ޖެނީވާ، ސްވިޓްޒަލޭންޑް (ޖެނުއަރީ 12) - ކޮވިޑް ވެކްސިންގެ ބޫސްޓާ ޝޮޓުތައް ތަކުރާރު ކުރުމަކީ އާ ވޭރިއެންޓްތަކާ ދެކޮޅަށް ހައްލެއް ނޫން ކަމަށާއި ބޭނުން ވަނީ މުޅިން އާ ވެކްސިނެއް ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ ތަޖުރިބާކާރުން ބުނެފި އެވެ.
ކޮވިޑް ވެކްސިންތައް މޮނީޓާ ކުރަން އުފެއްދި ޑަބްލިއުއެޗްއޯގެ ތަޖުރިބާކާރުންގެ ޓީމުން ބުނީ ބަލިމަޑުކަމާ ދެކޮޅަށް މަސައްކަތް ކުރުމަށް އެންމެ ރަނގަޅު ގޮތަކީ މިހާރު ހުރި ވެކްސިންތަކުގެ އިތުރު ޑޯޒްތައް އާ ވޭރިއެންޓްތަކާ ދެކޮޅަށް ދިނުން ނޫން ކަމަށެވެ.
"އޮރިޖިނަލް ވެކްސިންގެ ބޫސްޓާ ޑޯޒްތަކެއް ތަކުރާރު ކުރުމަކީ އެންމެ އެކަށީގެންވާ އަދި ދެމެހެއްޓެނިވި ހައްލެއް ނޫން،" ޑަބްލިއުއެޗްއޯގެ ޓެގް ޓީމުން ނެރުނު ބަޔާނުގައި ބުންޏެވެ.
ބަޔާނުގައި ބުނީ ހަލުވިކަމާ އެކު ފެތުރެމުންދާ އޮމިކްރޯން ވޭރިއެންޓުގެ ސަބަބުން ކޮވިޑް ޖެހޭ މީހުންގެ އަލާމާތްތައް ފެނުން ހުއްޓުވުމުގައި މިހާރު ހުރި ވެކްސިންތައް މަސައްކަތް ކުރާ މިންވަރު ކުޑަކަން ދިރާސާތަކުން ދައްކާ ކަމަށެވެ.
ނަމަވެސް "ސިވިއާ ޑިޒީޒް" ނުވަތަ ބަލީގައި ބޮޑުވަރުވުމާ ދުރުކޮށްދޭން މިހާރު ހުރި ވެކްސިންތަކުން އެހީވާ ކަމަށް ބަޔާނުގައި ފާހަގަކޮށްފައި ވެ އެވެ. މިހާރު ހުރި ވެކްސިންތަކަކީ ބަލީގައި ބޮޑުވަރުވުން ކުޑަކޮށްދިނުމުގެ މަގުސަދުގައި އުފެއްދި ވެކްސިންކަން ވެސް ބަޔާނުގައި ފާހަގަކޮށްފައި ވެ އެވެ.
ޑަބްލިއުއެޗްއޯގެ ޓެގް ޓީމުން ލަފާދިނީ ބަލީގައި ބޮޑުވަރުވުމާ ދުރުކޮށްދޭ އަދި ބަލި ފެތުރުން ކޮންޓްރޯލްކޮށް، ބަލި ޖެހުން މަދުކޮށްދޭ ބާވަތުގެ ވެކްސިނެއް އުފެއްދުމަށެވެ.
"ބަލި ފެތުރުމާއި ޖެހުން ހުއްޓުވައި، ބަލީގައި ބޮޑުވަރުވުން ހުއްޓުވައި، މަރުތައް މަދުކޮށްދޭން ފުރިހަމަ އަށް މަސައްކަތް ކުރާ ކޮވިޑް-19 ވެކްސިންތަކެއް އެބަ ބޭނުންވޭ އަދި ތަރައްގީ ކުރަން ޖެހޭ،" އެ ޓީމުން ބުންޏެވެ.
"އެފަދަ ވެކްސިން ލިބެންދެން، މިހާރު ހުރި ކޮވިޑް-19 ވެކްސިންތައް އަޕްޑޭޓުކޮށް، އޮމިކްރޯން އާއި މުސްތަގުބަލުގައި ފެންނާނެ ވޭރިއެންޓްތަކާ ދެކޮޅަށް ޑަބްލިއުއެޗްއޯ އިން ލަފާދޭ މިންވަރުގެ ރައްކާތެރިކަން ލިބޭނެކަން ކަށަވަރު ކުރަން ޖެހޭ."
