ ވެކްސިން ނުޖަހާ ތިބި މީހުންނަށް ތިއޭޓަރާއި ސޯނާއަށް ދިޔުން މަނާ ކުރުމުންނެވެ.
ވެކްސިން ޖެހުމަށް ބާރު އެޅުމުގެ ގޮތުން ގިނަ ގައުމުތަކަކުން އަންނަނީ "ހެލްތު ޕާސް"ގެ ނިޒާމު ތައާރަފު ކުރަމުންނެވެ. އޭގެ ދަށުން ވެކްސިން ނުޖަހާ މީހުންނަށް ވަރަށް ގިނަ ކަންކަން ނުކުރެވެ އެވެ. އެހެން ނަމަވެސް ކޮވިޑް ޖެހި ރަނގަޅުވުމަށް ފަހު ވަކި މުއްދަތެއް ހަމަ ނުވާ ނަމަ ވަގުތީ "ހެލްތު ޕާސް" ލިބެ އެވެ.
ޗެކް ރިޕަބްލިކްގައި ވެސް ސަގާފީ އަދި ކުޅިވަރު ފެސލިޓީތައް ބޭނުންކުރެވެނީ އެ އުސޫލުގެ ދަށުންނެވެ. އޭގެ އިތުރުން ދަތުރު ކުރުމަށާއި ބާތަކާއި ރެސްޓޯރެންޓްތަކަށް ވަނުމަށް ވެސް "ހެލްތު ޕާސް" ބޭނުންވެ އެވެ.
އެސޮނެންސް ބޭންޑްގެ އުމުރުން 57 އަހަރުގެ ވޯކަލިސްޓް ހަނާ ހޮރްކާ މަރުވީ މިދިޔަ އާދީއްތަ ދުވަހު ކަމަށް އޭނާގެ ދަރިފުޅު ޔާން ރެކް ބުންޏެވެ.
ހަނާގެ ފިރިމީހާ އާދި ދަރިފުޅު ވަނީ ވެކްސިން ޖަހާފަ އެވެ. ނަމަވެސް ހަނާއަކީ ވެކްސިނާ ދެކޮޅަށް އަޑުއުފުލި މީހެކެވެ. އެހެންވެ، އޭނާ ވަނީ "ހެލްތު ޕާސް" ހޯދުމުގެ ބޭނުމުގައި ގަސްތުގައި ކޮވިޑް ޖެހެން މަސައްކަތްކޮށްފަ އެވެ.
ޔާން ރެކް ބުނީ އޭނާގެ މަންމައަށް ކޮވިޑް ޖެހުނީ ޑިސެމްބަރު މަހުގެ ފަހުކޮޅު ކަމަށެވެ. މަރުވުމުގެ ދެ ދުވަސް ކުރިން ސޯޝަލް މީޑިއާގައި ލިޔުނު ޕޯސްޓެއްގައި ހަނާ ބުނީ އޭނާ ސަލާމަތްވެއްޖެ ކަމަށާއި ދެން އޮތީ ސޯނާ އާއި ތިއޭޓަރު އަދި ކޮންސެޓަށް ދިޔުން ކަމަށެވެ.
ކޮވިޑް ބަލީގައި ތިން ހަފްތާ ހޭދަކުރުމަށް ފަހު މަންމަ މަރުވުމުން ޔާން ރެކް ބުނީ އެއީ އެ ސަރަހައްދުގައި އުޅޭ ވެކްސިނާ ދެކޮޅު ގްރޫޕަކުން ފަތުރާ ދޮގު މައުލޫމާތުގެ ނަތީޖާ ކަމަށެވެ.
ގާތްގަނޑަކަށް 10.7 މިލިއަން މީހުންގެ އާބާދީއެއް އޮންނަ ޗެކް ރިޕަބްލިކުން އަންގާރަ ދުވަހު ކޮވިޑްގެ 20،000 އަށް ވުރެ ގިނަ ކޭސް ރިޕޯޓުކުރި އެވެ.
