ކޮލޮމްބޯ، ސްރީލަންކާ (ޖެނުއަރީ 18) - ސްރީލަންކާގެ އިންސާނީ ހައްގުތަކުގެ ރިކޯޑާ ގުޅޭ ގޮތުން އޮތް އޮޅުންތައް ފޮހެލާނެ ކަމަށް ރައީސް ގޮތަބަޔާ ރާޖަޕަކްސަ ވިދާޅުވެއްޖެ އެވެ.
ސްރީލަންކާ ސިފައިންނާއި ތަމަޅަ ޓައިގަރުންނާ ދެމެދު ކުރި ދިގު ހަނގުރާމައިގައި ބޮޑެތި ޖަރީމާތައް ހިންގި ކަމަށް ސިފައިންގެ މައްޗަށް ތުހުމަތު ކުރެވެ އެވެ. އެގޮތުން 2009 ވަނަ އަހަރު ހަނގުރާމަ ނިމެން ގާތްވެފައި ވަނިކޮށް 40،000 އާއްމުން މެރި ކަމަށް ތުހުމަތު ކުރެވެ އެވެ.
ނަމަވެސް ސްރީލަންކާ ސަރުކާރުން އެ ހުރިހާ ތުހުމަތެއް ދޮގުކުރެ އެވެ.
ހަނގުރާމައިގެ ޖަރީމާތަކުގެ އިތުރުން ނޫސްވެރިންނާއި އެކްޓިވިސްޓުންނަށް ޓާގެޓުކޮށް، ގިނަ ބަޔަކު މެރި ކަމަށް ވެސް ތުހުމަތު ކުރެވެ އެވެ. އޭގެ އިތުރުން ކުށުގެ ތުހުމަތުގައި ހައްޔަރު ކުރާ މީހުން ބަންދުގައި ތިއްބާ މަރުވާ މައްސަލަ ވެސް ފަހަކަށް އައިސް ފާހަގަވެފައި ވެ އެވެ.
އެކަމަކު 2019 ވަނަ އަހަރު ވެރިކަމަށް ވަޑައިގެންނެވި ގޮތަބަޔާ ވިދާޅުވީ އެމަނިކުފާނުގެ ސަރުކާރުގެ ރިކޯޑް ސާފު ކަމަށާއި ބައިނަލްއަގްވާމީ ފަރާތްތަކުން ސަރުކާރަށް ފާޑުކިޔަނީ އެއްވެސް ސަބަބެއް އޮވެގެން ނޫން ކަމަށެވެ.
"އަޅުގަނޑުމެންގެ އިންސާނީ ހައްގުތަކާ ބެހޭ ގޮތުން ބައިނަލްއަގްވާމީ މުޖުތަމައާ ހަމައަށް ފޯރާފައިވާ އޮޅުންތައް ފޮހެލަން ޖެހޭ،" ޕާލިމެންޓަށް ދެއްވި ބަޔާނެއްގައި ގޮތަބަޔާ ވިދާޅުވި އެވެ.
"އަޅުގަނޑު މި މަގާމުގައި ހޭދަވި މުއްދަތުގައި އިންސާނީ ހައްގުތަކާ ހިލާފު އެއްވެސް ކަމަކަށް ސަރުކާރުން ހިތްވަރުދީފައެއް ނުވާނެ. މުސްތަގްބަލުގައި ވެސް އެފަދަ އެއްވެސް ކަމަކަށް ޖާގައެއް ނުދޭނަން."
އެހެން ނަމަވެސް ގޮތަބަޔާގެ ސަރުކާރުގައި ބައެއް ބޮޑެތި ކުށްވެރިން ފުލުހުންގެ ބަންދުގައި ވަނިކޮށް ބަޑި ޖަހައި މަރާލި ހާދިސާތަކެއް ވަނީ ފެންމަތިވެފަ އެވެ. އިތުރު އެހެން ތުހުމަތު ކުރެވޭ މީހުން ޝަރީއަތެއް ކުރުމެއް ނެތި ދިގު މުއްދަތަށް ބަންދުކޮށްފައި ވެ އެވެ.
ސްރީލަންކާގެ ދާހިލީ ހަނގުރާމަ ނިމެން ގާތްވިއިރު، އެންމެ އިސް ޑިފެންސް އޮފިޝަލްގެ މަގާމުގައި ހުންނެވީ ވެސް ގޮތަބަޔާ އެވެ. އޭރު ރައީސް ކަމުގައި ހުންނެވީ ގޮތަބަޔާގެ ބޭބޭފުޅު އަދި މިހާރުގެ ބޮޑު ވަޒީރު މަހިންދަ ރާޖަޕަކްސަ އެވެ.
ހަނގުރާމައިގައި ހިންގި ޖަރީމާތައް ތަހުގީގު ނުކުރާ ކަމަށް ބުނެ، އދ.ގެ އިންސާނީ ހައްގުތަކާ ބެހޭ ކައުންސިލުން ސްރީލަންކާއަށް އިންޒާރު ދީފައި ވެ އެވެ.
