އަބޫދާބީގެ ވަލީއަހުދު އަދި ޔޫއޭއީގެ އާމްޑް ފޯސަސްގެ ޑެޕިއުޓީ ސުޕްރީމް ކޮމާންޑަރު، ޝައިހް މުހައްމަދު ބިން ޒައިދު އަލް ނަހްޔާންގެ ދައުވަތަކަށް ރައީސް އިބްރާހިމް މުހަންމަދު ސޯލިހް ޔޫއޭއީއަށް ކުރެއްވި ދަތުރުފުޅު ނިންމަވާލެއްވުމަށްފަހު މިއަދު ރާއްޖެ ވަޑައިގެންފި އެވެ.
ސަރުކާރުގެ މަތީ ފަންތީގެ ވަފުދަކާއެކު ރައީސް ޔޫއޭއީއަށް ވަޑައިގެންފައި ވަނީ މިދިޔަ އާދިއްތަ ދުވަހު އެވެ. ތިން ދުވަހުގެ އެ ދަތުރުފުޅުގައި އެމަނިކުފާނު ވަނީ އަބޫދާބީ ސަސްޓެއިނެބިލިޓީ ވީކް ހުޅުވުމުގެ ރަސްމިއްޔާތާއި ޒައްޔެދް ސަސްޓެއިނެބިލިޓީ އެވޯޑް ދިނުމުގެ ރަސްމިއްޔާތުގައި ބައިވެރިވެވަޑައިގެންފަ އެވެ.
ދުބާއީގެ އެގްޒިބިޝަން ހޯލުގައި ކުރިއަށްދިޔަ އެ ދެ ރަސްމިއްޔާތު ވެސް ބާއްވާފައިވަނީ މިދިޔަ ހޯމަ ދުވަހު އެވެ. މިއަހަރުގެ މި ހަރަކާތުގެ އަމާޒަކީ މޫސުމަށް އަންނަ ބަދަލުތަކާ ދެކޮޅަށް މަސައްކަތްކުރުމަށް ކޮޕް-26 ގެ ނިންމުންތައް ތަންފީޒުކުރުމަށް ބޭނުންވާ މަގުޗާޓުތައް، ގުޅިގެން އެއް މަގުސަދެއް ހާސިލުކުރެވޭ ގޮތަށް އަލުން މުރާޖައާކޮށް އެކުލަވާލުމެވެ.
ޒައިދު ސަސްޓެއިނަބިލިޓީ އެވޯޑަކީ ސަސްޓެއިނަބިލިޓީގެ ދާއިރާއިން ޔޫއޭއީން ދޭ ޝަރަފުވެރި ބައިނަލްއަގްވާމީ އެވޯޑެކެވެ.
އެ ރަސްމިއްޔާތަށް ފަހު އެމަނިކުފާނު ދުބާއީ އެކްސްޕޯ 2020 އަށް ޒިޔާރަތް ކުރައްވައި، ދިވެހިރާއްޖޭ އާއި ސިންގަޕޫރާއި އިޓަލީގެ ޕެވިލިއަންގެ އިތުރުން ވިޝަން ޕެވިލިއަން އަށް ވަޑައިގެން އެ ތަންތަން ބައްލަވާލެއްވި ކަމަށް ރައީސް އޮފީހުން މައުލޫމާތު ދިނެވެ.
އެކްސްޕޯގެ ދިވެހިރާއްޖޭގެ ޕެވިލިއަން ފަރުމާ ކޮށްފައި ވަނީ މޫސުމަށް އަންނަ ބަދަލުތަކަށް ހައްލެއް ހޯދުމުގައި ދެމެހެއްޓެނިވި ގޮތެއްގައި ޢަމަލުކުރާ ގޮތްތަކާއި ތިމާވެށީގެ ދާއިރާއިން ރާއްޖެއިން ހޯދާފައިވާ ކުރިއެރުންތައް ދައްކުވައިދޭ ގޮތަށެވެ.
ސިންގަޕޫރުގެ ޕެވިލިއަން އިން ދައްކުވައިދިނީ ބަގީޗާއެއްގެ ގޮތަށް އޮންނަ ދިރިއުޅެން ފަސޭހަ ސިޓީއެކެވެ. އަދި ސިންގަޕޫރުގެ އީޖާދީ ވިސްނުންތައް ވެސް މި ޕެވިލިއަން އިން ދައްކުވައިދިނެވެ.
އިޓަލީގެ ޕެވިލިއަންއިން އިޓަލީން އެކި ދާއިރާތަކުން ހުރި ފުރުޞަތުތަކާއި ހާސިލުކޮށްފައިވާ ކުރިއެރުންތަކާއި އިޖާދީކަންކަމާއި އުފެއްދުންތެރިކަން ފެނިގެންދިޔަ އެވެ.
ވިޝަން ޕެވިލިއަންއަކީ ޔޫއޭއީގެ ނައިބު ރައީސް އަދި ބޮޑުވަޒީރު އަދި ދުބާއީގެ ވެރިޔާ ޝައިހް މުހައްމަދު ބިން ރާޝިދު އަލް މަހްތޫމްގެ ވިސްނުންފުޅުތަކާއި ތަސައްވުރުތައް ދައްކުވައިދޭ ޕެވިލިއަންއެކެވެ.
ރައީސް ސޯލިހް ޔޫއޭއީ އަށް ކުރެއްވި މި ދަތުރުފުޅަކީ މި އަހަރު ރައީސް ރާއްޖޭން ބޭރަށް ކުރެއްވި ފުރަތަމަ ރަސްމީ ދަތުރުފުޅެވެ. އާ އަހަރުގެ ޗުއްޓީ އަށް މިދިޔަ އަހަރުގެ ފަހުކޮޅު އެމަނިކުފާނު އަވައްޓެރި ސްރީ ލަންކާ އަށް ވަޑައިގެންނެވި އެވެ.
