މުޅި ރާއްޖެ އަށް ހުޅުވާލައިގެން ބޭއްވޭ މަޝްހޫރު ފުޓްސަލް މުބާރާތް، ގޯލްޑަން ފުޓްސަލް ޗެލެންޖްގެ މި ފަހަރުގެ މުބާރާތް، "ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2022" ގެ ޕަބްލިކް ރިލޭޝަން (ޕީއާރް) ޕާޓްނަރެއްގެ ގޮތުގައި "އަދަދު" ހަމަޖައްސައިފި އެވެ.
"އަދަދު"އާ އެކު ގޯލްޑަން ފުޓްސަލް އެސޯސިއޭޝަނުން އެއްބަސްވުމުގައި ސޮއިކުރުން އޮތީ އިއްޔެ މެންދުރު ފަހު ކޭވް ކެފޭގައި ބޭއްވި ރަސްމިއްޔާތެއްގަ އެވެ. ގޯލްޑަން ފުޓްސަލް އެސޯސިއޭޝަންގެ ފަރާތުން އެއްބަސްވުމުގައި ސޮއިކުރީ، އެ ޖަމިއްޔާގެ ރައީސް ރިލްވާން މޫސާ އެވެ. "އަދަދު"ގެ ފަރާތުން ސޮއިކުރީ އެސޯސިއޭޓް އެޑިޓަރު (ސްޕޯޓްސް)، އައްޒާމް އަލިފުޅު އެވެ.
އެއްބަސްވުމުގައި ސޮއިކުރުމަށް ފަހު ރިލްވާން ވިދާޅުވީ "އަދަދު" ޕާޓްނަރެއްގެ ގޮތުގައި ހަމަޖައްސަން ބޭނުންވީ ކުޅިވަރުގެ ހަބަރުތައް އެންމެ ތަފްސީލްކޮށް ކިޔާލަން ލިބޭ ނޫހަކީ "އަދަދު" ކަމަށްވެފައި، ގޯލްޑަން ފުޓްސަލް ޗެލެންޖް ފަދަ ފޯރިގަދަ މުބާރާތެއްގެ ހަބަރުތައް ވީ އެންމެ ފުރިހަަމަކޮށް ކިޔުންތެރިންނާ ހަމައަށް ގެނެސްދޭނެ އެއް ފަރާތަކީ "އަދަދު" ކަމަށް ގަބޫލުކުރާތީ ކަމަށެވެ.
އިއްޔެ ބޭއްވި ގޯލްޑަން ފުޓްސަލްގެ ގުރުއަތުލުމުގެ ރަސްމިއްޔާތުގެ ތެރެއިން ރިލްވާން ވާހަކަ ދައްކަވަނީ.-- ފޮޓޯ: މުހައްމަދު ޝާބިން/ އަދަދު
ރިލްވާން ވަނީ ކުރު މުއްދަތެއްގެ ތެރޭގައި "އަދަދު" އިން ރާއްޖޭގެ ކުޅިވަރުގައި ކޮށްފައިވާ މަސައްކަތްތަކަށް ބަލާއިރު، މިދިޔަ އަހަރުގެ ސާފް ޗެމްޕިއަންޝިޕްގައި ކުރި މަސައްކަތް ފާހަގަކޮށްފަ އެވެ. އަދި ގޯލްޑަން ފުޓްސަލް ޗެލެންޖް ކުރިއަށް އޮތްތަނުގައި ވެސް ބާއްވާއިރު، "އަދަދު"އާ އެކު މަސައްކަތްކުރަން ބޭނުންވާ ކަމަށް ރިލްވާން ވިދާޅުވި އެވެ.
މީގެ ހަ އަހަރު ކުރިން 2015 ވަނަ އަހަރުން ފެށިގެން ބާއްވަމުން އަންނަ ގޯލްޑަން ފުޓްސަލް ޗެލެންޖްގެ ޓައިޓަލް ސްޕޮންސަރަކީ ސޮނީ ސްޕޯޓްސް އެވެ. މިއީ ސޮނީ ސްޕޯޓްސް އިން ޓައިޓަލް ސްޕޮންސަރެއްގެ ގޮތުގައި މަސައްކަތް ކުރާ ދެ ވަނަ ފަހަރެވެ. ގޯލްޑަން ފުޓްސަލް ޗެލެންޖްގެ ޕާޓްނަރުންގެ ގޮތުގައި ވަން އޮންލައިނާއި ފަހު މިނިޓުން ވެސް މަސައްކަތް ކުރެ އެވެ.
"އަދަދު" އިން ގޯލްޑަން ފުޓްސަލް ޗެލެންޖްގެ ޕީއާރް ޕާޓްނަރެއްގެ ގޮތުގައި މަސައްކަތް ކުރަން ބޭނުންވި ސަބަބަކީ މިއީ ރާއްޖޭގައި އެންމެ ފުޅާކޮށް ބޭއްވޭ ފުޓްސަލް މުބާރާތަށް ވެފައި، މިއީ ރާއްޖޭގެ ގިނަ ރަށްތަކާއި ގިނަ ޒުވާނުންގެ އިތުބާރު ލިބިފައިވާ މުބާރާތަކަށް ވާތީ އެވެ. އަދި ގޯލްޑަން ފުޓްސަލް ޗެލެންޖް އަންނަ މަހުގެ 19 ވަނަ ދުވަހު ފަށަން ނިންމާފައިވާއިރު، "އަދަދު"ގެ ފަރާތުން މުބާރާތް ޕްރޮމޯޓް ކުރަން ގިނަ ކަންތައްތަކެއް ކުރަން ވަނީ ރާވައިފަ އެވެ.
މިދިޔަ އަހަރު އޭޕްރީލް މަހު ވުޖޫދުވި "އަދަދު" ނޫހަކީ ރާއްޖޭގެ އެންމެ ބޮޑު ކުޅިވަރު އެސޯސިއޭޝަން ކަމަށްވާ ފުޓްބޯލް އެސޯސިއޭޝަން (އެފްއޭއެމް)ގެ ވެސް ޕާޓްނަރެކެވެ. އަދި މި އަހަރު ރާއްޖޭގައި ބޭއްވި އުރީދޫ ސާފް ޗެމްޕިއަންޝިޕްގެ އޮންލައިން އަދި ޕީއާރް ޕާޓްނަރަކީ ވެސް "އަދަދު" އެވެ. އަދި "އަދަދު" އަކީ ކްރިކެޓް ބޯޑް އޮފް މޯލްޑިވްސް (ސީބީއެމް)ގެ ވެސް ޕާޓްނަރެކެވެ.
