ހދ. ހަނިމާދޫ އެއާޕޯޓުން ފުރަން ތައްޔާރުވެފައި އޮތް އައިލެންޑް އޭވިއޭޝަންގެ މަތިންދާބޯޓެއްގައި މިރޭ ރޯވެއްޖެ އެވެ.
ފަސިންޖަރުން އަރުވައި، ފުރަން ތައްޔާރުވެފައި އޮއްވާ ބޯޓުގައި ރޯވީ ދިމާވި ޓެކްނިކަލް މައްސަލައަކުން ކަމަށާއި ހާދިސާގައި އެއްވެސް މީހަކަށް ގެއްލުންނުވާ ކަމަށް އެއިލެންޑް އޭވިއޭޝަންގެ ޑެޕިއުޓީ މެނޭޖިން ޑައިރެކްޓަރު އައިޝަތު ޖެނިފާ "އަދަދު" އާ ވާހަކަ ދައްކަވަމުން ވިދާޅުވި އެވެ.
ޖެނިފާ ވިދާޅުވީ އަލިފާން ރޯވީ ސާކެޓެއްގެ ފޯލްޓަކުން ކަމަށާއި އަލިފާނުގެ ސަބަބުން ކޯ-ޕައިލެޓުގެ ދޮރުގެ ބިއްލޫގަނޑު ތަޅައިގެން ދިޔަ ކަމަށެވެ. ނަމަވެސް އަލިފާނުގެ ސަބަބުން އިތުރު ގެއްލުމެއް ނުވާ ކަމަށް އޭނާ ވިދާޅުވި އެވެ.
އެ ހާދިސާ ހިނގިއިރު ބޯޓުގައި ތިބީ 35 ޕަސެންޖަރުންނާއި ކްރޫން އެމަޖެންސީގައި އެވަކުއޭޓްކޮށްފައިވާ ކަމަށް ވެސް ޖެނިފާ ވިދާޅުވި އެވެ. އެ މީހުން ބަލައި، ކުޑަ ވަގުތުކޮޅެއްގެ ތެރޭގައި ވެލާނާ އިންޓަނޭޝަނަލް އެއާޕޯޓުން އިތުރު ބޯޓެއް ފުރާނެ ކަމަށް ވެސް އޭނާ ވިދާޅުވި އެވެ.
އެކަމާ ގުޅޭ ގޮތުން އައިލެންޑް އޭވިއޭޝަނުން ޓުވިޓާގައި ނެރުނު ކުރު ބަޔާނެއްގައި ބުނީ އެ އަލިފާނުގެ ހާދިސާ މިހާރު ތަހުގީގު ކުރަން ފަށާފައިވާ ކަމަށެވެ.
