ދަ ހޭގް (ޖެނުއަރީ 18) - ކުށްވެރިންގެ އޮންލައިން ކަންކަމަށް ބޭނުންކުރަމުން ދިޔަ ބައިނަލްއަގްވާމީ ވާޗުއަލް ޕްރައިވެޓް ނެޓްވޯކެއް ފުލުހުން ޑައުންކޮށްލައިފި އެވެ.
ޔޫރަޕުގެ ފުލުހުންގެ ހިމެނޭ ޔޫރޯޕޮލް އިން ބުނީ ވީޕީއެންލެބް ޑޮޓް ނެޓް އަދި 15 ހޯސްޓް ސާވާ ޑައުންކުރުމުގައި މަސައްކަތް ކުރީ ޔޫރަޕާއި އެމެރިކާގެ ފުލުހުން ކަމަށެވެ.
ވީޕީއެންލެބް ޑޮޓް ނެޓް އަކީ ކުށްވެރިންގެ ގްރޫޕުތަކަށް ހިދުމަތް ފޯރުކޮށްދީ، އެ މީހުންގެ މުއާސަލާތުތަކާއި އިންޓަނެޓު ބޭނުންކުރާ ގޮތް ރައްކާތެރިކަމާ އެކު ފޮރުވައިދޭ ބަޔެކެވެ.
"ވީޕީއެންގެ ހިދުމަތް ބޭނުން ކުރަމުން ދިޔައީ ވަރަށް ސީރިއަސް ޖިނާއީ ކުށްތަކަށް. އޭގެ ތެރޭގައި ރޭންސަމްވެއާ ފޮނުވުމާއި އެހެނިހެން ސައިބާ ކުށްތައް ހިމެނޭ."
ވީޕީއެންލެބް ޑޮޓް ނެޓްގެ އަގަކީ ސަބްސްކްރިޕްޝަން ފީގެ ގޮތުގައި 60 ޑޮލަރު ކަމަށާއި އެއީ ސައިބާ ކުށްވެރިންގެ މެދުގައި ވަރަށް މަގްބޫލު ނެޓްވޯކެއް ކަމަށް ޔޫރޯޕޮލް އިން ބުންޏެވެ.
ވީޕީއެންލެބް ޑޮޓް ނެޓް ގާއިމްކޮށްފައި ވަނީ 2008 ވަނަ އަހަރު އެވެ. އޭގެ ހިދުމަތްދޭ ކުންފުނި ހުއްޓުވަން މަސައްކަތް ފެށީ ކުށްވެރިންގެ އެކި އަމަލުތަކަށް ވީޕީއެން ބޭނުންކުރާކަން ތަހުގީގަށް އެނގުމުންނެވެ.
އެގޮތުން މެލްވެއާ ފޮނުވުމާއި ކޮމްޕިއުޓާ ސިސްޓަމްތައް ހުއްޓުވުމަށް ހަމަލާދޭ ނުރައްކާތެރި ސޮފްޓްވެއާތައް ފޮނުވައި، ރޭންސަމްވެއާ ހަމަލާތައްދ ދިނުމަށް އެ ވީޕީއެން ބޭނުންކުރި އެވެ.
ޔޫރޯޕޮލް އިން ބުނީ އޭގެ ނުރައްކާ އޮތް ކަމަށް ބެލެވޭ 100 އަށް ވުރެ ބޮޑެތި ވިޔަފާރިތައް ފާހަގަވެފައިވާ ކަމަށެވެ. ފުލުހުން ދަނީ އެ ކުންފުނިތަކާ ގުޅިގެން ރައްކާތެރިކަމުގެ ފިޔަވަޅު އެޅޭނެ ގޮތްތައް ބަލަމުންނެވެ.
ޖަރުމަނު ފުލުހުންގެ އިސްނެގުމަށް ފެށި އޮޕަރޭޝަނުގައި އީޔޫ ގައުމުތަކާއި، އިނގިރޭސިވިލާތް، ކެނެޑާ، އެމެރިކާ އަދި ޔޫކްރެއިންގެ ފުލުހުން ބައިވެރިވި އެވެ.
