ކޮވިޑް-19 އިން ދިފާއުވާ ވެކްސިންގެ ބޫސްޓާ ޑޯޒް ޖެހުމުގެ އިންތިޒާމް ހަމަޖައްސަން ދިގު މުއްދަތެއް ލިބުނު ނަަމަވެސް ބޫސްޓާ ޑޯޒް ޖަހަން މިއަދު ފެށިއިރު އެކަމަށް އޮތް އިންތިޒާމް ވަރަށް ގޯސް ކަމަށް ބުނެ މީހުން ޝަކުވާ ކުރަން ފަށައިފި އެވެ.
ބޫސްޓާ ޑޯޒް ޖެހުމަށް އޮންލައިންކޮށް އެޕޮއިންޓްމެންޓަށް އެދެވޭނެ އިންތިޒާމް އެޗްޕީއޭއިން ކުރިން ހަމަޖެއްސި އެވެ. ބޫސްޓާ ޑޯޒް ޖަހަން މިއަދު ފެށުމުން، އެ މަރުހަލާ ފުރިހަމަކުރި ގިނަ މީހުން ހީކުރީ، ދުރާލައި އެޕޮއިންޓް ހަދައި، އެޗްޕީއޭ އިން އަންގާ ގަޑިއަކަށް ދާން ޖެހޭތީ މާ ދިގު ކިއުއް ނޯންނާނެ ކަމަށެވެ.
އެހެންނަމަވެސް އެގޮތަށް އެޕޮއިންޓްމަންޓް ހައްދައިގެން ދިޔަ ބައެއް މީހުން މިއަދު ބުނީ، ދުރާލައި ހެއްދި އެޕޮއިންޓްމަންޓް ހެއްދުމުގެ ބޭނުން ނުހިފުނު ކަމަށާއި ކުރިން ވެކްސިން ޖެހިއިރަށް ވުރެ ވެސް މިހާރު އިންތިޒާމް ގޯސް ކަމަށެވެ.
"ގަޑިއަކަށް އަޅުގަނޑުމެން މި ދިޔައީ. އެކަމަކު އެތަނުގައި އޮތް ކިއުގައި ދެގަޑިއެއްހާ އިރު ހޭދަކުރަން ޖެހުނު،" ބޫސްޓާ ޑޯޒް ޖަހަން މިއަދު ދިޔަ މީހަކު ބުންޏެވެ.
ވެކްސިން ކިއު ދިގުވެގެން ސޯޝަލް މީޑިއާގައި އެކަމުގެ ޝަކުވާކުރި ބައެއް މީހުން ބުނީ އެޕޮއިންޓްމެންޓް ހައްދަން އެޗްޕީއޭއިން ދިން ލިންކް ޝެއާ ކުރެވުނީތީ މައާފަށް އެދޭ ކަމަށެވެ.
"އެއީ ބޮޑު ލަނޑެއް. އަދި 15 މިނިޓް ކުރިން އަންނަން ބުނި،" އޭނާ ބުންޏެވެ.
ކޮމިޝަނާ އޮފް ކޮލިޓީ އެޝުއަރެންސް ތަސްލީމާ އުސްމާން "އަދަދު" އަށް ވިދާޅުވީ ބޫސްޓާ ޑޯޒް ޖަހަން މިއަދު ފުރަތަމަ ފެށި އިރު ލަސްވާން މެދުވެރިވީ ސިސްޓަމަށް ދިމާވި މައްސަލައެއްގެ ސަބަބުން ކަމަށެވެ. އެ މައްސަަލަ ހައްލުކޮށް، އިންތިޒާމް މިހާރު ރަނގަޅުވަމުން އަންނަ ކަމަށް ވެސް އޭނާ ވިދާޅުވި އެވެ.
ރާއްޖޭގައި ވެކްސިން ޖަހާ އުމުރުގެ އެންމެނަށް ބޫސްޓާ ޑޯޒް ދެވޭ ވަަރަށް ވެކްސިނުގެ ޑޯޒް ލިބިފައިވާ ކަމަށް ހެލްތު މިނިސްޓްރީން ކުރިން ބުންޏެވެ.
ކޮވިޑުގެ ވޭރިއަންޓެއް ކަމަށްވާ އޮމިކްރޯން މިހާރު ހަލުވިކަމާއެކު ފެތުރެމުންދާއިރު އިއްޔެ އެކަނި ވެސް 967 މީހުންގެ ގައިން ބަލި ފެނިފައިވެ އެވެ. ޖުމްލަ 101،418 މީހުންނަށް ރާއްޖެއިން ކޮވިޑް ޖެހުނުއިރު މިހާތަނަށް އެ ބަލީގައި 265 މީހުން ވަނީ މަރުވެފަ އެވެ.
އެޗްޕީއޭއިން ބުނާ ގޮތުގައި 368،622 މީހުން ވަނީ ރާއްޖެއިން ވެކްސިންގެ ދެ ޑޯޒު ފުރިހަމަކޮށްފަ އެވެ. އަދި 29،082 މީހުން ވަނީ ވެކްސިންގެ ތިން ވަނަ ޑޯޒު ނުވަތަ ބޫސްޓޯ ޑޯޒް ޖަހައިފަ އެވެ.
